ព្រឹក
ការលះបង់សម្ភារៈនិយម
ដោយadamholz
November 12, 2025
១ពេត្រុស ១:៣-៩,១៣
តាមសេចក្ដីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបានសេចក្ដីសង្ឃឹមដ៏រស់ ដោយសារព្រះយេស៊ូវគ្រីស្ទ ទ្រង់រស់ពីស្លាប់ឡើងវិញ។ ១ពេត្រុស ១:៣
រៀងរាល់រដូវស្លឹកឈើជ្រុះ ក្នុងវ័យយុវជន ជីដូនរបស់ខ្ញុំតែងតែទទួលបានសៀវភៅកាតាឡុកវត្ថុអនុស្សាវរីយ៍សម្រាប់ថ្ងៃណូអែល។ ខ្ញុំក៏បានប្រញាប់បើកមើលសៀវភៅនោះភ្លាមៗ ដោយចិត្តរីករាយ ដើម្បីមើលរូបភាពទំនិញជាច្រើន ដែលបានទាក់ទាញចំណាប់អារម្មណ៍របស់ខ្ញុំយ៉ាងខ្លាំង។
សព្វថ្ងៃនេះ រូបភាពប្រភេទនោះបានលេចឡើងនៅលើកញ្ចក់ទូរស័ព្ទឆ្លាតវ័យរបស់យើង ជារៀងរាល់ថ្ងៃ ដែលកម្មវិធីបណ្ដាញសង្គមបានជ្រើសរើសសម្រាប់យើងរៀងៗខ្លួន ទៅតាមចំណង់ចំណូលចិត្ត ធ្វើឲ្យយើងស្រមៃ និងសង្ឃឹមថានឹងទទួលបានពួកវាជាកម្មសិទ្ធិ។ យើងងាយនឹងលង់ខ្លួន នៅក្នុងការមើលទំនិញទាំងអស់នោះ។ ថ្មីៗនេះ អ្នកជំនាញបាន ហៅបាតុភូតឌីជីថលនេះថា ការបង្អូសនៃក្តីស្រមៃ។ ការស្ទង់មតិមួយ ដែលធ្វើឡើងដោយកម្មវិធី OnePoll បានចង្អុលបង្ហាញថា ជាមធ្យមអ្នកប្រើប្រាស់ទូរស័ព្ទឆ្លាតវ័យរបស់អាមេរិក បានចំណាយពេលអូសមើលរូបភាពក្នុងទូរស័ព្ទរបស់ខ្លួន រយៈពេល២ម៉ោង ក្នុងមួយថ្ងៃ។ រូបភាពដែលទាក់ទាញអារម្មណ៍យើង បាននាំឲ្យយើងសង្ឃឹម ឬជឿថា បើយើងទទួលបានទំនិញមួយនេះ យើងនឹងមានការសប្បាយចិត្តយ៉ាងខ្លាំង។
ប៉ុន្តែ ព្រះគម្ពីរប៊ីបបានបង្រៀនយើងឲ្យប្រព្រឹត្តផ្ទុយពីនេះ ដោយបានអញ្ជើញយើងឲ្យលះបង់សម្ភារៈនិយម។ ក្នុងបទគម្ពីរ ១ពេត្រុស ១:៣-៤ យើងឃើញថា “តាមសេចក្ដីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបានសេចក្ដីសង្ឃឹមដ៏រស់ ដោយសារព្រះយេស៊ូវគ្រីស្ទ ទ្រង់រស់ពីស្លាប់ឡើងវិញ ហើយឲ្យយើងបានមរដក ដែលមិនចេះពុករលួយ ក៏ឥតសៅហ្មង ហើយមិនដែលស្រពោនឡើយ”។ ត្រង់ចំណុចនេះ សាវ័កពេត្រុសបានបង្ហាញភាពផ្ទុយគ្នារវាងការស្រេកឃ្លានចង់បានរបស់ទ្រព្យមិនស្ថិតស្ថេរ និងភាពស្កប់ស្កល់ដែលយើងនឹងមាន តាមព្រះបន្ទូលសន្យា ពេលណាយើងទុកដាក់ក្តីសង្ឃឹមយើង ក្នុងព្រះគុណរបស់ព្រះ។ បន្ទាប់មក គាត់ក៏បានបង្រៀនទៀតថា “ចូរក្រវាត់គំនិតអ្នករាល់គ្នាឲ្យមាំមួនចុះ ទាំងដឹងខ្លួន ហើយឲ្យមានសេចក្ដីសង្ឃឹមគ្រប់ជំពូក ដល់ព្រះគុណដែលត្រូវផ្ដល់មកដល់អ្នករាល់គ្នា ក្នុងកាលដែលព្រះយេស៊ូវគ្រីស្ទទ្រង់លេចមកផង”(ខ.១៣)។
តើយើងម្នាក់ៗបានចំណាយពេលច្រើនម៉ោងជារៀងរាល់ថ្ងៃ ក្នុងការអូសមើលរូបភាពមុខទំនិញ ក្នុងបណ្ដាញសង្គម ដោយចិត្តចង់បំពេញក្តីស្រមៃដែរឬទេ? ចូរយើងទូលសូមព្រះអង្គជួយយើង ឲ្យរៀនពឹងផ្អែកលើព្រះអង្គ ដោយមានក្តីសង្ឃឹមដែលប្រសើរជាង និងមានសេចក្តីប្រាថ្នារកព្រះអង្គ។—Adam R. Holz
តើអ្នកកំពុងស្វែងរកអ្វីឲ្យពិតប្រាកដ នៅពេលដែលអ្នកបើកមើលបណ្ដាញសង្គម? តើមានអ្វីទាក់ទាញចិត្តអ្នក?
ឱព្រះវរបិតា លោកិយមានពេញដោយការសន្យា អំពីការស្កប់ចិត្ត។ តែទូលបង្គំមានក្តីសង្ឃឹម
ក្នុងព្រះអង្គ ដែលនឹងមិនខកចិត្តឡើយ។ សូមព្រះអង្គជួយទូលបង្គំ ឲ្យមានសង្ឃឹមដល់ព្រះអង្គនៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ : យេរេមា ៥១-៥២ និង ហេព្រើរ ៩
ល្ងាច
មូលហេតុដែលយើងអត់ទោសឲ្យគេ (សៀវភៅសេចក្ដីពិតសម្រាប់ជីវិត)
ដោយAlistair Begg
November 12, 2025
«ចូរមានចិត្តសប្បុរសនឹងគ្នាទៅវិញទៅមក ព្រមទាំងមានចិត្តទន់សន្ដោស ហើយអត់ទោសគ្នាដូចជាព្រះទ្រង់បានអត់ទោសឲ្យអ្នករាល់គ្នា ដោយព្រះគ្រីស្ទដែរ» (អេភេសូរ ៤:៣២)។
ការអត់ទោសបាបរបស់ព្រះ មិនគ្រាន់តែជាការបង្ហាញព្រះទ័យរបស់ព្រះអង្គ តែក៏ជាអ្វីដែលព្រះអង្គបានសន្យាក្នុងព្រះបន្ទូលផងដែរ។ ដូចនេះ ការដកពិសោធន៍ជាមួយការអត់ទោសបាបរបស់ព្រះ មានការជាប់ទាក់ទងដោយផ្ទាល់ជាមួយនឹងការស្ម័គ្រចិត្តជឿថា ព្រះអង្គនឹងធ្វើតាមព្រះបន្ទូលរបស់ព្រះអង្គ។
អ្នកនិពន្ធកណ្ឌគម្ពីរហេព្រើរបានពន្យល់ថា ការធានាអំពីការអត់ទោសបាបរបស់យើង មានការពឹងផ្អែកទាំងស្រុងទៅលើព្រះលោហិតរបស់ព្រះយេស៊ូវតែប៉ុណ្ណោះ (ហេព្រើរ ១០:១៩-២២)។ ជាងនេះទៅទៀត ពេលណាយើងចូលមករកព្រះដោយការប្រែចិត្ត ព្រះអង្គបានសន្យាថា ព្រះអង្គនឹងមិននឹកចាំពីអំពើបាបរបស់យើងទៀតទេ (ខ.១៧)។ ព្រះទ្រង់បានសន្យាច្បាស់ថា ព្រះអង្គនឹងមិនកត់ទុកអំពើបាបរបស់យើងទេ (អេសាយ ៤៣:២៥)។ អាចនិយាយម្យ៉ាងទៀតថា បើយើងព្យាយាមងាកបែរទៅរកព្រះអង្គវិញ ដោយនាំយកបញ្ហាដែលព្រះអង្គបានដោះស្រាយរួចហើយ នោះយើងត្រូវចាំថា ព្រះអង្គបានសន្យាថា ព្រះអង្គនឹងមិននឹកចាំអំពីបាបរបស់យើងទៀតទេ ហើយយើងក៏ត្រូវធ្វើដូចព្រះអង្គដែរ។
គំរូរបស់ព្រះអង្គ គឺសម្រាប់ឲ្យយើងយកតម្រាប់តាមក្នុងការអត់ទោសឲ្យអ្នកដទៃ។ ការអត់ទោសឲ្យអ្នកដទៃ មិនមែនជាអារម្មណ៍នោះទេ តែផ្អែកទៅលើព្រះបន្ទូលសន្យា និងមានការស្តាប់បង្គាប់។ នៅពេលដែលយើងអត់ទោសឲ្យនរណាម្នាក់ គឺយើងកំពុងធ្វើការសន្យាបីចំណុច។ ទីមួយ យើងនឹងមិនលើកយកបញ្ហានោះមកនិយាយជាមួយបុគ្គលនោះទៀតទេ។ ទីពីរ យើងក៏នឹងមិនលើកយកបញ្ហានោះមកនិយាយជាមួយអ្នកដទៃដែរ។ ហើយទីបី យើងនឹងមិនរំឭកខ្លួនយើងអំពីបញ្ហានោះទៀតឡើយ។ យើងបង្ហាញចេញនូវការអត់ទោសពិតប្រាកដ នៅពេលដែលយើងចង់អត់ទោសឲ្យគេ ដូចដែលព្រះទ្រង់បានអត់ទោសឲ្យយើងក្នុងព្រះគ្រីស្ទ។ ការនេះមិនមានន័យថា យើងត្រូវមានការអត់ទោសតែនៅក្នុងគំនិត និងការតាំងចិត្តប៉ុណ្ណោះទេ។ យើងក៏ត្រូវមានការអត់ទោសឲ្យគេចេញពីក្នុងចិត្តផងដែរ (ម៉ាថាយ ១៨:៣៥)។ ទោះជាយ៉ាងណាក៏ដោយ ការបង្ហាញចេញនូវការអត់ទោសពិតប្រាកដ កើតចេញពីការដឹងគុណព្រះគ្រីស្ទដែលបានអត់ទោសបាបឲ្យយើង គួបផ្សំនឹងការស្តាប់បង្គាប់តាមព្រះរាជបញ្ជារបស់ព្រះអង្គដែលបង្គាប់យើងឲ្យអត់ទោសឲ្យគេ។
តើមាននរណាខ្លះដែលអ្នកចាំបាច់ត្រូវអត់ទោសឲ្យ? អ្នកប្រហែលមិនមានអារម្មណ៍ចង់អត់ទោសឲ្យគេ នៅថ្ងៃនេះទេ ប៉ុន្តែទោះយើងមានអារម្មណ៍ ឬគ្មានអារម្មណ៍ ក្នុងនាមយើងជាអ្នកទទួលការអត់ទោសពីព្រះក្នុងព្រះគ្រីស្ទ ព្រះអង្គបានត្រាស់ហៅយើងឲ្យអត់ទោសឲ្យគេ ដូចដែលព្រះអង្គបានអត់ទោសឲ្យយើង។ យើងប្រហែលពិបាកអត់ទោសឲ្យគេ តែវាជាអ្វីដែលយើងអាចធ្វើបាន។ ព្រះវិញ្ញាណនៃព្រះអាចជួយអ្នកឲ្យសន្យាថា អ្នកនឹងអត់ទោសឲ្យគេ ហើយធ្វើតាមការសន្យានេះ។ ពេលណាអ្នកអត់ទោសឲ្យគេដោយការសន្យាដែលមានបីចំណុចនេះ ដោយការស្តាប់បង្គាប់តាមព្រះរាជបញ្ជារបស់ព្រះ ព្រះអង្គអាច ហើយនឹងធ្វើឲ្យអ្នកមានអារម្មណ៍ចង់អត់ទោសឲ្យគេ។
ខគម្ពីរសញ្ជឹងគិត៖ ម៉ាថាយ ១៨:២១-៣៥
គម្រោងអានព្រះគម្ពីររយៈពេល១ឆ្នាំ៖ ១របាក្សត្រ ៤-៦ និងលូកា ១:១-២០