សេចក្តីពិតដែលអ្នកអាចទុកចិត្ត (សៀវភៅសេចក្ដីពិតសម្រាប់ជីវិត)
ដោយAlistair Begg
January 7, 2026
«សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់»។ យ៉ូហាន ១៧:១៧
វប្បធម៌បែបហេតុផលនិយម និងសម្ភារៈនិយម នៅក្រោយសម័យភ្លឺស្វាងនិយម បានផ្តល់ឲ្យនូវដំណោះស្រាយប្លែកៗ សម្រាប់សំណួរ និងបញ្ហាធំៗបំផុតរបស់មនុស្ស។ គេប្រាប់យើងថា វិទ្យាសាស្ត្របានវាយជំនឿសាសនាឲ្យបាក់ស្បាត ហើយរាល់ការនិយាយអំពីព្រះ ឬព្រះគម្ពីរប៊ីប ត្រូវបានគេបដិសេធ និងចាត់ទុកជាអបិយជំនឿនៅសម័យមុនប៉ុណ្ណោះ។ គេបានចាត់ទុកជំនឿគ្រីស្ទាន ជាការលោតចូលទៅក្នុងភាពងងឹត ឬលោតចូលទៅក្នុងភាពងងឹតងងុលនៃបញ្ញា។
ដូចនេះ បញ្ហាប្រឈមធំបំផុត ចំពោះជំនឿលើព្រះគ្រីស្ទ គឺជាការសម្រេចចិត្តថា យើងនឹងជឿព្រះបន្ទូលរបស់ព្រះ ហើយមានការស្កប់ចិត្តចំពោះអ្វីដែលទ្រង់មានបន្ទូលឬទេ។ ក្នុងវប្បធម៌របស់យើង យូរៗម្តង យើងចាំបាច់ត្រូវសួរខ្លួនឯងថា «តើខ្ញុំជឿព្រះគម្ពីរប៊ីបទេ? តើខ្ញុំពិតជាបានប្រុងប្រៀបចិត្ត ដើម្បីជឿអ្វីដែលព្រះគម្ពីរបានចែងដែរឬទេ?»
យើងអាចមានទំនុកចិត្តលើសេចក្តីបន្ទាល់នៃព្រះគម្ពីរប៊ីប ដោយសារហេតុផលគ្រប់ប្រភេទ។ យើងអាចពិចារណា អំពីភាពស្មោះត្រង់មិនអាចប្រកែកបាននៃបទគម្ពីរ និងភាពអាចទុកចិត្តបានផ្នែកប្រវត្តិសាស្ត្រ ដែលមានការអះអាងជាលម្អិត ឬសូម្បីតែរបៀបដែលព្រះគម្ពីរប៊ីបនាំឲ្យមានសេចក្តីជំនឿក្នុងវប្បធម៌ផ្សេងគ្នា ជាង២ពាន់ឆ្នាំមកហើយ។ ប៉ុន្តែ មូលហេតុសំខាន់បំផុត ដែលយើងចុះចូលអំណាចនៃព្រះគម្ពីរប៊ីប គឺដោយសារការចុះចូលនេះ ជាលទ្ធផលនៃការចុះចូលនឹងភាពជាព្រះអម្ចាស់នៃព្រះគ្រីស្ទ។ នេះជាហេតុផលមួយដែលមានលក្ខណៈមូលដ្ឋានបំផុត ឬលើសពីការការពារផ្សេងទៀតដែលយើងអាចរកបាន។ ព្រះអម្ចាស់យេស៊ូវគ្រីស្ទនៃយើង ទ្រង់ជឿលើព្រះគម្ពីរប៊ីប ដូចនេះ យើងក៏ត្រូវជឿផងដែរ។ ព្រះអង្គទទួលស្គាល់អំណាចនៃព្រះបន្ទូលព្រះ ដូចនេះ យើងក៏ត្រូវទទួលស្គាល់ផងដែរ។
នៅក្នុងការអធិស្ឋានរបស់ព្រះអង្គ ក្នុងនាមជាសម្តេចសង្ឃ នៅពេលយប់មុនពេលព្រះអង្គសុគត ព្រះអង្គបានអធិស្ឋានទៅព្រះវរបិតាថា «សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់»។ គួរកត់សំគាល់ថា ព្រះអង្គមិនបានដាក់លក្ខខណ្ឌ នៅត្រង់ចំណុចនេះទេ។ ព្រះអង្គមានបន្ទូលច្បាស់ថា ព្រះបន្ទូលរបស់ព្រះ គឺជាសេចក្តីពិត។ ហេតុនេះហើយ សំណួរបន្ទាន់ដែលយើងត្រូវសួរនោះគឺ តើខ្ញុំជឿព្រះយេស៊ូវទេ? ហើយបើខ្ញុំជឿព្រះយេស៊ូវ នោះខ្ញុំក៏ជឿពាក្យដែលព្រះអង្គមានបន្ទូលចេញមកផងដែរ។ ដូចនេះ ខ្ញុំទទួលស្គាល់អ្វីដែលព្រះអង្គបានបង្រៀន អំពីព្រះគម្ពីរប៊ីប។ ដូចនេះ ខ្ញុំឱបក្រសោបយកព្រះគម្ពីរប៊ីប ដូចព្រះអង្គដែរ។
បើអ្នកបានភ្លក់ និងឃើញសេចក្តីល្អនៃព្រះយេស៊ូវគ្រីស្ទ នោះអ្នកត្រូវមានការប្ដេជ្ញាចិត្តជាថ្មីថា នឹងឱបក្រសោបយកព្រះបន្ទូលព្រះជារៀងរាល់ថ្ងៃ។ ក្នុងលោកិយរបស់យើង ដែលមានពេញដោយការភាន់ភាំង និងការប៉ះទង្គិចគ្នា ក្រៅពីព្រះគម្ពីរប៊ីប គ្មានអ្វីអាចធ្វើឲ្យជីវិតអ្នកមានភាពនឹងនរឡើយ។ ហេតុនេះហើយ អ្នកខ្លះនឹងព្យាយាមបញ្ចុះបញ្ចូលអ្នកថា ការឱបក្រសោបព្រះគម្ពីរប៊ីប គឺស្មើនឹងការលោតចូលទៅក្នុងភាពងងឹត។ ប៉ុន្តែ តាមពិត ពេលណាអ្នកអានព្រះគម្ពីរប៊ីប ដោយជំនឿថា ព្រះគម្ពីរគឺជាព្រះបន្ទូលព្រះ ហើយពាក្យគ្រប់ម៉ាត់សុទ្ធតែពិត នោះអ្នកនឹងបានដឹងថា ព្រះបន្ទូលគឺជាចង្កៀងបំភ្លឺជើង និងជាពន្លឺបំភ្លឺផ្លូវរបស់អ្នក(ទំនុកដំកើង ១១៩:១០៥)។
ព្រះគម្ពីរសញ្ជឹងគិត៖ ទំនុកដំកើង ១២
គម្រោងអានព្រះគម្ពីររយៈពេល១ឆ្នាំ៖ លោកុប្បត្ដិ ១៨-១៩ និង រ៉ូម ៧