ព្រឹក
ស្រឡាញ់អ្នកដទៃ ដោយអធិស្ឋានឲ្យពួកគេ
ដោយJames Banks
July 1, 2025
១សាំយ៉ូអែល ១២:១៩-២៥
មួយទៀត ចំណែកឯខ្លួនខ្ញុំវិញ សូមកុំឲ្យខ្ញុំធ្វើបាបចំពោះព្រះយេហូវ៉ា ដោយលែងអធិស្ឋានឲ្យអ្នករាល់គ្នា។ ១សាំយ៉ូអែល ១២:២៣
ថ្ងៃមួយ មិត្តភក្តិរបស់ខ្ញុំ ឈ្មោះ រ៉ាហ៊ីម(Rahim) បានប្រាប់ខ្ញុំថា គាត់មិនដឹងថា ជីវិតគាត់នឹងទៅជាយ៉ាងណាទេ ក្នុងពេលសព្វថ្ងៃ បើសិនជាម្តាយរបស់គាត់ មិនបានអធិស្ឋានឲ្យគាត់ កាលប៉ុន្មានឆ្នាំមុន។ គាត់គិតថា គាត់ប្រហែលមិនមានជីវិតរស់ផង។ គាត់ជាអតីតអ្នកញៀនថ្នាំ ដែលបានជាប់គុក ដោយសារការជួញដូរថ្នាំញៀន។ នៅក្នុងការជួបគ្នាញាំកាហ្វេ នៅថ្ងៃមួយនោះ គាត់ក៏បានចែកចាយ អំពីការផ្លាស់ប្តូរដែលបានកើតមានក្នុងជីវិតគាត់ ដោយសារម្តាយគាត់បានអធិស្ឋានឲ្យគាត់។ គាត់ប្រាប់ខ្ញុំថា “ទោះខ្ញុំបានធ្វើឲ្យគាត់ខកចិត្តខ្លាំងយ៉ាងណាក៏ដោយ ក៏គាត់នៅតែបន្តបង្ហាញសេចក្តីស្រឡាញ់ដល់ខ្ញុំ ដោយអធិស្ឋានឲ្យខ្ញុំ។ ខ្ញុំបានបង្ករឿងច្រើន តែបើគាត់មិនបានអធិស្ឋានឲ្យខ្ញុំទេ ខ្ញុំដឹងថា ខ្ញុំនឹងជួបរឿងអាក្រក់ជាងនេះទៀត”។
បទគម្ពីរសញ្ញាចាស់ដែលបានចែងអំពីហោរា សាំយូអែល បានពិពណ៌នាអំពីរឿងរបស់មនុស្សម្នាក់ដែលបានបង្ហាញចេញនូវចិត្តស្មោះត្រង់ ចំពោះព្រះនិងអ្នកដទៃ តាមរយៈការអធិស្ឋាន។ នៅថ្ងៃដែលស្តេចសូលបានទទួលពិធីឡើងគ្រងរាជជាស្តេច នៅទីក្រុងម៊ីសផាស ហោរា សាំយូអែលមានការខកចិត្តយ៉ាងខ្លាំង។ ពួកបណ្តាជនមានការជឿទុកចិត្ត និងមានក្តីសង្ឃឹមដល់ស្តេច ជាជាងទុកចិត្ត និងសង្ឃឹមដល់ព្រះ។
ខណៈពេលដែលពួកបណ្តាជនជួបជុំគ្នា ព្រះទ្រង់ក៏បានបង្ហាញការមិនសព្វព្រះទ័យ តាមរយៈខ្យល់ព្យុះខុសរដូវមួយ ដែលធ្វើឲ្យពួកគេមានការភ័យខ្លាច និងមានការស្តាយក្រោយ ចំពោះការសម្រេចចិត្តរបស់ពួកគេ (១សាំយ៉ូអែល ១២:១៦-១៨)។ នៅពេលដែលពួកគេអង្វរហោរា សាំយូអែល ឲ្យអធិស្ឋានទូលអង្វរឲ្យពួកគេ គាត់ក៏បានឆ្លើយតបថា សូមកុំឲ្យគាត់ធ្វើបាបចំពោះព្រះអម្ចាស់ ដោយលែងអធិស្ឋានឲ្យពួកគេឡើយ (ខ.២៣)។
ការឆ្លើយតបរបស់ហោរា សាំយូអែល បានក្រើនរំឭកយើងថា ការអធិស្ឋានឲ្យអ្នកដទៃ ជួយឲ្យយើងយកព្រះជាទីមួយក្នុងចិត្ត និងជីវិតរបស់យើង។ ពេលណាយើងស្រឡាញ់អ្នកដទៃ ដោយអធិស្ឋានឲ្យពួកគេ យើងនឹងបានឃើញព្រះអង្គធ្វើកិច្ចការ ដែលមានតែព្រះអង្គទេអាចធ្វើបាន។ ហើយយើងក៏មិនចង់បាត់បង់ឱកាស មើលឃើញព្រះអង្គធ្វើការក្នុងជីវិតយើង និងអ្នកដទៃ តាមរយៈការអធិស្ឋានឡើយ។—JAMES BANKS
តើការអធិស្ឋានជាទៀងទាត់បានជួយអ្នក ឲ្យយកព្រះជាទីមួយ ដូចម្តេចខ្លះ?
តើអ្នកនឹងអធិស្ឋានឲ្យអ្នកដទៃ នៅថ្ងៃនេះ ដូចម្តេចខ្លះ?
ឱព្រះអង្គសង្គ្រោះដ៏មានចេស្តា ទូលបង្គំសូមអរព្រះគុណព្រះអង្គ ដែលបានអធិស្ឋានទូលអង្វរឲ្យទូលបង្គំ។
សូមព្រះអង្គជួយទូលបង្គំឲ្យយកគំរូតាមព្រះអង្គ ក្នុងការស្រឡាញ់អ្នកដទៃ ដោយអធិស្ឋានឲ្យពួកគេនៅថ្ងៃនេះ។
VISIT ODBU.ORG/SF120 TO LEARN HOW CONSISTENT PRAYER CAN GROW YOUR RELATIONSHIP WITH GOD.
គម្រោងអានព្រះគម្ពីររយៈពេល១ឆ្នាំ : យ៉ូប ២០-២១ និង កិច្ចការ ១០:២៤-៤៨
ប្រភេទ
ល្ងាច
ព្រះអង្គអង្វរឲ្យយើង (សៀវភៅសេចក្ដីពិតសម្រាប់ជីវិត)
ដោយAlistair Begg
July 1, 2025
«ដូច្នេះ ម៉ូសេ ត្រឡប់ទៅឯព្រះយេហូវ៉ាទូលថា បណ្តាជននេះបានធ្វើបាបធ្ងន់ណាស់ហើយ គឺគេបានធ្វើព្រះពីមាសសម្រាប់ខ្លួនគេ។ តែឥឡូវនេះ សូមទ្រង់អត់ទោសចំពោះអំពើបាបរបស់គេផង ពុំនោះសោត សូមលុបឈ្មោះទូលបង្គំពីបញ្ជីដែលទ្រង់បានកត់ទុកចេញដែរ» (និក្ខមនំ ៣២:៣១-៣២)។
កាលព្រះអម្ចាស់រំដោះរាស្ត្រអ៊ីស្រាអែលឲ្យរួចពីភាពជាទាសករ ព្រះអង្គបានបង្គាប់ពួកគេឲ្យទៅជួបជនជាតិអេស៊ីព្ទជាអតីតម្ចាស់ដី និងជាអតីតម្ចាស់របស់ពួកគេ ដើម្បីសុំមាស ប្រាក់ និងក្រណាត់សម្រាប់យកទៅជាមួយក្នុងការធ្វើដំណើរឆ្លងចូលទៅទឹកដីសន្យា។ សម្ភារៈទាំងអស់នេះមានប្រយោជន៍នៅក្នុងការសាងសង់រោងឧបោសថ ជាកន្លែងដែលព្រះអម្ចាស់ប្រើ ដើម្បីគង់នៅក្នុងចំណោមរាស្ត្រព្រះអង្គ។
កាលព្រះអម្ចាស់ត្រាស់ហៅលោក ម៉ូសេ ឲ្យឡើងភ្នំស៊ីណាយ ដើម្បីជួបព្រះអង្គ នោះពួកអ៊ីស្រាអែលបានធ្វើដំណើរមិនទាន់បានឆ្ងាយប៉ុន្មានទេ។ ទោះជាយ៉ាងណាក៏ដោយ នៅពេលដែលលោក ម៉ូសេ បានឡើងទៅយូរពេកខុសពីការរំពឹងគិតរបស់ពួកបណ្តាជន ពួកគេបាត់បង់ការអត់ធ្មត់ ហើយក៏បានទាមទារលោក អើរ៉ុន ជាបងប្រុសលោក ម៉ូសេ ឲ្យធ្វើរូបព្រះសម្រាប់នាំមុខពួកគេ (និក្ខមនំ ៣២:១)។ ដូចនេះ លោក អើរ៉ុន ក៏បានប្រាប់ពួកគេថា «ចូរដោះក្រវិលមាសពីត្រចៀកប្រពន្ធ និងកូនប្រុសកូនស្រីឯងរាល់គ្នាយកមកឲ្យអញ» ហើយគាត់ក៏បានយកគ្រឿងទាំងអស់នោះទៅធ្វើជារូបកូនគោមាស ហើយគេក៏បានប្រកាសថា «នែ ពួកអ៊ីស្រាអែលអើយ នេះហើយជាព្រះនៃឯង» (ខ.២, ៤)។ ព្រះអង្គបានប្រទានឲ្យពួកគេនូវអ្វីដែលខ្លួនត្រូវការក្នុងកិច្ចការដែលព្រះអង្គត្រាស់ហៅឲ្យពួកគេធ្វើ តែផ្ទុយទៅវិញ ពួកគេក៏បានប្រើអំណោយរបស់ព្រះអង្គក្នុងផ្លូវខុស ដើម្បីដេញតាមសេចក្តីប៉ងប្រាថ្នារបស់ខ្លួន និងថ្វាយបង្គំព្រះក្លែងក្លាយដែលពួកគេបានបង្កើត។ យើងប្រហែលមិនមែនកំពុងតែធ្វើរូបកូនគោមាសនោះទេ ប៉ុន្តែ យើងក៏មិនអាចមានភាពស៊ាំ នឹងការប្រព្រឹត្តតាមគំរូរបស់ពួកគេ ដោយប្រើអ្វីៗដែលព្រះអង្គបានប្រទានមក ដោយព្រះគុណព្រះអង្គ។
នៅពេលដែលលោក ម៉ូសេ ចុះពីលើភ្នំមកវិញ គាត់មានការពិបាកចិត្តយ៉ាងខ្លាំង ចំពោះអ្វីដែលគាត់បានឃើញពួកគេធ្វើ។ គាត់ក៏បានក្រាបផ្កាប់មុខដល់ដីនៅចំពោះព្រះអម្ចាស់ ដើម្បីទូលអង្វរឲ្យរាស្ត្រព្រះអង្គ ជាពិសេសគាត់បានទូលព្រះអង្គក្នុងន័យថា ព្រះអង្គជាព្រះ ដែលបានតាំងសេចក្តីសញ្ញាជាមួយរាស្ត្ររបស់ព្រះអង្គ។ សូមព្រះអង្គរក្សាសេចក្តីសញ្ញារបស់ព្រះអង្គ! យើងខ្ញុំបានយករបស់អ្វីដែលព្រះអង្គប្រទាន ទៅប្រើក្នុងផ្លូវខុស ដោយធ្វើរូបព្រះក្លែងក្លាយ តែសូមព្រះអង្គកុំបោះបង់យើងខ្ញុំចោលឡើយ។ សូមព្រះអង្គកុំបោះបង់ស្នាព្រះហស្តរបស់ព្រះអង្គ (និក្ខមនំ ៣២:១១-១៣)។
អ្វីដែលគួរឲ្យកត់សម្គាល់នោះគឺលោក ម៉ូសេ មិនមានកំហុសសោះក្នុងរឿងនោះ តែគាត់បានព្រមទទួលកំហុសជាមួយពួកបណ្តាជន។ អ្វីដែលកាន់តែគួរឲ្យកត់សម្គាល់នោះ គាត់ថែមទាំងស្ម័គ្រចិត្ត ឲ្យព្រះអង្គលុបឈ្មោះគាត់ចេញពីបញ្ជីឈ្មោះរាស្ត្រព្រះអង្គ បើសិនជាព្រះអម្ចាស់មិនលើកលែងឲ្យពួកគេ។
នៅក្នុងការទូលអង្វររបស់លោក ម៉ូសេ យើងអាចសង្កេតឃើញរឿងដែលនឹងសម្រេច នៅក្នុងគ្រាសញ្ញាថ្មី។ ព្រះអម្ចាស់មិនមែនជាអ្នកធ្វើការមិនចប់ចុងចប់ដើម នៅក្នុងការដោះស្រាយបញ្ហាជាមួយរាស្ត្រព្រះអង្គនោះឡើយ។ ព្រះគ្រីស្ទបានទូលអង្វរឲ្យយើង ហើយព្រះអង្គសម្រេចព្រះបន្ទូលសន្យាទាំងអស់ (២កូរិនថូស ១:២០)។ អាចនិយាយម្យ៉ាងទៀតថា ព្រះបន្ទូលដែលបានសន្យាថា ព្រះអង្គនឹងរក្សារាស្ត្រព្រះអង្គ ហើយសម្រេចកិច្ចការដែលព្រះអង្គបានចាប់ផ្តើមក្នុងពួកគេ គឺជាព្រះបន្ទូលដែលបានសម្រេចក្នុងព្រះយេស៊ូវ។
យើង «ងាយនឹងវង្វេងចេញពីព្រះអង្គ» ហើយក៏ «ងាយនឹងចាកចេញពីព្រះដែលយើងស្រឡាញ់»1។ យើងជាមនុស្សដែលយករបស់អ្វីដែលព្រះបានប្រទានទៅបង្កើតរូបព្រះសម្រាប់ថ្វាយបង្គំ។ យើងត្រូវការអ្នកទូលអង្វរឲ្យយើង ហើយយើងមានអ្នកទូលអង្វរនោះហើយ! គឺព្រះអម្ចាស់យេស៊ូវដែលបានសុគតជំនួសយើង ដើម្បីឲ្យយើងអាចទទួលការអត់ទោសបាប។ ពេលណាយើងសារភាពបាបរបស់យើង នៅចំពោះព្រះយេស៊ូវ គឺយើងកំពុងចូលទៅរកព្រះ ដែលបានអង្វរឲ្យយើងរួចរាល់ហើយ។ សូមឲ្យសេចក្តីស្រឡាញ់ដ៏អស្ចារ្យដែលព្រះអង្គមានចំពោះលោកអ្នក បាននាំចិត្តលោកអ្នក ចេញពីការវង្វេងតាមការថ្វាយបង្គំរូបព្រះ ហើយវិលមករកការប្រើប្រាស់អ្វីៗទាំងអស់ដែលអ្នកមាន ដើម្បីបម្រើព្រះ ដែលបានប្រទានអ្វីៗដែលអ្នកត្រូវការ។
ព្រះគម្ពីរសញ្ជឹងគិត៖ យ៉ាកុប ៤:៤-១០
គម្រោងអានព្រះគម្ពីររយៈពេល១ឆ្នាំ៖ ចោទិយកថា ១៣-១៥ និង កិច្ចការ ៤:១-២២