ព្រះបន្ទូលសន្យា នៅពីក្រោយក្រឹត្យវិន័យ (សៀវភៅសេចក្ដីពិតសម្រាប់ជីវិត)
ដោយAlistair Begg
January 4, 2026
ព្រះអម្ចាស់មានបន្ទូលថា ឯសេចក្ដីសញ្ញា ដែលអញនឹងតាំងដល់វង្សានុវង្សនៃពួកអ៊ីស្រាអែលក្រោយគ្រានោះ គឺថា អញនឹងដាក់ក្រិត្យវិន័យអញនៅក្នុងគំនិតគេ ហើយនឹងកត់ទុក នៅក្នុងចិត្តគេផង អញនឹងធ្វើជាព្រះដល់គេ ហើយគេនឹងធ្វើជារាស្ត្ររបស់អញ (ហេព្រើរ ៨:១០)។
ក្រឹត្យវិន័យរបស់ព្រះអម្ចាស់ គឺជាច្បាប់ដ៏ល្អឯក ដែលបានបើកបង្ហាញកំហុសជ្រៅបំផុតរបស់យើង ហើយទន្ទឹមនឹងនោះ ក៏បានបង្រៀនមនុស្សមិនបរិសុទ្ធ អំពីរបៀបចូលទៅរកព្រះដែលបរិសុទ្ធ ក្នុងការថ្វាយបង្គំ។ ការបង្គាប់ក្នុងក្រឹត្យវិន័យប្រៀបដូចជាអាវចាក់។ បើសិនជាយើងរុះខ្សែអំបោះតែមួយខ្សែចេញ អាវទាំងមូលនឹងខូចអស់។
បានសេចក្តីថា គ្មានរឿងតូចតាចក្នុងក្រឹត្យវិន័យរបស់ព្រះឡើយ។ ពេលណាយើងបំពានក្រឹត្យវិន័យតូចមួយ យើងមានទោសពីបទរំលងក្រឹត្យវិន័យទាំងមូល។ កណ្ឌគម្ពីរយ៉ាកុបបានប្រាប់យើងយ៉ាងច្បាស់ថា «ដ្បិតអ្នកណាដែលកាន់ក្រិត្យវិន័យទាំងមូល តែភ្លាត់ជំពប់នឹងបទណាមួយ នោះក៏ត្រឡប់ជាមានទោសចំពោះក្រិត្យវិន័យទាំងមូលនោះហើយ»(យ៉ាកុប ២:១០)។ ក្រឹត្យវិន័យមិនមែនជាថ្មមួយគំនរ ដែលយើងអាចដកថ្មមួយដុំចេញ ហើយគំនរថ្មមិនដួលរលំនោះឡើយ។ ផ្ទុយទៅវិញ ក្រឹត្យវិន័យប្រៀបដូចជាកញ្ចក់មួយផ្ទាំង ដែលអាចបែកដោយសារស្នាមប្រេះតូចមួយ។ ហេតុអ្វី? ព្រោះក្រឹត្យវិន័យរបស់ព្រះ មិនមែនជា ច្បាប់ ឬបទបញ្ជាដែលព្រះអង្គចេះតែតាក់តែង ដោយឥតហេតុនោះឡើយ តែជាការបង្ហាញចារិតលក្ខណៈ នៃព្រះនៃសិរីល្អដ៌ឥតខ្ចោះ និងបរិសុទ្ធ។
នៅពេលដែលយើងធ្វើការបូកសរុប យើងនឹងទទួលបានសេចក្តីពិតគួរឲ្យភ័យខ្លាច។ តើធ្វើដូចម្តេចឲ្យយើងអាចសង្ឃឹមថា នឹងបានឈានទៅដល់ស្តង់ដាដ៏ខ្ពស់យ៉ាងនេះបាន? តែសម្រាប់អ្នកស្គាល់ព្រះយេស៊ូវគ្រីស្ទ ដោយសេចក្តីជំនឿ ក្រឹត្យវិន័យមិនថ្កោលទោសពួកគេទៀតទេ។ ព្រះរាជបុត្រានៃព្រះសម្រេចក្រឹត្យវិន័យរបស់ព្រះ ដើម្បីឲ្យរាស្រ្តទ្រង់ មិនត្រូវប្រឈមមុខដាក់សេចក្តីក្រោធរបស់ទ្រង់ទៀតទេ។ ព្រះរាជបុត្រានៃព្រះសម្រេចក្រឹត្យវិន័យរបស់ព្រះ ដើម្បីឲ្យរាស្រ្តទ្រង់មិនចាំបាច់ត្រូវប្រឈមមុខដាក់សេចក្តីក្រោធរបស់ទ្រង់ឡើយ។ តាមរយៈការសុគត និងការមានព្រះជន្មរស់ឡើងវិញរបស់ព្រះយេស៊ូវ យើងបានជៀសចេញពីការដាក់ទោសដ៏យុត្តិធម៌មកលើបាបរបស់យើង។ សព្វថ្ងៃនេះ ក្រឹត្យវិន័យមិនបន្តនៅក្រៅខ្លួនយើងទេ តែបានកត់នៅលើចិត្តរបស់យើង។ ព្រះវិញ្ញាណនៃព្រះដែលបានចារក្រឹត្យវិន័យនៅលើចិត្តយើង ក៏បានធ្វើការកែប្រែយើង ដើម្បីឲ្យយើងទទួលយកភារកិច្ច និងកាតព្វកិច្ចរបស់ក្រឹត្យវិន័យ ដោយអំណរ។ ក្នុងព្រះគ្រីស្ទ យើងមិនគ្រាន់តែបានសង្គ្រោះ រួចពីទោសនៃការមិនបានកាន់តាមក្រឹត្យវិន័យប៉ុណ្ណោះទេ តែយើងក៏មានធនធាន សម្រាប់កាន់តែក្រឹត្យវិន័យ ដែលយើងមិនដែលមានពីមុនមក។
ចូរយើងស្រមៃថា មានចោរម្នាក់ដើរចូលព្រះវិហារ នៅថ្ងៃអាទិត្យ ហើយក៏បានឃើញក្រឹត្យវិន័យ១០ប្រការ។ គាត់ក៏បានភ័យញ័រ ចំពោះក្រឹត្យវិន័យដែលបង្គាប់ថា «កុំឲ្យលួចប្លន់ឲ្យសោះ»(និក្ខមនំ ២០:១៥)។ គាត់ក៏បានប្រែចិត្តចេញពីបាប ហើយទទួលយកជីវិតថ្មី ក្នុងព្រះគ្រីស្ទ។ ចាប់តាំងពីពេលនោះមក នៅពេលដែលគាត់អានក្រឹត្យវិន័យមួយនោះ គាត់យល់អត្ថន័យខុសពីមុន។ បម្រាម «កុំឲ្យលួចប្លន់ឲ្យសោះ» ក៏បានប្រែក្លាយជាការសន្យាថា «អ្នកនឹងមិនលួចទៀតទេ»។
ករណីនេះបានឆ្លុះបញ្ចាំងអំពីជីវិតមនុស្សម្នាក់ៗ ដែលទទួលជឿព្រះយេស៊ូវ ជាព្រះអម្ចាស់។ តើមានអំពើបាបណា ដែលអ្នកកំពុងតែតយុទ្ធ ឬកំពុងតែចុះចាញ់? តាមរយៈព្រះវិញ្ញាណបរិសុទ្ធ អ្នកមានធនធានគ្រប់យ៉ាង ដើម្បីស្តាប់បង្គាប់ព្រះវរបិតារបស់អ្នក ដោយទទួលស្គាល់ថា ក្រឹត្យវិន័យមិនមែនជាជណ្តើរសម្រាប់ឡើងទៅស្ថានសួគ៌ ឬជាប្រភពនៃការកាត់ទោស តែជាការណែនាំអំពីរបៀបរស់នៅ។ ដោយមានក្តីសង្ឃឹមនេះធ្វើជាអាវុធរបស់អ្នក អ្នកអាចតយុទ្ធនឹងបាបរបស់អ្នក ដោយទំនុកចិត្ត ដែលកើតចេញពីជ័យជម្នះដ៏ធំរបស់ព្រះគ្រីស្ទ។
ព្រះគម្ពីរសញ្ជឹងគិត៖ រ៉ូម ៨:១-៦
គម្រោងអានព្រះគម្ពីររយៈពេល១ឆ្នាំ៖ លោកុប្បត្ដិ ១០-១២ និង រ៉ូម ៤