វិធីសាស្រ្តស្វែងរកសន្តិភាព
ដោយAlistair Begg
February 5, 2026
«អ្នកនោះនឹងបានជាទីក្សេមក្សាន្តដល់យើង» ។ មីកា ៥:៤
អ្នកអាចរកឃើញសេចក្តីសុខក្សេមក្សាន្ត ក្នុងការរស់នៅ ។
បរិបទនៃកណ្ឌគម្ពីរមីកា និយាយអំពីការបន្ទាបបន្ថោកធ្ងន់ធ្ងរបំផុត ដែលរាស្រ្តរបស់ព្រះបានទទួលរង ។ សាសន៍ដទៃបានឡោមព័ទ្ធទីក្រុងយេរូសាឡិម ហើយប្រជាជនក្នុងទីក្រុងនោះ មិនអាចធ្វើអ្វីបានច្រើន ដើម្បីការពារខ្លួននោះឡើយ ។ ពួកគេស្រេកឃ្លានសន្តិភាព ប៉ុន្តែ ពួកគេបែរជាធ្លាក់ចូលទៅក្នុងសង្គ្រាមទៅវិញ ។ ពួកគេស្ថិតនៅក្រោមការគ្រប់គ្រងរបស់ប្រទេសមហាអំណាច ដូចនេះពួកគេមិនអាចកែនទ័ព ដើម្បីប្រយុទ្ធតទល់នឹងសត្រូវបានទេ ។ បញ្ហានេះបានឆ្លុះបញ្ចាំងអំពីភាពអាប់ឱនយ៉ាងខ្លាំង ។
ពេលនោះ គឺជាពេលដែលរាស្រ្តរបស់ព្រះស្ថិតក្នុងភាពភាន់ភាំងយ៉ាងខ្លាំង ។ ពួកគេគឺជារាស្រ្តជ្រើសតាំងរបស់ព្រះ ដែលបានញែកពួកគេចេញថ្វាយព្រះអង្គ ជាអ្នកនាំព្រះបន្ទូលសន្យាដ៏ធំប្រសើររបស់ព្រះអង្គ ដើម្បីធ្វើជាព្រះពរ និងស្តាពិភពលោកឡើងវិញ ប៉ុន្តែ នៅពេលនោះ ការទាំងអស់នោះហាក់ដូចជាហៀបនឹងរលាយបាត់បង់អស់ ។ ពួកគេទំនងជាសួរខ្លួនឯងថា តើហេតុអ្វីព្រះអម្ចាស់មិនធ្វើតាមព្រះបន្ទូលសន្យារបស់ព្រះអង្គ?
នៅក្នុងពេលដ៏ភាន់ភាំងនេះ ព្រះអម្ចាស់ក៏បានចាប់ផ្តើមបញ្ចាំងពន្លឺទ្រង់ចូលក្នុងភាពងងឹតរបស់ពួកគេ ។ ពួកគេបានទទួលរងការបន្ទាបបន្ថោក តែទន្ទឹមនឹងនោះ ពួកគេទទួលបានតម្រុយនៃសេចក្តីសង្ឃឹម ។ ហោរាមីកាក៏បានប្រកាសថា ព្រះមែស៊ីទ្រង់នឹងយាងមក ធ្វើជាស្តេច និងឃ្វាលហ្វូងចៀមទ្រង់ ដោយកម្លាំងនៃព្រះអម្ចាស់ និងប្រទានសន្តិសុខដល់អស់អ្នកដែលទុកចិត្តព្រះអង្គ (មីកា ៥:៤) ។ ហោរាមីកា មានប្រសាសន៍ថា ពួកគេនឹងរកឃើញសន្តិភាព នៅក្នុងព្រះអង្គ នៅទីបញ្ចប់ ។
ខ្ញុំមានកូនសៀវភៅមួយក្បាល នៅផ្ទះ មានចំណងជើងថា សន្តិភាពរយៈពេល៥នាទី ។14 កូនសៀវភៅនេះ និយាយអំពីរឿងរបស់មេដំរីមួយក្បាល ដែលចង់បានសន្តិភាពរយៈពេល៥នាទី ដោយមិនមានកូនៗនៅក្បែរ ប៉ុន្តែ ពេលណាវាព្យាយាមស្វែងរកសន្តិភាពក្នុងចិត្ត វាជួបភាពវឹកវរកាន់តែខ្លាំង ។ ជាការពិតណាស់ ស្ត្រីជាម្តាយម្នាក់ៗអាចយល់អំពីអារម្មណ៍នេះ! ក្នុងពេលវឹកវរនោះ យើងចង់មានការសម្រាកមួយភ្លែត ។ រាស្រ្តរបស់ព្រះក៏មានបំណងចិត្តដូចនេះដែរ ហើយក្នុងអំឡុងពេលទុក្ខព្រួយជាទម្ងន់ ហោរាមីកា ក៏បានសន្យាថា ព្រះមែស៊ីនឹងយាងមក ដើម្បីប្រទានសន្តិភាពដែលពួកគេកំពុងស្រេកឃ្លាន ។
យើងរាល់គ្នាសុទ្ធតែចង់បានសន្តិភាព តែជាញឹកញាប់ យើងហាក់ដូចជាមិនអាចស្វែងរកបាន ។ បើយើងមើលជុំវិញខ្លួន យើងឃើញថា សន្តិភាពពិតប្រាកដកំពុងតែអវត្តមាន នៅទូទាំងពិភពលោក នៅក្នុងប្រទេស ក្នុងតំបន់ និងក្នុងចិត្តមនុស្សម្នាក់ៗ ។ យើងប្រហែលជាចង់និយាយប្រាប់ខ្លួនឯងថា «បើសិនជាខ្ញុំអាចរកឃើញសន្តិភាពក្នុងចិត្តតែបន្តិច មិនដឹងល្អយ៉ាងណាទេ ។ ខ្ញុំគ្រាន់តែចង់បានសន្តិភាព តែ៥នាទីប៉ុណ្ណោះ!»
តើជីវិតអ្នកមានស្លាកស្នាមនៃទំនាក់ទំនងបាក់បែក ទុក្ខព្រួយផ្នែកហិរញ្ញវត្ថុ ការបាត់បង់ផ្ទាល់ខ្លួន និងការខកចិត្តដទៃទៀតឬទេ? បើសិនដូច្នោះមែន មានដំណឹងល្អមួយសម្រាប់អ្នក ដែលក្នុងនោះ អ្នកនឹងរកឃើញសន្តិភាពពិតប្រាកដ ដ៏ស្ថិតស្ថេរ ក្នុងព្រះយេស៊ូវ ជាព្រះមែស៊ី គឺសន្តិភាពជាមួយព្រះជាទីមួយ ហើយសន្តិភាពជាមួយខ្លួនឯង និងក្នុងទំនាក់ទំនង និងសហគមន៍របស់យើង ពេលណាយើងរៀនបង្ហាញឲ្យគេស្គាល់ព្រះនៃសន្តិភាព ក្នុងរបៀបដែលយើងឆ្លើយតប ចំពោះភាពតានតឹង ការលំបាក និងការប៉ះទង្គិច ។ ព្រះមែស៊ីបានយាងមក ដើម្បីប្រទានសន្តិភាពនេះ ដល់អស់អ្នកណា ដែលទុកចិត្តព្រះអង្គ ។ និយាយឲ្យខ្លី ព្រះអង្គគឺជាព្រះអង្គម្ចាស់នៃសន្តិភាព ។
ទោះអ្នកជួបប្រទះអ្វីក៏ដោយ អ្នកអាចអរសប្បាយនឹងសន្តិភាពជាមួយព្រះអាទិកររបស់អ្នក ដែលបានសុគត ដើម្បីមានជ័យជម្នះមកលើបាប ។ បន្ទាប់មក ត្រូវដឹងថា អ្នកមានសន្តិភាពជាមួយព្រះមួយអង្គ ដែលបំណងព្រះទ័យទ្រង់មានសារៈសំខាន់អស់កល្បជានិច្ច ហើយអ្នកនឹងអាចដើរចូលទៅក្នុងពិភពលោករបស់អ្នក ដើម្បីស្វែងរកការរស់នៅ ដោយសន្តិភាព ដោយព្រះគុណព្រះអង្គ ។
ខគម្ពីរជញ្ជឹងគិត៖ មីកា ៥:១-៩
គម្រោងអានព្រះគម្ពីររយៈពេល១ឆ្នាំ៖ អេសាយ ៣៩-៤០ ម៉ាកុស ១០:១-៣១