ព្រឹក
មើលទៅអ្នកដទៃ តាមដួងព្រះទ័យរបស់ព្រះ
ដោយMonica Larose
August 22, 2025
ទំនុកដំកើង ១៤៦
ព្រះយេហូវ៉ាទ្រង់លើកអស់អ្នកដែលត្រូវឱន ឲ្យត្រង់ឡើងវិញ។ ទំនុកដំកើង ១៤៦:៨
ក្នុងពិធីខួបកំណើតរបស់ ចាន់ថេល(Chantale) គំរប់អាយុ១៣ឆ្នាំ បន្ទាប់ពីការអបអរដ៏រីករាយ បានប៉ុន្មានម៉ោង ក្នុងភូមិកំណើតដ៏ស្ងប់ស្ងាត់របស់គាត់ សម្លេងបាញ់កាំភ្លើងក៏បានលាន់ឮ ដោយបំផ្លាញបរិយាកាសដ៏សុខសាន្តនៅពេលល្ងាចនោះ។ ចាន់ថេល និងបងប្អូនបង្កើតរបស់គាត់ បានរត់ចូលក្នុងព្រៃ តាមបញ្ជារបស់ម្តាយរបស់ពួកគេ ឲ្យប្រញាប់លាក់ខ្លួន។ ពួកគេបានផ្តុំគ្នា នៅក្រោមជម្រកនៃដើមឈើមួយដើម ពេញមួយយប់។ ចាន់ថេលបាននឹកចាំថា “ថ្ងៃបានរះនៅពេលព្រឹកបន្ទាប់ ប៉ុន្តែ យើងមិនឃើញឪពុកម្តាយរបស់យើងទេ”។ ចាន់ថេល និងបងប្អូនបង្កើតរបស់គាត់ បានក្លាយជាក្មេងកំព្រា និងជនភៀសខ្លួន ដោយចូលរួមជាមួយមនុស្សរាប់ពាន់នាក់ទៀត ក្នុងជំរុំជនភៀសខ្លួន។
ពេលដែលណាយើងបានឮរឿងដ៏កំសត់ ដូចរឿងរបស់ចាន់ថេល យើងអាចជួបការល្បួងឲ្យងាកបែរចេញពីការបាត់បង់ដ៏លើសលប់នេះ។ ប៉ុន្តែ អស់អ្នកដែលជឿព្រះនៃព្រះគម្ពីរប៊ីប គឺជាអ្នកជឿព្រះមួយអង្គ ទ្រង់មិនដែលបែព្រះភក្ត្រចេញពីទុក្ខវេទនារបស់មនុស្សទេ តែព្រះអង្គ “ការពារពួកអ្នកប្រទេសដទៃ ទ្រង់ទប់ទល់ពួកកូនកំព្រា នឹងស្រីមេម៉ាយ”(ទំនុកដំកើង ១៤៦:៩)។
ព្រះដែលបានបង្កើតផ្ទៃមេឃ និងផែនដី ទ្រង់មានព្រះទ័យស្មោះត្រង់ជារៀងរហូត(ខ.៦) ហើយព្រះអង្គតែងតែ “សំរេចសេចក្ដីសុចរិតដល់ពួកអ្នកដែលត្រូវគេសង្កត់សង្កិន ក៏ប្រទានអាហារដល់អស់អ្នកដែលឃ្លានដែរ”(ខ.៧)។
ចាន់ថេល ហ្ស៊ូហ្ស៊ី(Chantale Zuzi) បានក្លាយជាអ្នកដឹកនាំម្នាក់ ដែលបានបង្កើតអង្គការមួយ ដើម្បីអប់រំក្មេងស្រីជាជនភៀសខ្លួន។ គាត់បានចែកចាយថា បទពិសោធន៍របស់គាត់ បានបង្រៀនគាត់ថា “នរណាក៏អាចក្លាយជាជនភៀសខ្លួន ជាអ្នកដែលបានបាត់បង់ទីកន្លែងដ៏សុខសាន្ត ដែលពួកគេធ្លាប់មាន”។
សូមឲ្យការឆ្លើយតបរបស់យើង ចំពោះអ្នកដែលបានបាត់បង់កន្លែងដ៏សុខសាន្ត បានឆ្លុះបញ្ចាំងអំពីដួងព្រះទ័យរបស់ព្រះ ដែលតែងតែធ្វើជា “ទីពឹងជ្រក ដល់អស់អ្នកណាដែលត្រូវគេសង្កត់សង្កិន គឺជាទីពឹងនៅគ្រាលំបាក”(៩:៩) និង “លើកអស់អ្នកដែលត្រូវឱន ឲ្យត្រង់ឡើងវិញ”(១៤៦:៨)។—Monica La Rose
តើអ្នក ឬនរណាម្នាក់ដែលអ្នកស្គាល់ បានបាត់បង់កន្លែងដ៏សុខសាន្ត ដោយរបៀបណា?
តើព្រះទ្រង់អាចធ្វើការ តាមរយៈបទពិសោធន៍ដ៏ជូរចត់នេះ ដូចម្តេចខ្លះ?
ឱព្រះដ៏ស្មោះត្រង់ ទូលបង្គំសូមអរព្រះគុណព្រះអង្គ ដែលបានធ្វើជាទីជ្រកកោន
សម្រាប់មនុស្សទាំងអស់ដែលឈឺចាប់។ សូមព្រះអង្គជួយទូលបង្គំឲ្យបង្ហាញគេឲ្យស្គាល់ព្រះទ័យរបស់ព្រះអង្គ។
For further study, read Broken Down Cars: Grieving with those Who Grieve at DiscoverODB.org.
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១១០-១១២ និង ១កូរិនថូស ៥
ប្រភេទ
ល្ងាច
រកឃើញព្រះ ពេលដែលជីវិតធ្លាក់ដល់ចំណុចសូន្យ (សៀវភៅសេចក្ដីពិតសម្រាប់ជីវិត)
ដោយAlistair Begg
August 22, 2025
«ហើយក៏យកគាត់ទៅដាក់គុក... តែព្រះយេហូវ៉ាទ្រង់គង់ជាមួយនឹងយ៉ូសែប ហើយក៏ផ្តល់សេចក្តីសប្បុរសដល់គាត់ ព្រមទាំងធ្វើឲ្យមេភូឃុំអាណិតមេត្តាដល់គាត់ផង»(លោកុប្បត្ដិ ៣៩:២០-២១)។
បន្ទាប់ពីប្រពន្ធរបស់លោក ប៉ូទីផារ បានចោទប្រកាន់លោក យ៉ូសែប ដោយអយុត្តិធម៌ ជីវិតរបស់គាត់បានធ្លាក់ដល់ចំណុចសូន្យសារជាថ្មីទៀត។ កាលពីមុន គេកាត់ទោសគាត់ ដោយទម្លាក់គាត់ចូលក្នុងរណ្តៅ តែលើកនេះ គេកាត់ទោសគាត់ឲ្យជាប់គុកងងឹត។ គាត់ក៏បានធ្លាក់ចូលក្នុងស្ថានភាពដ៏អស់សង្ឃឹម។
ប៉ុន្តែ ក្នុងនាមគាត់ជាមនុស្សដែលតាមព្រះហឫទ័យព្រះ និងជាមនុស្សមានគោលការណ៍ គាត់ក៏បានបង្ហាញចេញនូវចិត្តអត់ធ្មត់ក្នុងការស៊ូទ្រាំទុក្ខលំបាក។ គាត់បានរត់គេចពីការល្បួងរបស់ប្រពន្ធរបស់លោក ប៉ូទីផារ ដោយការប្រកាន់គោលជំហរច្បាស់លាស់ក្នុងការសម្រេចចិត្ត ផ្អែកទៅលើមូលដ្ឋានគ្រឹះនៃសេចក្តីបរិសុទ្ធ និងភាពត្រឹមត្រូវ។ ជាការពិតណាស់ លោក យ៉ូសែប បានកោតខ្លាចព្រះ លើសជាងគុកងងឹត។ គាត់មិនព្រមផិតក្បត់ជាមួយប្រពន្ធរបស់លោក ប៉ូទីផារ ព្រោះការប្រព្រឹត្តដូចនេះគឺជាអំពើបាបទាស់នឹងព្រះ។ សម្រាប់លោក យ៉ូសែប គាត់មិនចាំបាច់ត្រូវគិតច្រើនទេ ការដឹងដូចនេះ គឺគ្រប់គ្រាន់ល្មមនឹងធ្វើជាមូលដ្ឋានសម្រាប់ការសម្រេចចិត្តរបស់គាត់។
ការមានផ្នត់គំនិតដូចនេះ នឹងនាំឲ្យយើងដើរតាមផ្លូវចង្អៀត។ ភាពស្មោះត្រង់ពិតប្រាកដកើតចេញពីការប្រកាន់ខ្ជាប់តាមគោលការណ៍ មិនមែនបត់បែនតាមទិដ្ឋភាពជាក់ស្តែងនោះទេ។ វាជាការសម្រេចចិត្ត ដោយចិត្តស្ងប់ ដោយជៀសចេញពីការបង្វែងអារម្មណ៍។ វាជាការសម្រេចចិត្ត ដោយមិនខ្លាចលទ្ធផល។ វាជាការប្ដេជ្ញាចិត្តធ្វើជាបុរស និងស្ត្រីរបស់ព្រះ ដោយដឹងអំពីរបៀបឆ្លើយតប នៅពេលដែលបាបបានដាក់សម្ពាធខ្លាំងបំផុត ឬនៅពេលដែលអ្វីៗដួលរំលំមកលើយើង។
ខណៈពេលដែលលោក យ៉ូសែប បានរងទ្រាំនឹងទុក្ខវេទនាយ៉ាងអយុត្តិធម៌ ព្រះអម្ចាស់បានបង្ហាញសេចក្តីស្រឡាញ់របស់ព្រះអង្គដល់គាត់ ដោយបណ្តាលចិត្តមេគុកឲ្យស្រឡាញ់គាត់។ ព្រះគម្ពីរប៊ីបមិនបានចែងថា លោក យ៉ូសែប បានព្យាយាមកេងចំណេញពីកាលៈទេសៈ ដើម្បីសម្រេចគោលបំណងរបស់គាត់នោះទេ។ ហើយបើគាត់ស្វែងរកមិត្តភក្តិ ឬសម្ព័ន្ធមិត្តណាម្នាក់នៅទីនោះ គាត់នឹងមិននឹកស្មានថា មេគុកនឹងធ្វើជាមិត្តភក្តិរបស់គាត់នោះទេ។ ប៉ុន្តែ ព្រះអម្ចាស់មានគំនិតផ្សេងពីនេះ។ ព្រះវត្តមានរបស់ព្រះអម្ចាស់បាននៅជាប់នឹងរាស្រ្តព្រះអង្គ សូម្បីតែនៅក្នុងកាលៈទេសៈដែលធ្ងន់ធ្ងរបំផុតក៏ដោយ។
ពីមួយពេលទៅមួយពេល យើងរាល់គ្នាមានអារម្មណ៍ថា យើងហាក់ដូចជាកំពុងជាប់ក្នុងគុកងងឹត ឬធ្លាក់ដល់ចំណុចសូន្យ ហើយស្ថិតនៅក្នុងភាពឯកោ។ អ្នកប្រហែលមានអារម្មណ៍ដូចនេះ នៅថ្ងៃនេះ។ អ្នកប្រហែលក្លាយជាជនរងគ្រោះនៃការចោទប្រកាន់ ដោយអយុត្តិធម៌ ឬកំពុងតែគិតអំពីការលះបង់នៅក្នុងការប្ដេជ្ញាចិត្តស្តាប់បង្គាប់ព្រះអម្ចាស់។ ពុំនោះទេ បញ្ហាអ្វីផ្សេងទៀត កំពុងតែសង្កត់មកលើវិញ្ញាណដ៏ហត់នឿយរបស់អ្នក មិនខុសពីលោក យ៉ូសែប ទេ។ ទោះយើងជួបបញ្ហាអ្វីក៏ដោយ ព្រះអម្ចាស់តែងតែជ្រាបជានិច្ច។ គ្មានរឿងអ្វីកើតឡើង ដោយព្រះអង្គមិនបានដឹងជាមុននោះទេ ហើយព្រះអង្គស្រឡាញ់អ្នក ដោយសេចក្តីស្រឡាញ់ដ៏ស្ថិតស្ថេរ។ សេចក្តីស្រឡាញ់របស់ព្រះអង្គមិនប្រែប្រួល ហើយមិនផ្លាស់ប្តូរទៅតាមកាលៈទេសៈនោះទេ។ ព្រះអង្គស្រឡាញ់អ្នកខ្លាំងល្មមនឹងឲ្យព្រះអង្គឆ្លងកាត់គុកងងឹតនៃសេចក្តីស្លាប់ និងភាពគួរឲ្យភ័យខ្លាចនៃស្ថាននរក ដើម្បីកុំឲ្យយើងចាំបាច់ត្រូវឆ្លងកាត់។ ចូរទទួលយកការកម្សាន្តចិត្តពីព្រះបន្ទូលដែលហោរា សាការី បានប្រកាសថា «អ្នកណាដែលពាល់ឯងរាល់គ្នា នោះគឺជាពាល់ដល់ប្រស្រីព្រះនេត្រនៃទ្រង់ហើយ»(សាការី ២:៨)។
ព្រះគម្ពីរសញ្ជឹងគិត៖ លូកា ៨:២២-៣៩
គម្រោងអានព្រះគម្ពីររយៈពេល១ឆ្នាំ៖ ទំនុកតម្កើង ១១០-១១២ និង២កូរិនថូស ១