ព្រះទ្រង់អាចបំបាត់ការសង្ស័យរបស់យើង
ដោយAlistair Begg
May 3, 2026
«ហើយថា ទ្រង់បានលេចមកឲ្យកេផាសឃើញ រួចដល់ពួក១២នាក់ដែរ ក្រោយទៀត ទ្រង់លេចមកឲ្យពួកបងប្អូនជាង៥០០នាក់ឃើញតែម្ដង ជាពួកដែលមានគ្នាច្រើនរស់នៅ ដរាបដល់សព្វថ្ងៃនេះ តែមានខ្លះបានដេកលក់ទៅហើយ ក្រោយទៀត ទ្រង់លេចមកឲ្យយ៉ាកុបឃើញ ក៏ឲ្យពួកសាវកទាំងអស់គ្នាឃើញដែរ រួចទ្រង់បានលេចមកឲ្យខ្ញុំឃើញ ជាខាងក្រោយគេបង្អស់ ដូចជាលេចមកដល់កូនកើតមុនកំណត់ដែរ» ។ ១កូរិនថូស ១៥:៥-៨
តើអ្នកធ្លាប់មានអារម្មណ៍រង្គោះរង្គើ ក្នុងជំនឿរបស់អ្នកទេ ? នៅពេលអ្នកកំពុងអធិស្ឋាន នៅពេលយប់ អ្នកប្រហែលជាមានគំនិតដែលមិនគួរគិតឃើញថា អ្នកកំពុងតែដើរចូលទៅក្នុងភាពងងឹត ។ ពុំនោះទេ អ្នកប្រហែលជាមានអារម្មណ៍មិនស្រួល ខណៈពេលដែលអ្នកឆ្ងល់ថា តើអ្នកប្រកាសថា អ្នកជឿព្រះយេស៊ូវ ដោយសារអ្នកគ្រាន់តែទៅព្រះវិហារតាមគេតាមឯង នៅថ្ងៃអាទិត្យឬយ៉ាងណា ។
បទគម្ពីរ ១កូរិនថូស ១៥:៥-៨ ត្រូវបាននិពន្ធឡើង ដើម្បីលើកឡើង អំពីការព្រួយបារម្ភ និងអារម្មណ៍ប្រភេទនេះ ។ សាវ័កប៉ុលបានធ្វើបន្ទាល់ដល់យើង អំពីការដែលព្រះយេស៊ូវបង្ហាញអង្គទ្រង់ បន្ទាប់ពីព្រះអង្គមានព្រះជន្មរស់ឡើងវិញ ។ លោក កៃផាស (ពេត្រុស) យ៉ាកុប ប៉ុល និងសាវ័កផ្សេងទៀត ព្រមទាំងមនុស្ស៥០០នាក់ បានឃើញព្រះអម្ចាស់យេស៊ូវ ដោយភ្នែកផ្ទាល់ បន្ទាប់ពីព្រះអង្គមានព្រះជន្មរស់ឡើងវិញ ។ សាវ័កប៉ុលបានចង្អុលបង្ហាញយើងឲ្យងាកទៅរកស្មរបន្ទាល់ទាំងនោះ ដើម្បីជួយយើងឲ្យមានជំនឿ ផ្អែកទៅលើការពិតនោះ ។
តើការពិតអ្វី ? គឺការពិតដែលថា យើងត្រូវមានការបកស្រាយ អំពីផ្នូររបស់ព្រះយេស៊ូវដែលនៅទទេ ។ គេក៏ត្រូវយល់អំពីហេតុផលដែលពួកសាវ័កត្រូវផ្លាស់ប្តូរពីការលាក់ខ្លួន ក្នុងផ្ទះមួយខ្នង នៅទីក្រុងយេរូសាឡិម ដោយសារខ្លាចពួកសាសន៍យូដា (យ៉ូហាន ២០:១៩) ប្រែក្លាយទៅជាឈរនៅតាមផ្លូវនៅក្នុងទីក្រុងនោះ ដោយប្រកាសអំពីការមានព្រះជន្មរស់ឡើងវិញរបស់ព្រះយេស៊ូវ ដោយចិត្តក្លាហាន (កិច្ចការ ២:១៤-៤០) ។ ហើយគេក៏ត្រូវបកស្រាយអំពីបុព្វហេតុដែលនាំឲ្យពួកជំនុំកើតមានផងដែរ ។ ព្រះគម្ពីរប៊ីបបានចែងច្បាស់ថា គេត្រូវធ្វើការបកស្រាយផ្អែកទៅលើការមានព្រះជន្មឡើងវិញរបស់ព្រះគ្រីស្ទ ។ ក្នុងប្រវត្តិសាស្ត្រមនុស្សជាតិ ការព្យាយាមពន្យល់អំពីការពិតទាំងនេះ មិនអាចទទួលយកបានឡើយ បើសិនជាមិនផ្អែកទៅលើការមានព្រះជន្មរស់ឡើងវិញរបស់ព្រះគ្រីស្ទទេនោះ ។
ការមានព្រះជន្មរស់ឡើងវិញរបស់ព្រះរាជបុត្រានៃព្រះ គឺជាចំណុចស្នូលនៃព្រឹត្តិការណ៍ប្រវត្តិសាស្រ្តពិភពលោក និងជាមូលដ្ឋានគ្រឹះនៃសេចក្តីជំនឿរបស់យើង ហើយសាវ័កប៉ុលបានទទួលស្គាល់ថា យើងត្រូវជឿ ដោយមានមូលដ្ឋានដែលសមហេតុផល ។ គាត់បានរៀបរាប់ឈ្មោះស្មរបន្ទាល់ដែលបានឃើញព្រះអង្គ ដើម្បីកាលណាយើងអានព្រះគម្ពីរប៊ីប ក្នុងពេលសព្វថ្ងៃ ទោះរឿងនោះបានកន្លងផុតទៅ២ពាន់ឆ្នាំហើយក៏ដោយ ក៏យើងនៅតែអាចដឹងសេចក្តីពិតដែរថា សេចក្តីជំនឿមិនបានច្នៃបង្កើតភស្តុតាងនៃការមានព្រះជន្មឡើងវិញរបស់ព្រះយេស៊ូវឡើយ ។ តែភស្តុតាងនៃការមានព្រះជន្មឡើងវិញបានបង្កើតឲ្យមានសេចក្តីជំនឿ ។
ដូចនេះ ពេលណាអ្នកមានអារម្មណ៍រង្គោះរង្គើក្នុងសេចក្តីជំនឿ ពេលណាអ្នកមានអារម្មណ៍មិនស្រួលក្នុងចិត្ត ចូរចាំថា ជំនឿរបស់គ្រីស្ទបរិស័ទមានមូលដ្ឋានគ្រឹះដែលសមហេតុផល និងមានលក្ខណៈប្រវត្តិសាស្រ្ត ។ ព្រះទ្រង់បានចាក់បង្ហូរព្រះវិញ្ញាណរបស់ព្រះអង្គ ហើយបើកបង្ហាញព្រះបន្ទូលព្រះអង្គ ដើម្បីឲ្យអ្នកជឿច្បាស់ ។ ចូរអធិស្ឋានសូមព្រះទ្រង់បំបាត់ការសង្ស័យរបស់អ្នក ដោយអំណោយនៃសេចក្តីជំនឿ ហើយមើលទៅការមានព្រះជន្មឡើងវិញរបស់ព្រះអង្គ ដ្បិត ទាល់តែយ៉ាងនេះ ទើបអ្នកអាចរកឃើញជំនឿដែលជំរុញដោយការពិត ហើយទំនុកចិត្តរបស់អ្នកក៏ផ្អែកទៅលើសេចក្តីពិត ។
ខគម្ពីរជញ្ជឹងគិត៖ ១កូរិនថូស ១៥:១៤-២៨
គម្រោងអានព្រះគម្ពីររយៈពេល១ឆ្នាំ៖ ជនគណនា ១៥-១៦ និង វិវរណៈ ២០