របៀបបង្ហាញចេញសេចក្តីស្រឡាញ់
ដោយAlistair Begg
February 6, 2026
«គួរគប្បីឲ្យខ្ញុំគិតពីអ្នករាល់គ្នាដូច្នេះដែរ ពីព្រោះអ្នករាល់គ្នានឹកពីខ្ញុំនៅជាប់ក្នុងចិត្តជានិច្ច ... ព្រះទ្រង់ជាស្មរបន្ទាល់ពីខ្ញុំថា ខ្ញុំរឭកដល់អ្នករាល់គ្នាជាខ្លាំង ដោយព្រះហឫទ័យសន្ដោសនៃព្រះយេស៊ូវគ្រីស្ទ ។ ខ្ញុំក៏អធិស្ឋានសូមសេចក្ដីនេះ គឺឲ្យសេចក្ដីស្រឡាញ់របស់អ្នករាល់គ្នា បានចំរើនកាន់តែច្រើនឡើង ដោយនូវសេចក្ដីចេះដឹង នឹងយោបល់គ្រប់ជំពូក» ។ ភីលីព ១:៧-៩
កាលពីក្មេង ពេលណាខ្ញុំជម្រាបលាជីតារបស់ខ្ញុំ គាត់ចូលចិត្តនិយាយប្រាប់ខ្ញុំថា «តានឹងគិតដល់ចៅ» ។ ខ្ញុំតែងតែមានអារម្មណ៍ថា ការនិយាយដូចនេះ ហាក់ដូចជាចម្លែក ។ ប៉ុន្តែ គាត់ចង់មានន័យថា «តាខ្វល់អំពីសុខទុក្ខរបស់ចៅ ។ តាយកចិត្តទុកដាក់ចំពោះការអ្វីដែលចៅកំពុងធ្វើ ។ តាចង់ដឹងថា ចៅកំពុងទៅកន្លែងណា» ។
សាវ័កប៉ុលបានប្រើពាក្យស្រដៀងនេះផងដែរ នៅពេលដែលគាត់សរសេរសំបុត្រផ្ញើទៅពួកជំនុំនៅទីក្រុងភីលីព ដូចជាពាក្យ «អារម្មណ៍» «ចិត្ត» «ប្រាថ្នា» និង «ស្រឡាញ់» ។ ពាក្យ Phronein ដែលមានន័យថា «គិតពី» គឺជាពាក្យដែលមិនគ្រាន់តែបង្ហាញអំពីការផ្ដោតចិត្ត តែក៏បង្ហាញការចាប់អារម្មណ៍ដោយការអាណិត និងការខ្វល់អំពីអ្នកដទៃយ៉ាងពិតប្រាកដ ។ ត្រង់ចំណុចនេះ សាវ័កប៉ុលកំពុងប្រាប់ពួកជំនុំនៅទីក្រុងភីលីពថា ទោះគាត់នៅឆ្ងាយពីពួកគេតែរូបកាយ និងចិត្តរបស់គាត់នៅតែស្រឡាញ់ពួកគេ ហើយនៅតែគិត និងអធិស្ឋានឲ្យពួកគេ ។ គាត់ «កំពុងតែគិតដល់» ពួកគេ ។
សាវ័កប៉ុល ជាមនុស្សដែលធ្លាប់ស្អប់អ្នកដើរតាមព្រះយេស៊ូវយ៉ាងខ្លាំង តែបានប្រែជាមានចិត្តស្រឡាញ់ដូចនេះវិញ ដោយសារព្រះយេស៊ូវប្រទានក្តីស្រឡាញ់នេះមកគាត់ ។ គាត់ និងបងប្អូនរួមជំនឿរបស់គាត់ មានចំណងទាក់ទង ដោយសេចក្តីស្រឡាញ់ដ៏អស្ចារ្យរបស់ព្រះ ចំពោះពួកគេ ។ ខ្នាតគំរូ និងប្រភពនៃសេចក្តីស្រឡាញ់របស់គាត់ គឺបានកើតចេញពីព្រះអម្ចាស់យេស៊ូវ ។ គឺដូចដែលលោកគ្រូ ប៊ីសប ឡៃហ្វ៊ុត បានសរសេរថា «បេះដូងរបស់សាវ័កប៉ុលបានលោត ដោយចង្វាក់បេះដូងរបស់ព្រះគ្រីស្ទ ហើយបេះដូងគាត់ក៏កន្ទ្រាក់តាមចង្វាក់បេះដូងរបស់ព្រះអង្គ» ។15
ដោយសារអ្នកជឿព្រះនៅទីក្រុងភីលីព ជាផ្នែកដ៏សំខាន់មួយនៃជីវិតរបស់សាវ័កប៉ុល នោះក្តីស្រឡាញ់ដែលគាត់មានចំពោះពួកគេ បានបណ្តាលចិត្តគាត់ឲ្យអធិស្ឋានឲ្យពួកគេ ព្រោះគាត់ដឹងថា ការអធិស្ឋានគឺជាគន្លឹះ ដើម្បីបង្ហាញសេចក្តីស្រឡាញ់ផងដែរ ។ ក្តីស្រឡាញ់របស់គាត់មិនបានបង្ហាញចេញមក ដោយពាក្យសម្តីដែលបង្ហាញមនោសញ្ចេតនាដែលគ្រាន់តែពីរោះស្តាប់នោះទេ ។ ផ្ទុយទៅវិញ គាត់បានអធិស្ឋានឲ្យមិត្តសំឡាញ់របស់គាត់ ជារៀងរាល់ថ្ងៃ ។
ពេលណា «សេចក្ដីស្រឡាញ់របស់ព្រះ បានផ្សាយមកសព្វក្នុងចិត្តយើងរាល់គ្នា ដោយសារព្រះវិញ្ញាណបរិសុទ្ធ» (រ៉ូម ៥:៥) យើងនឹងបានទទួលការបណ្តាលចិត្តឲ្យទៅរកអ្នកដទៃ ដែលមានសេចក្តីស្រឡាញ់ដូចនេះផងដែរ ។ នេះជាសេចក្តីស្រឡាញ់ក្នុងគ្រួសារខាងវិញ្ញាណ ដ្បិតយើងមានព្រះវរបិតាតែមួយ ហើយការអធិស្ឋាន គឺជារបៀបជាមូលដ្ឋានដែលយើងបង្ហាញសេចក្តីស្រឡាញ់នេះ ។
តើអ្នកស្រឡាញ់កូនៗរបស់អ្នកទេ? ចូរអធិស្ឋានឲ្យពួកគេ ។ តើអ្នកស្រឡាញ់ពួកជំនុំរបស់អ្នកទេ? ចូរអធិស្ឋានឲ្យពួកគេ ។ ខណៈពេលដែលសេចក្តីស្រឡាញ់របស់ព្រះគ្រីស្ទបានពង្រីកចិត្តរបស់អ្នក ហើយហូរកាត់ជីវិតអ្នកហើយ សេចក្តីស្រឡាញ់ដែលអ្នកមានចំពោះមនុស្សដែលជិតស្និទ្ធ នឹងបណ្តាលចិត្តអ្នកឲ្យអធិស្ឋានឲ្យពួកគេ ។ ចូរ «គិតដល់» មនុស្សដែលអ្នកស្រឡាញ់ ហើយ «អធិស្ឋានឲ្យ» ពួកគេផងដែរ!
ខគម្ពីរជញ្ជឹងគិត៖ ១ថែស្សាឡូនិច ២ខ-១៣
គម្រោងអានព្រះគម្ពីររយៈពេល១ឆ្នាំ៖ អេសាយ ៤១-៤២ និង ម៉ាកុស ១០:៣២-៥២