ព្រះបន្ទូលសម្រាប់អ្នករៀបផែនការ
ដោយAlistair Begg
June 8, 2026
«ឥឡូវនេះ ឯពួកអ្នកដែលថា ថ្ងៃនេះ ឬថ្ងៃស្អែក យើងនឹងទៅឯក្រុងណាមួយ ហើយនឹងនៅស្រុកនោះអស់១ឆ្នាំ ដើម្បីនឹងរកស៊ីឲ្យបានចំណេញ អ្នករាល់គ្នាមិនដឹងជានឹងកើតមានយ៉ាងណាដល់ថ្ងៃស្អែកទេ» ។ យ៉ាកុប ៤:១៣-១៤
ការរៀបផែនការសម្រាប់ពេលអនាគត មិនមែនជាទង្វើខុសឆ្គងទេ ។ លោកគ្រូ ចន វេសលី (John Wesley) ជាគ្រូផ្សាយដំណឹងល្អដ៏ល្បីល្បាញ ក៏បានប្រើផែនការប្រចាំថ្ងៃ សម្រាប់ពេល២០នាទី រៀងរាល់ម៉ោង ដើម្បីឲ្យប្រាកដថា គាត់មិនបានប្រើពេលវេលា១ភាគ៣ នៃម៉ោងនីមួយៗ ដោយមិនបានក្រើនរំឭកខ្លួនឯងអំពីការងារបម្រើនគរព្រះនោះឡើយ ។ ប៉ុន្តែ ក្នុងបទគម្ពីរខាងលើនេះ លោក យ៉ាកុបបាននិយាយទៅកាន់បុរសស្ត្រី ក្នុងជំនាន់នីមួយៗ ដែលញាណនឹងប្រតិទិនរបស់ខ្លួន ដែលមិនអាចអត់ពីទូរស័ព្ទរបស់ពួកគេបាន ហើយរស់នៅ ដោយការភ័យខ្លាចផែនដីឈប់វិល ប្រសិនបើពួកគេមិនបានរៀបផែនការទុកជាមុនទេនោះ ។
នៅក្នុងរឿងនេះ យើងត្រូវទទួលស្គាល់ការពិតដែលថា គ្មាននរណាម្នាក់ដឹងអំពីពេលអនាគតទេ ។ តើថ្ងៃស្អែកមេឃស្រឡះទេ? តើអ្នកនឹងធ្វើដំណើរទៅដល់គោលដៅទាន់ពេលវេលាទេ? តើចរាចរណ៍នឹងកកស្ទះជាធម្មតា ហើយធ្វើឲ្យអ្នកយឺតយ៉ាវ ខុសផែនការទេ? យើងអាចរៀបផែនការឲ្យបានល្អបំផុត តាមដែលអាចធ្វើទៅបាន ប៉ុន្តែ ទីបំផុត ផែនការល្អបំផុតរបស់យើង មិនមែនសុទ្ធតែបានសម្រេចនោះឡើយ ។ ជាការពិតណាស់ យើងជួបបញ្ហានេះជាប្រចាំទៅហើយ ។ ការសន្និដ្ឋានអំពីពេលអនាគតទុកជាមុន គឺជាទង្វើដ៏ល្ងង់ខ្លៅ នៅពេលដែលយើងមិនអាចដឹងអំពីពេលអនាគត ។
ការប្រឈមមុខដាក់ការពិតនេះ នាំមកនូវលទ្ធផលពីរយ៉ាង ។ ទីមួយ ការនេះគួរតែធ្វើឲ្យយើងបន្ទាបខ្លួន ។ កណ្ឌគម្ពីរយ៉ាកុបបានរំឭកយើងរួចហើយថា «ព្រះទ្រង់ទាស់ទទឹងនឹងពួកមានឫកធំ តែទ្រង់ផ្ដល់ព្រះគុណមកពួករាបសាវិញ» (យ៉ាកុប ៤:៦) ហើយក៏បានត្រាស់ហៅយើងឲ្យបន្ទាបខ្លួន នៅចំពោះព្រះអម្ចាស់ ហើយព្រះអង្គនឹងលើកយើងឡើង (ខ.១០) ។ ឥឡូវនេះ បទគម្ពីរនេះបានរំឭកយើងថា យើងមិនគួរដណ្តើមការគ្រប់គ្រងពីព្រះអង្គឡើយ ដ្បិតយើងមិនអាចគ្រប់គ្រងពេលអនាគតបានទេ ។ ការឆ្លើយតបរបស់យើងចំពោះការរំខាន និងការខកចិត្ត គឺបានបង្ហាញថា យើងពិតជាបានយល់សេចក្តីពិតនេះឬអត់ ។
ទីពីរ ការមិនដឹងអំពីពេលថ្ងៃស្អែក គួរតែមានប្រយោជន៍ចំពោះយើង ដ្បិតព្រះអង្គបានលាក់ មិនឲ្យយើងដឹងអំពីពេលអនាគត ដើម្បីប្រយោជន៍យើង និងដើម្បីសិរីល្អទ្រង់ ។ បើយើងបានដឹងអំពីភាពជោគជ័យណាមួយ កំពុងរង់ចាំយើង យើងប្រហែលជាមានចិត្តអន្ទះសាចង់អួតសំញែង និងមានមោទនភាពចំពោះខ្លួនឯង ។ ដូចនេះ យើងគួរតែអរព្រះគុណព្រះ ដែលយើងមិនរស់នៅ ដោយដឹងអំពីការជំពប់ដួល និងទុក្ខលំបាក ការភ័យខ្លាច និងបរាជ័យ ភាពសោកសៅ និងការខូចចិត្ត នៅពេលអនាគត ពីព្រោះយើងត្រូវសួរខ្លួនឯងថា តើយើងនឹងទទួលបានអត្ថប្រយោជន៍អ្វីខ្លះពីការដឹងទាំងអស់នេះ? បើយើងដឹងថា ព្រះទ្រង់ជ្រាបអំពីពេលអនាគត នោះគឺគ្រប់គ្រាន់ហើយ ។
ហេតុនេះហើយ ចូរចាំថា ព្រះអាទិករបានបង្កើត និងប៉ាន់ឆ្នៃអ្នក ហើយប្រទានដល់អ្នកនូវសមត្ថភាពគ្រប់យ៉ាង ព្រមទាំងរូបសម្បត្តិ និងឱកាសនីមួយៗ ។ ព្រះអង្គបានរៀបចំជីវិតអ្នក រហូតមកដល់ពេលសព្វថ្ងៃ ហើយនឹងបន្តរៀបចំ រហូតដល់ពេលដែលអ្នកបានទៅនៅជាមួយព្រះអង្គ ។ ហេតុនេះហើយ អ្នកអាចអរសប្បាយ នៅក្នុងការអ្វីដែលអ្នកមិនបានដឹង ។ នៅក្នុងអាថ៌កំបាំង មានភាពស្រស់ស្អាត ។ អ្នកត្រូវដឹងថា ព្រះអង្គកំពុងរៀបចំអ្វីៗទាំងអស់ ហើយនឹងសម្រេចគោលបំណង នៅក្នុង និងតាមរយៈជីវិតអ្នក ទោះថ្ងៃស្អែកនឹងមានរឿងអ្វីកើតឡើងក៏ដោយ ។ ការមានទស្សនៈដូចនេះ នឹងជួយឲ្យអ្នកមើលទៅផែនការសម្រាប់ថ្ងៃនេះ និងថ្ងៃស្អែក និងពេលអនាគតពេញមួយជីវិតអ្នក ហើយនិយាយដោយបន្ទាបខ្លួនថា «បើយើងរស់នៅ ហើយព្រះអម្ចាស់ទ្រង់សព្វព្រះហឫទ័យ នោះយើងនឹងធ្វើការនេះ ឬការនោះ» (យ៉ាកុប ៤:៥) ។
ខគម្ពីរជញ្ជឹងគិត៖ យ៉ូប ៣៩
គម្រោងអានព្រះគម្ពីររយៈពេល១ឆ្នាំ៖ យេរេមា ៩-១១ និង ម៉ាថាយ ២២:១-២២