ព្រឹក
ច្រៀងសរសើរព្រះ តាមព្រះគម្ពីរប៊ីប
ដោយAmy Boucher Pye
November 15, 2025
បទចម្រៀងសាឡូម៉ូន ១:១-៦
ឱពួកកូនស្រីនៃក្រុងយេរូសាឡិមអើយ ខ្ញុំខ្មៅ តែល្អគួរសម។ បទចម្រៀងសាឡូម៉ូន ១:៥
នៅក្នុងការសិក្សាព្រះបន្ទូលប្រចាំថ្ងៃ ជូលី(Julie) បានចាប់ផ្តើមច្រៀង ដោយប្រើខគម្ពីរដែលគាត់បានអាន ធ្វើជាទំនុកច្រៀង។ គាត់ថា “នៅពេលដែលខ្ញុំបានច្រៀង ចិត្ត និងគំនិតខ្ញុំក៏បានចាប់ផ្តើមធ្វើ និងជឿលើអ្វីដែលខ្ញុំកំពុងច្រៀង”។ តាមរយៈការច្រៀង ដោយមានព្រះបន្ទូលព្រះធ្វើជាទំនុកច្រៀង ជូលីចង់ឲ្យសេចក្តីពិតរបស់ព្រះអង្គ ចែងចាំងពន្លឺមកលើចំណុចដែលគាត់មិនចូលចិត្តនៅក្នុងខ្លួនគាត់ ដូចជាសម្លេង និងកម្ពស់របស់គាត់ជាដើម។
គាត់ថា “ខ្ញុំបានចាប់ផ្តើមច្រៀងតាមបទគម្ពីរ បទចម្រៀងសាឡូម៉ូន ១:៥ ថា ខ្ញុំខ្មៅ តែល្អគួរសម”។ ក្នុងសង្គមដែលប្រជាជនភាគច្រើនប្រកបរបរកសិកម្ម ស្រ្តីដែលមានសម្បុរខ្មៅ ដោយសារត្រូវពន្លឺថ្ងៃច្រើន មិនត្រូវបានគេមើលឃើញថា មានរូបសម្រស់ស្អាតនោះទេ។ តាមរយៈការច្រៀង តាមបទគម្ពីរនេះ ព្រះទ្រង់ក៏បានកែប្រែការគិតរបស់គាត់។ ភ្លាមៗនោះ គាត់ក៏បានយល់ដឹងថា “ព្រះទ្រង់ស្រឡាញ់ខ្ញុំ ទោះខ្ញុំមិនល្អឥតខ្ចោះក៏ដោយ”។
ជូលី ក៏បានច្រៀងតាមបទកំណាព្យដ៏ពីរោះ ដែលបានកត់ទុកក្នុងអក្សរសាស្រ្តនៃប្រាជ្ញាក្នុងព្រះគម្ពីរសញ្ញាចាស់។ អ្នកខ្លះបានកាត់ស្រាយថា កណ្ឌគម្ពីរបទចម្រៀងសាឡូម៉ូន គឺជាការពិពណ៌នាក្នុងន័យធៀប អំពីសេចក្តីស្រឡាញ់របស់ព្រះ ចំពោះរាស្រ្តរបស់ទ្រង់ តែមនុស្សជាច្រើនយល់ឃើញថា បទគម្ពីរនេះជាការអបអរសេចក្តីស្រឡាញ់របស់ប្តីប្រពន្ធមួយគូរ។ នៅពេលយើងឃើញប្តីប្រពន្ធមួយគូរនោះមានការប្ដេជ្ញាចិត្តចំពោះគ្នា យើងអាចនិយាយតាមមិត្តសំឡាញ់របស់ពួកគេថា “យើងខ្ញុំនឹងមានចិត្តអំណរ ហើយរីករាយក្នុងអង្គទ្រង់ យើងខ្ញុំនឹងនឹកចាំពីសេចក្ដីស្រឡាញ់របស់ទ្រង់ ជាជាងស្រាទំពាំងបាយជូរ”(ខ.៤)។
ទោះជាយ៉ាងណាក៏ដោយ ពេលយើងសិក្សាខគម្ពីរពីរបុរាណនេះ យើងក៏អាចដឹងច្បាស់ដូចជូលីផងដែរថា ព្រះទ្រង់មានព្រះទ័យរីករាយ នៅក្នុងរាស្រ្តដែលព្រះអង្គបានជ្រើសរើស។ គឺដូចដែលព្រះអង្គមានបន្ទូលក្នុងបទគម្ពីរផ្សេងទៀត ក្នុងព្រះគម្ពីរសញ្ញាចាស់ថា “ឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង”(អេសាយ ៤៣:៤)។—Amy Boucher Pye
ក្រៅពីការច្រៀងសរសើរព្រះ តើអ្នកអាចសិក្សាព្រះបន្ទូលព្រះ ក្នុងព្រះគម្ពីរតាមរបៀបណាខ្លះ?
តើអ្នកអាចឱប ក្រសោបយកសេចក្តីពិតដែលថា ព្រះស្រឡាញ់អ្នក ដូចម្តេចខ្លះ?
ឱព្រះអាទិករ ព្រះអង្គបានបង្កើតទូលបង្គំឲ្យដូចរូបអង្គទ្រង់ ហើយមានបន្ទូលថា ព្រះអង្គស្រឡាញ់ទូលបង្គំ។
សូមព្រះអង្គជួយទូលបង្គំឲ្យស្គាល់សេចក្តីពិតនេះ ក្នុងគំនិត និងចិត្តទូលបង្គំ ដើម្បីឲ្យទូលបង្គំចែករំលែក
សេចក្តីស្រឡាញ់របស់ព្រះអង្គ ដល់អ្នកដទៃ។
គម្រោងអានព្រះគម្ពីររយៈពេល១ឆ្នាំ : អេសេគាល ១-២ និង ហេព្រើរ ១១:១-១៩
ល្ងាច
ការថែរក្សាដ៏ស្រទន់របស់ព្រះវរបិតា (សៀវភៅសេចក្ដីពិតសម្រាប់ជីវិត)
ដោយAlistair Begg
November 15, 2025
«ដូច្នេះ កុំឲ្យខ្វល់ខ្វាយថា តើត្រូវបរិភោគអ្វី ឬស្លៀកពាក់អ្វីនោះឡើយ ដ្បិតគឺជាសាសន៍ដទៃទេតើ ដែលខំស្វែងរករបស់ទាំងនោះវិញ ឯព្រះវរបិតានៃអ្នករាល់គ្នា ដែលគង់នៅស្ថានសួគ៌ ទ្រង់ជ្រាបហើយ ថាអ្នករាល់គ្នាត្រូវការនឹងរបស់ទាំងនោះដែរ ចូរស្វែងរកនគរ នឹងសេចក្ដីសុចរិតនៃព្រះជាមុនសិន ទើបគ្រប់របស់ទាំងនោះ នឹងបានប្រទានមកអ្នករាល់គ្នាថែមទៀតផង» (ម៉ាថាយ ៦:៣១-៣៣)។
ក្នុងនាមយើងជាស្នាព្រះហស្តរបស់ព្រះក្នុងពិភពលោករបស់ព្រះអង្គ ជោគវាសនា ឬយថាកម្ម មិនមែនជាអ្នកកំណត់ជីវិតយើងទេ។ យើងមិនត្រូវបានរុញច្រានដោយអំណាចដែលខ្វាក់ និងមិនមានលក្ខណៈជាអង្គបុគ្គល ហើយយើងក៏មិនត្រូវខ្វល់អំពីជោគជតារាសី តារាសាស្ត្រ ឬអ្វីផ្សេងទៀតដែលធ្វើឲ្យយើងបែកអារម្មណ៍ដែរ។
ប៉ុន្តែ សម្រាប់អ្នកដែលមិនស្គាល់ និងមិនទទួលជឿព្រះថាជាព្រះវរបិតាដែលគង់នៅស្ថានសួគ៌ ចំពោះពួកគេ ចក្រវាលមានលក្ខណៈដូចនេះឯង។ ហេតុនេះហើយ ព្រះគម្ពីរបានចែងច្បាស់ថា សាសន៍ដទៃ គឺអ្នកដែលមិនចាប់អារម្មណ៍អំពីព្រះ ពួកគេ «ខំស្វែងរករបស់ទាំងនោះវិញ»។ មនុស្សប្រភេទនោះមិនដឹងច្បាស់ថា ព្រះអាទិករមានពិតមែនឬក៏អត់ទេ ហើយពួកគេសន្មតថា បើព្រះមានពិតមែន នោះទ្រង់មុខជាបានលះបង់ចោលស្នាព្រះហស្តទ្រង់ តាំងពីពេលដែលទ្រង់បានបង្កើតពួកគេមក។ ក្នុងគំនិតរបស់ពួកគេ ប្រវត្តិសាស្ត្រនៃមនុស្សជាតិ មានការឡើងចុះ និងបត់បែន តាមយថាកម្មដោយយើងរាល់គ្នាសុទ្ធតែជាប់ខ្លួនរើមិនរួចនៅក្នុងយន្តការដ៏ធំធេង និងគ្មានមនោសញ្ចេតនា។ តែអរព្រះគុណព្រះអង្គ ដែលព្រះគម្ពីរបានប្រាប់យើង ផ្ទុយពីនេះ។ យោងតាមព្រះគម្ពីរ គ្រប់យ៉ាងត្រូវបានបង្កើតមកតាមរយៈព្រះគ្រីស្ទ និងដើម្បីព្រះគ្រីស្ទ ហើយព្រះអង្គនៅតែចូលរួមជាមួយស្នាព្រះហស្តរបស់ទ្រង់យ៉ាងស្និទ្ធស្នាល (កូឡូស ១:១៦-១៧)។ ហេតុនេះហើយ ព្រះរាជបុត្រានៃព្រះបានមានបន្ទូលក្នុងកណ្ឌគម្ពីរ ម៉ាថាយ ៦:២៦-៣៣ ថា ហេតុអ្វីអ្នកខ្វល់ខ្វាយអំពីអាហារ សំលៀកបំពាក់ ឬអ្វីៗផ្សេងទៀត? សាសន៍ដទៃបារម្ភអំពីរឿងទាំងអស់នេះ ចុះចំណែកអ្នកវិញ? ចូរមើលមកខ្ញុំ ខ្ញុំនឹងថែរក្សាអ្នក។ គ្មានសត្វចាបណា ដែលហើរនៅលើមេឃ ដោយព្រះអង្គមិនបានជ្រាបនោះទេ។ ស្មៅគ្រប់ដើមក្នុងទីវាល ត្រូវបានគ្របដណ្ដប់ដោយព្រះចេស្ដារបស់ខ្ញុំ ហើយខ្ញុំនឹងថែរក្សាអ្នកផងដែរ។
ជាការពិតណាស់ ព្រះបន្ទូលសន្យារបស់ព្រះគ្រីស្ទដែលថា ព្រះអង្គ និងព្រះវរបិតានឹងថែរក្សាយើង គឺជាសេចក្តីពិតដែលបានចែងក្នុងកណ្ឌគម្ពីរ រ៉ូម ៨:២៨ ថា «គ្រប់ការទាំងអស់ផ្សំគ្នា សម្រាប់សេចក្ដីល្អដល់ពួកអ្នកដែលស្រឡាញ់ព្រះ គឺដល់ពួកអ្នកដែលទ្រង់ហៅមក តាមព្រះតម្រិះទ្រង់»។ បើយើងនៅក្នុងព្រះគ្រីស្ទ ថ្ងៃនីមួយៗ និងបំណងចិត្តរបស់យើង ក្តីសង្ឃឹម និងការឈឺចាប់ ការភ័យខ្លាច និងបរាជ័យរបស់យើង គឺសុទ្ធតែផ្សំគ្នាឡើងស្របតាមបំណងព្រះទ័យប្រកបដោយប្រាជ្ញា ព្រះគុណ និងសេចក្តីស្រឡាញ់។
បើអ្នកមានអារម្មណ៍ឯកោនៅថ្ងៃនេះ ឬអ្នកមានការភ័យខ្លាចចំពោះរឿងដែលអាចកើតឡើងក្នុងទំនាក់ទំនងប្រេះស្រាំ ដ៏ពិបាក នៅសប្ដាហ៍ក្រោយ នោះចូរអនុញ្ញាតឲ្យព្រះបន្ទូលព្រះជ្រួតជ្រាបក្នុងចិត្តគំនិតអ្នកឲ្យមានភាពកក់ក្តៅ ហើយដឹងថា ព្រះវរបិតាស្រឡាញ់ ហើយគង់នៅជាមួយអ្នកជានិច្ច។ បើអ្នកមានបន្ទុកក្នុងចិត្ត ដោយសារការព្រួយបារម្ភអំពីបញ្ហាហិរញ្ញវត្ថុ នោះចូរឲ្យព្រះយេស៊ូវបំបាត់ការភ័យខ្លាចរបស់អ្នកដោយប្រាប់អ្នកថា ព្រះអង្គនឹងផ្គត់ផ្គង់អ្វីដែលអ្នកពិតជាត្រូវការ។ បើអ្នកកំពុងមានបញ្ហាសុខភាព ទោះខាងរូបកាយ ឬផ្លូវចិត្តក្តី ចូរទុកចិត្តថា ព្រះអង្គជ្រាប និងយកព្រះទ័យទុកដាក់ ហើយនឹងនាំអ្នកឆ្លងកាត់បញ្ហាទាំងនោះ។ ទោះមានរឿងអ្វីកើតឡើង ឬជីវិតមានការពិបាកយ៉ាងណា ព្រះទ្រង់នឹងថែរក្សាអ្នក ព្រោះព្រះអង្គយកព្រះទ័យទុកដាក់ចំពោះអ្នក។
ខគម្ពីរសញ្ជឹងគិត៖ ម៉ាថាយ ៦:១៩-៣៤
គម្រោងអានព្រះគម្ពីររយៈពេល១ឆ្នាំ៖ ១របាក្សត្រ ១៣-១៥ និងលូកា ១:៥៧-៨០