ត្រូវការអ្នកដឹកនាំខាងវិញ្ញាណ
ដោយAlistair Begg
March 15, 2026
«ប៉ុលក៏ចាត់គេ ពីមីលេតទៅឯក្រុងអេភេសូរ ដើម្បីនឹងហៅពួកចាស់ទុំក្នុងពួកជំនុំនោះមក» ។ កិច្ចការ ២០:១៧
ក្នុងពាក់កណ្តាលសតវត្សរ៍ទី២០ និកាយអង់គ្លីខិននៅប្រទេសអង់គ្លេស បានបញ្ចេញរបាយការណ៍មួយ ដែលនិយាយអំពីការផ្លាស់ប្តូរជំនឿនៅប្រទេសអង់គ្លេស ។ គោលដៅរបស់ពួកគេ គឺដើម្បីស្វែងយល់អំពីការអ្វីដែលកំពុងកើតឡើង ក្នុងសង្កាត់ទាំងឡាយនៃសហគមន៍របស់ពួកជំនុំអង់គ្លីខិន ។ ក្នុងរបាយការណ៍នោះ អ្នកនិពន្ធបានឈានទៅដល់ប្រធានបទអំពីភាពជាអ្នកដឹកនាំយ៉ាងឆាប់រហ័ស ដែលក្នុងនោះ ពួកគេបានសង្កេតឃើញថា «អ្នកដឹកនាំខាងវិញ្ញាណច្រើនតែអាចនាំមកនូវការផ្លាស់ប្តូរគួរឲ្យភ្ញាក់ផ្អើល» ។26 ពាក្យ «ខាងវិញ្ញាណ» គឺជាពាក្យដ៏សំខាន់ ។ បើពួកជំនុំចង់រីកលូតលាស់ ក្នុងលោកិយ ពួកគេត្រូវតែមានបុរសខាងវិញ្ញាណ ដែលមានតួនាទីជាអ្នកដឹកនាំ ។ ទោះគេបានបោះពុម្ពផ្សាយរបាយការណ៍នោះតាំងពីយូរមក ហើយមានការប្រែប្រួលជាច្រើនបានកើតឡើង ចាប់តាំងពីពេលនោះមកក៏ដោយ ក៏អ្នកដឹកនាំដែលមានភាពពេញវ័យខាងវិញ្ញាណ នៅតែមានភាពចាំបាច់ជាយុទ្ធសាស្រ្ត ទោះពួកគេកំពុងបម្រើព្រះនៅប្រទេសណា ហើយមាននិកាយអ្វីក៏ដោយ ។ ពួកជំនុំនីមួយៗនៃព្រះយេស៊ូវគ្រីស្ទ មិនអាចមានការរីកលូតលាស់ទៅបានឡើយ បើអ្នកដឹកនាំរបស់ពួកគេមិនមានការលូតលាស់ខាងវិញ្ញាណទេនោះ ។
ក្រុមកីឡាករនីមួយៗមានកាពីទែន ឬអ្នកដឹកនាំរៀងៗខ្លួន ។ សមាជិកម្នាក់ៗរបស់ក្រុមទាំងនោះអាចមានតម្លៃស្មើគ្នា ប៉ុន្តែ ពួកគេត្រូវមានអ្នកដឹកនាំ ។ បើគ្មានកាពីទែនទេ ក្រុមកីឡាករនឹងបាត់បង់ទិសដៅ ហើយច្រើនតែខ្វះវិន័យ ដែលពួកគេត្រូវមាន ដើម្បីប្រកួតឈ្នះ ។ ការប្រគំតន្ត្រីក៏មានលក្ខណៈដូចនេះផងដែរ បើគ្មានអ្នកដឹកនាំវង់តន្ត្រីទេ ការប្រគំតន្ត្រីអាចបាត់បង់ភាពស៊ីសង្វាក់ និងភាពចុះសម្រុងគ្នា ។
អ្នកដឹកនាំពិតជាមានតួនាទីដ៏ចាំបាច់ ក្នុងផ្នែកនីមួយៗនៃជីវិត ហើយរាស្រ្តរបស់ព្រះក៏ត្រូវការអ្នកដឹកនាំផងដែរ ។ ព្រះយេស៊ូវគឺជាអ្នកដឹកនាំរបស់ពួកសាវ័កទាំង១២នាក់ ។ កាលព្រះអង្គយាងឡើងស្ថានសួគ៌វិញ សាវ័កពេត្រុស និងយ៉ាកុបក៏បានក្លាយជាអ្នកដឹកនាំរបស់ពួកសាវ័ក និងពួកជំនុំនៅទីក្រុងយេរូសាឡិម ។ ពួកសាវ័កក៏បានបង្កើតឲ្យមានអ្នកដឹកនាំ ក្នុងពួកជំនុំតាមតំបន់ផ្សេងៗ ។ កាលសាវ័កប៉ុលសរសេរសំបុត្រផ្ញើទៅលោក ទីតុស គាត់មានការគិតគូរយ៉ាងម៉ត់ចត់អំពីប្រភេទបុរស ដែលត្រូវទទួលការតែងតាំងធ្វើជាអ្នកដឹកនាំពួកជំនុំ (ទីតុស ១:៥-៩) ។ បើពួកគេបានជ្រើសរើសមនុស្សខុសឲ្យធ្វើជាអ្នកដឹកនាំ នោះពួកជំនុំនឹងទទួលរងផលវិបាកដែលពិបាកស្តាឡើងវិញ ។ ហើយនៅពេលដែលគាត់នៅសល់ពេលវេលាតិចតួច នៅជិតទីក្រុងអេភេសូរ គាត់ក៏បានស្នើ «ពួកចាស់ទុំក្នុងពួកជំនុំ» នៅទីក្រុងអេភេសូរ ឲ្យទៅលើកទឹកចិត្តពួកជំនុំនៅទីក្រុងពីមីលេត ។
បើគ្មានអ្នកដឹកនាំល្អទេ ភាពវឹកវរងាយនឹងកើតឡើង ។ បញ្ហាជាច្រើនដែលមិនអាចដោះស្រាយបាន ក្នុងជីវិតនៃពួកជំនុំក្នុងតំបន់ អាចបណ្តាលមកពីអ្នកដឹកនាំមិនល្អ ។ ផ្ទុយទៅវិញ យើងអាចដឹងថា អ្នកដឹកនាំដែលមានប្រសិទ្ធភាពនាំមកនូវដំណោះស្រាយដ៏ល្អសម្រាប់បញ្ហាក្នុងពួកជំនុំ ស្ទើរតែគ្រប់ពេលទាំងអស់ ។
បើភាពជោគជ័យពឹងផ្អែកទៅលើគុណភាពនៃអ្នកដឹកនាំ នោះគ្រីស្ទបរិស័ទគួរតែខ្វល់យ៉ាងខ្លាំង អំពីអ្នកដឹកនាំ ក្នុងពួកជំនុំរបស់ពួកគេ ។ ព្រះគ្រីស្ទបានបង់ថ្លៃលោះពួកជំនុំ ដោយព្រះលោហិតទ្រង់ ហើយព្រះទ្រង់សព្វព្រះទ័យនឹងបង្ហាញសិរីល្អរបស់ទ្រង់ដល់លោកិយ និងពិភពខាងវិញ្ញាណ តាមរយៈពួកជំនុំ (អេភេសូរ ៣:១០) ។ ដូចនេះ ចូរចំណាយពេលអធិស្ឋានឲ្យអ្នកដឹកនាំរបស់អ្នក ។ ចូរពិចារណាអំពីរបៀបដែលអ្នកអាចលើកទឹកចិត្តពួកគេយ៉ាងសកម្ម ឲ្យមានចិត្តស្មោះត្រង់ និងឧស្សាហ៍ ក្នុងការងាររបស់ពួកគេ ។ ចូរឲ្យអ្នកដឹកនាំមានអំណរ មិនមែនស្រែកថ្ងូរ ក្នុងការដឹកនាំអ្នកឡើយ (ហេព្រើរ ១៣:១៧) ដើម្បីប្រយោជន៍ពួកគេ និងប្រយោជន៍របស់អ្នក ។
ខគម្ពីរជញ្ជឹងគិត៖ កិច្ចការ ២០:១៧-៣៥
គម្រោងអានព្រះគម្ពីររយៈពេល១ឆ្នាំ៖ យ៉ូប ២៨-២៩ និង ១កូរិនថូស ១០:១-១៨