ទទួលស្គាល់ដែនកំណត់របស់យើង
ដោយAlistair Begg
January 12, 2026
«កាលយើងបានផ្ចង់ចិត្តឲ្យស្គាល់ប្រាជ្ញា ... នោះយើងបានយល់ពីការរបស់ព្រះថា មនុស្សនឹងស្វែងរកឲ្យដឹងពីអស់ទាំងការ ដែលកើតមាននៅក្រោមថ្ងៃមិនបាន»។ សាស្តា ៨:១៦-១៧
យើងរាល់គ្នាសុទ្ធតែចង់បានចម្លើយ។ យើងស្រេកឃ្លានចង់បានភាពច្បាស់លាស់ ក្នុងជីវិតដែលមានភាពមិនច្បាស់លាស់ គ្មានទីបញ្ចប់ ហើយជាពិសេស នៅពេលដែលយើងមានអារម្មណ៍ថា លោកិយ ឬកាលៈទេសៈរបស់យើងមានភាពវឹកវរ។ ចូរយើងគ្រាន់តែគិតអំពីអ្នកជំនាញទាំងអស់ ដែលយើងបានស្វែងរកការណែនាំពីពួកគេ ដែលមានដូចជា អ្នកជំនាញផ្នែកសុខាភិបាល អ្នកជំនាញខាងសង្គម អ្នកជំនាញផ្នែកនយោបាយ ។ល។ ប៉ុន្តែ ទោះសម័យរបស់យើងមានចំនួនអ្នកជំនាញច្រើនជាងសម័យមុនៗក៏ដោយ ក៏ដំណើរស្វែងរកភាពច្បាស់លាស់ នៅតែមិនខុសពីសម័យមុនទេ។ ក្នុងសម័យណាក៏ដោយ មនុស្សជាតិបានស្វែងរកគំរូ ឬហេតុផល ដើម្បីឲ្យពួកគេអាចយល់អំពីព្រឹត្តិការណ៍ធំៗក្នុងប្រវត្តិសាស្ត្រ និងរឿងដែលបានកើតឡើងក្នុងជីវិតរបស់ពួកគេ។
កណ្ឌគម្ពីរសាស្តាបានចែងអំពីការស្វែងរកភាពច្បាស់លាស់ នៅសម័យបុរាណ។ អ្នកនិពន្ធនៃកណ្ឌគម្ពីរសាស្តា បានចែកចាយដល់យើង អំពីការដែលគាត់ព្យាយាមយល់ «គ្រប់ទាំងអស់ដែលកើតមាននៅក្រោមមេឃ» ដោយ «ផ្ចង់ចិត្តឲ្យបានស្គាល់ប្រាជ្ញា ព្រមទាំងសេចក្ដីចំកួត នឹងសេចក្ដីផ្ដេសផ្ដាស»(សាស្តា ១:១៣,១៧)។ តែនៅទីបញ្ចប់ គាត់បានសន្និដ្ឋានថា «មនុស្សនឹងស្វែងរកឲ្យដឹងពីអស់ទាំងការ ដែលកើតមាននៅក្រោមថ្ងៃមិនបាន»។ មនុស្សភាគច្រើនអាចធ្វើការសន្និដ្ឋានយ៉ាងងាយស្រួលថា យើងរាល់គ្នាសុទ្ធតែត្រូវការពេលវេលាគ្រប់គ្រាន់ ដើម្បីរស់នៅ និងសង្កេតមើលលោកិយនៅជុំវិញយើង។ យើងអាចឆ្លើយតបចំពោះសេចក្តីពិតនេះ ដោយប្រាជ្ញា ដោយបន្ទាបខ្លួនយើង ហើយរស់នៅ ដោយពន្លឺនៃព្រះបន្ទូលព្រះ។ អាចនិយាយម្យ៉ាងទៀតថា យើងទទួលស្គាល់ថា ព្រះទ្រង់មិនអនុញ្ញាតឲ្យយើងដឹង អំពីអ្វីគ្រប់យ៉ាងដែលយើងចង់ដឹង តែព្រះអង្គបានប្រទានអ្វីដែលយើងត្រូវការ។ ការបន្ទាបខ្លួនពិតប្រាកដ គឺជាការទទួលស្គាល់ និងថែមទាំងឱបក្រសោបយកដែនកំណត់នេះ។
បើយើងត្រូវមើលទៅសកម្មភាព និងគោលបំណងទាំងអស់របស់ព្រះអង្គ ឲ្យបានមួយរយភាគរយ នោះគឺមិនខុសពីការសម្លឹងមើលព្រះអាទិត្យឲ្យចំ ដោយភ្នែកទទេនោះឡើយ។ ពន្លឺសម្រាប់ឲ្យយើងរស់នៅតាម បានបើកបង្ហាញនៅក្នុងព្រះគម្ពីរប៊ីបហើយ។ ព្រះបន្ទូលព្រះបំភ្លឺផ្លូវរបស់យើង «ការបើកសំដែងព្រះបន្ទូលទ្រង់ នោះផ្សាយពន្លឺចេញ ក៏ធ្វើឲ្យមនុស្សឆោតល្ងង់មានយោបល់»(ទំនុកដំកើង ១១៩:១៣០)។ ពន្លឺនោះអាចនឹងមិនបំភ្លឺបរិវេណជុំវិញយើង តែប្រាកដជាបំភ្លឺផ្លូវនៅពីមុខយើង បើសិនជាយើងដើរ ដោយការទុកចិត្ត និងស្តាប់បង្គាប់។
ជាជាងធ្វើឲ្យខ្លួនយើងរវល់នឹងអ្វីដែលមិនអាចយល់បាន យើងចាំបាច់ត្រូវចូលទៅរកព្រះគម្ពីរប៊ីប ដោយការបន្ទាបខ្លួន ដោយចិត្តរំពឹង និងភាពខ្ជាប់ខ្ជួន ដើម្បីឲ្យយើងអាចរកឃើញពន្លឺ ដែលព្រះគម្ពីរផ្តល់ឲ្យយើង។ យើងមិនអាចយល់អំពីជីវិតបានទាំងស្រុងទេ តែយើងអាចយល់អំពីវាបានគ្រប់គ្រាន់ ហើយច្រៀងជាមួយលោក វីលៀម ខោភ័រ(William Cowper)ថា:
នៅក្នុងជម្រៅនៃប្រាជ្ញា ដែលយើងមិនអាចយល់បាន
ព្រះអង្គបានរក្សាទុកផែនការដ៏រុងរឿងរបស់ទ្រង់
ហើយធ្វើតាមបំណងព្រះទ័យ ដែលមានអំណាចគ្រប់គ្រងទាំងស្រុង។ 6
ទស្សនៈអំពីជីវិត នៅក្រោមកម្តៅថ្ងៃ ដែលបានចែងក្នុងកណ្ឌគម្ពីរសាស្តា ជួយឲ្យយើងទុកចិត្តកាន់តែខ្លាំងថា បំណងព្រះទ័យទ្រង់ និងនាំមកនូវសណ្ដាប់ធ្នាប់ តាមពេលវេលា និងផ្លូវរបស់ទ្រង់ គឺសណ្ដាប់ធ្នាប់នៅក្នុងការអ្វីដែលហាក់ដូចជាភាន់ច្រឡំ ។ ព្រះអង្គនឹងប្រើកាលៈទេសៈទាំងអស់របស់យើង ដើម្បីសម្រេចបំណងព្រះទ័យ ដែលទ្រង់មានសម្រាប់មនុស្សទាំងអស់ អស់កល្បជានិច្ច។
ព្រះគម្ពីរសញ្ជឹងគិត៖ សាស្តា ៨
គម្រោងអានព្រះគម្ពីររយៈពេល១ឆ្នាំ៖ លោកុប្បត្ដិ ២៩-៣០ និង រ៉ូម ១០