គំនិតយោបល់ និងការកម្សាន្តចិត្តដ៏ជាប់លាប់
ដោយAlistair Begg
January 19, 2026
«ទូលបង្គំនឹងសរសើរដល់ព្រះយេហូវ៉ា ដែលទ្រង់ជួយគំនិតទូលបង្គំ អើ ចិត្តក៏បង្គាប់ដល់ទូលបង្គំនៅវេលាយប់ដែរ»។ ទំនុកដំកើង ១៦:៧
មនុស្សភាគច្រើនទទួលការប្រឹក្សាយោបល់ជាប់ជានិច្ច គឺហាក់ដូចជា នៅគ្រប់ទីកន្លែងណាដែលពួកគេទៅដល់។ មនុស្សម្នាក់ៗ សៀវភៅនីមួយៗ ក៏ដូចជាព័ត៌មាននៅលើបណ្ដាញសង្គម កំពុងតែព្យាយាមនិយាយប្រាប់យើង អំពីការអ្វីដែលធ្វើឲ្យយើងសប្បាយចិត្ត និងមានភាពពេញលេញជាងមុន។ ខ្ញុំសង្ឃឹមថា ព័ត៌មានខ្លះដែលបានចូលក្នុងជីវិតយើង មានលក្ខណៈគោរពកោតខ្លាចព្រះ និងសមស្របនឹងព្រះគម្ពីរប៊ីប។ បើយើងនិយាយដោយស្មោះត្រង់ទៅ យើងអាចរស់នៅ ដោយមិនទទួលព័ត៌មានផ្សេងទៀតក៏បាន។
ប៉ុន្តែ ចុះបើសិនជាយើងមិនទទួលសម្រង់សម្ដីខ្លីៗ និងប្រើបណ្ដាញសង្គមទាំងនោះ តែយើងអាចទៅរកប្រភពនៃប្រាជ្ញាដែលមិនចេះរីងស្ងួតវិញ? ចុះបើសិនជាយើងអាចទទួលការប្រឹក្សាពីអង្គបុគ្គលម្នាក់ ដែលគាត់មិនត្រូវការការប្រឹក្សាពីនរណាម្នាក់ទាល់តែសោះ?
នេះជាអ្វីដែលស្តេចដាវីឌទទួលបានលើកឡើង ក្នុងបទគម្ពីរទំនុកដំកើង ជំពូក១៦ ដែលបានចែងថា «ទូលបង្គំនឹងសរសើរដល់ព្រះយេហូវ៉ា ដែលទ្រង់ជួយគំនិតទូលបង្គំ»។ តើយើងអាចទទួលគំនិតយោបល់នេះ ដោយរបៀបណា? ព្រះអង្គបានបង្ហាញដួងព្រះទ័យរបស់ព្រះអង្គ ឲ្យយើងបានស្គាល់ តាមរយៈភាពគ្រប់គ្រាន់នៃព្រះបន្ទូលទ្រង់។ ការបង្ហាញនេះគឺជាអំណោយធំបំផុត។ តើព្រះទ្រង់បានលាក់បាំងអ្វី ក្នុងព្រះគម្ពីររបស់ទ្រង់ ដែលយើងត្រូវការ ដើម្បីឲ្យបានចូលទៅក្នុងជីវិតអស់កល្បឬទេ? តើមានការប្រៀនប្រដៅដ៏ល្ងង់ខ្លៅ ឬមានកំហុសនៅក្នុងព្រះបន្ទូលទ្រង់ទេ? ទេ មិនដែលមានទេ! ព្រះទ្រង់គឺជាអ្នកប្រឹក្សាយោបល់ដែលសំខាន់បំផុត។ ព្រះបន្ទូលព្រះអង្គ គឺជាប្រាជ្ញាដែលគ្មានទីបញ្ចប់។ មិនតែប៉ុណ្ណោះ ពេលណាអ្នកអធិស្ឋាន ព្រះអង្គមិនដែលជាប់រវល់នោះទេ។ គ្មានពេលណាដែលអ្នកមិនអាចនិយាយទៅកាន់ព្រះអង្គនោះឡើយ។
ព្រះទ្រង់ប្រទានការប្រឹក្សាប្រកបដោយប្រាជ្ញា ដែលក្នុងនោះ យើងរកឃើញការកម្សាន្តចិត្ត។ គឺដូចដែលស្តេចដាវីឌបានប្រកាសថា «ដោយព្រោះទ្រង់គង់នៅខាងស្ដាំទូលបង្គំ បានជាទូលបង្គំមិនត្រូវរង្គើឡើយ»(ទំនុកដំកើង ១៦:៨)។ នៅក្នុងខគម្ពីរផ្សេងទៀត លោក អេសាភ បានអធិស្ឋានថា «ទូលបង្គំនៅជាប់នឹងទ្រង់ជានិច្ច ទ្រង់បានកាន់ដៃស្ដាំនៃទូលបង្គំ
ទ្រង់នឹងនាំទូលបង្គំ ដោយដំបូន្មានរបស់ទ្រង់ រួចនឹងទទួលទូលបង្គំចូលក្នុងសិរីល្អ»(៧៣:២៣-២៤)។ យើងប្រៀបដូចក្មេងៗដើរឆ្លងផ្លូវ ដ៏មមាញឹក ហើយព្រះវរបិតានៃយើងកាន់ដៃយើងឆ្លងផ្លូវនោះ។ រថយន្តដែលបើកចុះឡើងៗពីមុខយើងអាចធ្វើឲ្យយើងភ័យខ្លាច ប៉ុន្តែ ដោយសារព្រះអង្គនៅខាងស្តាំយើង តើយើងមានអ្វីត្រូវភ័យខ្លាចទៀត?
ព្រះអង្គនឹងដឹកដៃយើង នៅតាមផ្លូវជីវិត ហើយព្រះអង្គនឹងមិនបោះបង់យើងចោលឡើយ។ យើងអាចមានអំណរ ជាប់ជានិច្ចនៅក្នុងព្រះអង្គ(ទំនុកដំកើង ១៦:៩-១១)។ យើងអាចដឹងច្បាស់ពីរឿងនេះ ព្រោះព្រះអម្ចាស់យេស៊ូវគ្រីស្ទ ដែលបានយាងទៅផ្នូរ មានព្រះជន្មរស់ឡើងវិញមុនយើង ដោយព្រះជន្មមិនចេះពុកផុយ(កិច្ចការ ២:២៥-៣២) ហើយព្រះអង្គ ជាផលដំបូងពីពួកអ្នកដែលបានជឿព្រះអង្គ(១កូរិនថូស ១៥:២០)។
ផ្លូវដែលព្រះយេស៊ូវបានដើរ ក៏ជាផ្លូវដែលព្រះអង្គនាំយើងទៅផងដែរ។ អ្នកក៏ត្រូវលីឈើឆ្កាងរបស់អ្នក ហើយដើរតាមព្រះអម្ចាស់(ម៉ាថាយ ១៦:២៤)។ អ្នកក៏នឹងជួបការលំបាក ហើយថែមទាំងមានការឈឺចាប់។ ប៉ុន្តែ ក្នុងការឆ្លងកាត់ទុក្ខលំបាកទាំងអស់នោះ មិនដែលមានពេលណា ដែលអ្នកគ្មានគំនិតយោបល់ប្រកបដោយប្រាជ្ញាពីព្រះវរបិតាឡើយ។ ចូរប្រាកដថា អ្នកបានងាកទៅរកគំនិតយោបល់របស់ព្រះអង្គ។ ហើយក៏គ្មានពេលដែលអ្នកគ្មានការកម្សាន្តចិត្តពីព្រះអង្គដែរ។ ចូរប្រាកដថា អ្នកបានសម្រាក ក្នុងការកម្សាន្តចិត្តនោះ។ ហើយក៏គ្មានពេលណាដែលព្រះហស្តដ៏ខ្លាំងពូកែរបស់ព្រះអង្គ មិនបានឈោងមកដល់អ្នកដែរ។ ចូរប្រាកដថា អ្នកបាននឹកចាំអំពីព្រះហស្តរបស់ព្រះអង្គ។
ព្រះគម្ពីរសញ្ជឹងគិត៖ ទំនុកដំកើង ១៦
គម្រោងអានព្រះគម្ពីររយៈពេល១ឆ្នាំ៖ លោកុប្បត្ដិ ៤៦-៤៨ និង រ៉ូម ១៥:១៤-៣៣