ការយល់អត្ថន័យនៃសេរីភាពក្នុងព្រះគ្រីស្ទ
ដោយAlistair Begg
July 10, 2026
«ឯក្រិត្យវិន័យរបស់ព្រះយេហូវ៉ានោះគ្រប់លក្ខណ៍ ក៏កែព្រលឹងឡើងវិញ សេចក្ដីបន្ទាល់នៃព្រះយេហូវ៉ាជាពិត ក៏ធ្វើឲ្យមនុស្សខ្លៅល្ងង់មានប្រាជ្ញា ។ សេចក្ដីបញ្ញត្តរបស់ព្រះយេហូវ៉ាសុទ្ធតែទៀងត្រង់ ក៏បណ្ដាលឲ្យចិត្តរីករាយសប្បាយ ក្រិត្យក្រមនៃព្រះយេហូវ៉ាជាសុទ្ធសាធ ក៏បំភ្លឺភ្នែក ... មួយទៀត ទូលបង្គំ ជាអ្នកបំរើទ្រង់ ក៏ចេះប្រយ័ត ដោយសារសេចក្ដីទាំងនោះដែរ ហើយដែលកាន់តាម នោះក៏មានរង្វាន់យ៉ាងធំ» ។ ទំនុកដំកើង ១៩:៧-៨
ជាញឹកញាប់ គ្រីស្ទបរិស័ទច្រើនតែមានទំនាក់ទំនងដែលពិបាកយល់ ជាមួយក្រឹត្យវិន័យរបស់ព្រះ ។
ជួនកាល យើងអនុវត្តមិនបានត្រឹមត្រូវ តាមការបង្រៀនរបស់សាវ័កប៉ុលដែលថា យើងមិនស្ថិតនៅក្រោមក្រឹត្យវិន័យ ប៉ុន្តែ យើងស្ថិតនៅក្រោមព្រះគុណព្រះវិញ (រ៉ូម ៦:១៤) តែយើងយល់ឃើញថា ក្រឹត្យវិន័យទាំងនោះ គឺសម្រាប់តែគ្រាសញ្ញាចាស់ទេ ។ កាលនោះ គេយល់ខុសថា រាស្រ្តរបស់ព្រះធ្វើតាមក្រឹត្យវិន័យដប់ប្រការ ប៉ុន្តែ ឥឡូវ យើងអាចធ្វើអ្វីក៏បាន ព្រោះយើងរស់នៅក្នុងសេរីភាព ។ ប៉ុន្តែ បើយើងមានទស្សនៈដូចនេះ យើងពិបាកយល់ អំពីសេចក្តីស្រឡាញ់ដែលអ្នកនិពន្ធកណ្ឌគម្ពីរទំនុកដំកើង មានចំពោះក្រឹត្យវិន័យរបស់ព្រះ ។ គាត់មិនបានចាត់ទុកក្រឹត្យវិន័យជាអ្វីដែលគាត់ត្រូវតែធ្វើប៉ុណ្ណោះទេ តែក៏បានទទួលស្គាល់ថា ក្រឹត្យវិន័យគឺជាប្រភពនៃការស្អាងឡើងវិញ និងក្តីអំណរ ព្រមទាំងព្រះពរ ។ អ្នកជឿព្រះក្នុងពេលបច្ចុប្បន្ន ក៏ត្រូវមានទស្សនៈដូចនេះផងដែរ ។ ជាការពិតណាស់ យើងមិនស្ថិតនៅក្រោមក្រឹត្យវិន័យ ដើម្បីឲ្យព្រះទ្រង់ទទួលយកយើងទៀតទេ តែយើងនៅតែមើលឃើញថា ក្រឹត្យវិន័យគឺជាមធ្យោបាយសម្រាប់ឲ្យយើងរស់នៅថ្វាយព្រះ ។ ព្រះទ្រង់បានលោះយើង ដើម្បីឲ្យយើងអាចក្លាយជាផលដំបូងនៃស្នាព្រះហស្តថ្មីរបស់ព្រះអង្គ ដែលថ្វាយជីវិតដាច់ដល់ព្រះ ដោយធ្វើតាមបំណងព្រះទ័យទ្រង់ ហើយនិយាយរួម យើងរកឃើញបំណងព្រះទ័យទ្រង់ ក្នុងក្រឹត្យវិន័យរបស់ទ្រង់!
ព្រះយេស៊ូវបានប្រាប់យើងថា «បើអ្នករាល់គ្នានៅជាប់ក្នុងពាក្យខ្ញុំ នោះអ្នករាល់គ្នាជាសិស្សខ្ញុំមែន អ្នករាល់គ្នានឹងស្គាល់សេចក្ដីពិត ហើយសេចក្ដីពិតនោះនឹងប្រោសឲ្យអ្នករាល់គ្នាបានរួច» (យ៉ូហាន ៨:៣១-៣២) ។ យើងអាចដកពិសោធន៍ជាមួយអំណាចនៃព្រះបន្ទូលព្រះដែលរំដោះយើងឲ្យមានសេរីភាព នៅពេលណាយើងប្រកាន់ខ្ជាប់តាមសេចក្តីពិត ដោយការស្តាប់បង្គាប់តាមព្រះបន្ទូលព្រះយេស៊ូវ ។ សាវ័កយ៉ាកុបបានពិពណ៌នាថា ក្រឹត្យវិន័យរបស់ព្រះល្អឥតខ្ចោះ ហើយផ្តល់ឲ្យយើងនូវសេរីភាព (យ៉ាកុប ១:២៥) ។ ក្នុងព្រះគ្រីស្ទ ក្រឹត្យវិន័យនោះ មិននៅក្រៅខ្លួនយើង ក្នុងលក្ខណៈអក្សរដែលបានចារនៅលើបន្ទះថ្មទៀតទេ ។ តែសព្វថ្ងៃនេះ ក្រឹត្យវិន័យទ្រង់បានចារនៅក្នុងចិត្តយើង ដូចមានសេចក្តីចែងថា «ព្រះវិញ្ញាណបរិសុទ្ធ ក៏ធ្វើបន្ទាល់ដល់យើងដែរ ...«ឯសេចក្ដីសញ្ញា ដែលអញនឹងតាំងដល់គេក្រោយគ្រានោះ គឺថាអញនឹងដាក់ក្រិត្យវិន័យអញនៅក្នុងចិត្តគេ ហើយនឹងកត់ទុកនៅក្នុងគំនិតគេផង»» (ហេព្រើរ ១០:១៥-១៦) ។
អ្វីដែលយើងត្រូវយល់នោះគឺ សេរីភាពដែលយើងមានក្នុងព្រះគ្រីស្ទ បានចងភ្ជាប់ដោយផ្ទាល់ជាមួយនឹងការសម្រេចចិត្តរបស់យើង ។ មនុស្សដែលមិនស្តាប់បង្គាប់ គិតស្មានថា ខ្លួនមានសេរីភាព ប៉ុន្តែ តាមពិត ពួកគេកំពុងនៅជាប់ក្នុងចំណងរបស់បាប ។ មនុស្សដែលស្តាប់បង្គាប់ អាចមានអារម្មណ៍ថា មានការឃាត់ឃាំងពួកគេ ប៉ុន្តែ ពួកគេរស់នៅក្នុងសេរីភាព មិនមែនជាទាសកររបស់និស្ស័យសាច់ឈាមទៀតទេ ។ ពេលណាយើងមានការស្តាប់បង្គាប់កាន់តែខ្លាំង យើងក៏មានសេរីភាពកាន់តែខ្លាំង ព្រោះកាលណាយើងស្តាប់បង្គាប់ព្រះអាទិកររបស់យើងកាន់តែខ្លាំង ដែលទ្រង់បានប្រាប់មនុស្សដែលព្រះអង្គបានបង្កើត ឲ្យអរសប្បាយនឹងព្រះពរ (លោកុប្បត្តិ ១:២៨) នោះយើងក៏រស់នៅជាមនុស្ស ដែលកាន់តែសមស្របនឹងបំណងព្រះទ័យទ្រង់ ។
អ្នកនិពន្ធកណ្ឌគម្ពីរទំនុកដំកើងយល់អំពីបញ្ហានេះ បានជាគាត់អាចអរសប្បាយនឹងក្រឹត្យវិន័យរបស់ព្រះ ។ យើងក៏ត្រូវអរសប្បាយដូចគាត់ផងដែរ ។ បើអ្នកចង់មានសេរីភាពរួចពីការប្រកាន់ទោសខ្លួនឯង ភាពស្រើបស្រាល ការភ័យខ្លាច ភាពឯកោ ភាពគ្មានគោលដៅ និងភាពទទេ អ្នកត្រូវតែនៅជាប់ក្នុងសេចក្តីពិត ។ នៅពេលដែលអ្នកដើរដោយស្តាប់បង្គាប់ក្រឹត្យវិន័យរបស់ព្រះ អ្នកនឹងរកឃើញសេរីភាព ដែលធ្វើឲ្យវិញ្ញាណអ្នកមានកម្លាំងឡើងវិញ ដោយនាំមកនូវក្តីអំណរគ្មានទីបញ្ចប់ និងព្រះពរលើសការស្រមៃរបស់អ្នក ។ តើអ្នកមានការពិបាក ក្នុងការរស់នៅក្រោមក្រឹត្យវិន័យរបស់ព្រះ នៅថ្ងៃនេះ ដូចម្តេចខ្លះ? អ្នកនឹងបានដកពិសោធន៍នឹងសេរីភាព ដែលបានពីការស្តាប់បង្គាប់ ។
ខគម្ពីរជញ្ជឹងគិត៖ យេរេមា ៣១:៣១-៣៤
គម្រោងអានព្រះគម្ពីររយៈពេល១ឆ្នាំ៖ នាងរស់ និង កិច្ចការ ៨:២៦-៤០