មានក្តីសង្ឃឹមជាថ្មី
ដោយJasmine Goh
May 25, 2025
១ថែស្សាឡូនិច ៥:៤-១៥
ហើយជួយកំសាន្តដល់ពួកអ្នកណាដែលមានសេចក្ដីទន់ក្រំចិត្ត ទាំងគាំពារពួកអ្នកដែលខ្សោយ នឹងអត់ឱនចំពោះមនុស្សទាំងអស់។ ១ថែស្សាឡូនិច ៥:១៥
ថ្ងៃមួយ លោក ធា(Thia) មានការងឿងឆ្ងល់ថា ហេតុអ្វីកូនប្រុសគាត់អាយុ១៨ឆ្នាំ កំពុងចំណាយពេលជាច្រើនម៉ោង នៅក្នុងបណ្ណាល័យ ក្នុងពេលថ្មីៗនេះ? កូនប្រុសគាត់ មានជំងឺអូទីហ្សិម ហើយកម្រនិយាយរកគេណាស់។ តាមធម្មតា នៅពេលដែលគាត់ចេញពីរៀន គាត់តែងតែត្រឡប់មកផ្ទះតែម្តង។ តើមានអ្វីធ្វើឲ្យគាត់ខុសប្លែកពីមុន? នៅពេលលោកធា សួរគាត់ គាត់ក៏បានឆ្លើយថា គាត់បានទៅបណ្ណាល័យ ដើម្បីរៀនបន្ថែមជាមួយណាវិន(Navin)។
លោកធា ក៏បានដឹងថា ណាវិន គឺជាមិត្តរួមថ្នាក់ម្នាក់ ដែលបានកត់សំគាល់ឃើញថា កូនប្រុសគាត់កំពុងតែរៀនខ្សោយ ហើយក៏បានបបួលកូនប្រុសគាត់រៀនជាមួយគ្នា។ ការបង្កើតមិត្តភាពនេះ ជាលើកទីមួយ ក្នុងរយៈពេល១៨ឆ្នាំ ពិតជាបានលើកទឹកចិត្តឪពុកម្នាក់ដែលមិនមានសង្ឃឹមថា កូនប្រុសគាត់ និងមានមិត្តភក្តិនោះទេ។
គាត់មានសង្ឃឹមជាថ្មី ដោយសារមនុស្សម្នាក់មានការយកចិត្តទុកដាក់ និងជួយយកអសារកូនប្រុសគាត់ ដែលកំពុងត្រូវការជំនួយ។ ក្នុងការងារដែលសាវ័កប៉ុលបានធ្វើបម្រើព្រះ ក្នុងពួកជំនុំដំបូង គាត់ដឹងថា ការជួយគ្នាទៅវិញទៅមក ក៏មានភាពចាំបាច់ ក្នុងចំណោមអ្នកជឿ ដើម្បីឲ្យពួកគេមានក្តីសង្ឃឹមឡើងវិញ។ ដើម្បីឲ្យអ្នកជឿព្រះយេស៊ូវ “ចាំយាម ហើយដឹងខ្លួន”(១ថែស្សាឡូនិច ៥:៦) ក្នុងការរស់នៅ ដោយមានសង្ឃឹមថា ព្រះអង្គនឹងយាងមកវិញ ពួកគេត្រូវជួយគ្នាទៅវិញទៅមក(ខ.១១) ជាពិសេសអ្នកដែលកំពុងជួបការលំបាក។
ហេតុនេះហើយ ទោះអ្នកជឿទាំងនេះបន្តរស់នៅ ក្នុងជីវិតដែលមានក្តីស្រឡាញ់ ដែលគាប់ព្រះទ័យដល់ព្រះ(៤:១,១០) សាវ័កប៉ុលនៅតែក្រើនរំឭកពួកគេ ឲ្យ “ជួយកំសាន្តដល់ពួកអ្នកណាដែលមានសេចក្ដីទន់ក្រំចិត្ត ទាំងគាំពារពួកអ្នកដែលខ្សោយ”(៥:១៤)។ ពេលណាយើងសង្កេតឃើញគ្រីស្ទបរិស័ទណាម្នាក់ មានការភ័យខ្លាច ថប់បារម្ភ ឬបាក់ទឹកចិត្ត យើងអាចទៅក្បែរពួកគេ ដើម្បីស្តាប់ពួកគេនិយាយអំពីបញ្ហាផ្សេងៗ ឬដើម្បីលើកទឹកចិត្ត ឬមួយគ្រាន់តែអង្គុយកំដរពួកគេយ៉ាងស្ងាត់ស្ងៀម។ ពេលនោះ ព្រះទ្រង់អាចប្រើយើង ដើម្បីជួយពួកគេឲ្យមានកម្លាំង និងលើកទឹកចិត្តឲ្យតោងឲ្យជាប់សេចក្តីសង្ឃឹម ក្នុងព្រះយេស៊ូវ។—Jasmine Goh
ក្នុងពួកជំនុំរបស់អ្នក តើមាននរណាដែលអ្នកអាចទៅលើកទឹកចិត្ត នៅថ្ងៃនេះ?
តើអ្នកអាចបង្ហាញការយកចិត្តទុកដាក់ និងការចាប់អារម្មណ៍ ចំពោះពួកគេដូចម្តេចខ្លះ?
ឱព្រះអម្ចាស់ សូមព្រះអង្គជួយទូលបង្គំ ឲ្យយកអសារអ្នកដែលបាក់ទឹកចិត្ត និងទន់ខ្សោយ ដើម្បីឲ្យពួកគេមានក្តីសង្ឃឹម ក្នុងព្រះអង្គជាថ្មី។
គម្រោងអានព្រះគម្ពីររយៈពេល១ឆ្នាំ : ១របាក្សត្រ ២៥-២៧ និង យ៉ូហាន ៩:១-២៣