តើព្រះគង់នៅទីណា?
ដោយAlistair Begg
July 20, 2026
«រីឯនៅគ្រាអ័ហាស៊ូរុស ជាស្តេចដែលសោយរាជ្យលើ១២៧ខេត្ត ចាប់តាំងពីស្រុកក្លិង្គ រហូតដល់អេធីយ៉ូពី ក្នុងគ្រានោះ កាលស្តេចអ័ហាស៊ូរុសទ្រង់គង់លើបល្ល័ង្ករាជ្យនៅស៊ូសាន ជាទីក្រុងហ្លួង 3គឺនៅឆ្នាំទី៣ក្នុងរាជ្យទ្រង់ នោះទ្រង់បានជប់លៀងដល់ពួកអ្នកជាប្រធាន នឹងពួកជំនិតទ្រង់ មានទាំងពួកមេទ័ពសាសន៍ពើស៊ី នឹងសាសន៍មេឌី ពួកអ្នកធំ នឹងពួកចៅហ្វាយខេត្តទាំងប៉ុន្មាននៅចំពោះទ្រង់ដែរ» ។ នាងអេសធើរ ១:១-៣
តាមធម្មតា ពេលគេអានកណ្ឌគម្ពីរនាង អេសធើរ គេច្រើនតែឆ្លើយតប ដោយការឆ្ងល់ថា «តើកណ្ឌគម្ពីរនេះបានចែងអំពីព្រះនៅត្រង់ចំណុចណា?» ក្នុងព្រះគម្ពីរប៊ីប មានតែកណ្ឌគម្ពីរពីរប៉ុណ្ណោះ ដែលមិនបានបញ្ចេញព្រះនាមព្រះ ។ (កណ្ឌគម្ពីរមួយទៀត គឺកណ្ឌគម្ពីរបទចម្រៀងសាឡូម៉ូន) ។ ហេតុអ្វីកណ្ឌនេះមិននិយាយអំពីព្រះ? អ្នកកាត់ស្រាយ និងអ្នកជំនាញផ្នែកព្រះគម្ពីរ មានការពន្យល់ផ្សេងៗគ្នា អំពីមូលហេតុដែលកណ្ឌនេះមិននិយាយចេញព្រះនាមព្រះ ប៉ុន្តែ មូលហេតុជាមូលដ្ឋាន អាចមានភាពសាមញ្ញបំផុត គឺដោយសារព្រះអង្គមិនសព្វព្រះទ័យឲ្យមានព្រះនាមព្រះអង្គក្នុងកណ្ឌនោះ ។ ប៉ុន្តែ ការនេះនាំឲ្យយើងសួរសំណួរធំជាងនេះទៀតថា ហេតុអ្វីព្រះទ្រង់មិនសព្វព្រះទ័យបញ្ចេញព្រះនាមទ្រង់ ក្នុងរឿងនាង អេសធើរ?
ប្រហែលមកពីព្រះទ្រង់សព្វព្រះទ័យនឹងបង្រៀនយើងថា ក្នុងជីវិត ពេលខ្លះព្រះអង្គហាក់ដូចជាអវត្តមាន តែព្រះអង្គនៅតែគង់នៅជាមួយជានិច្ច ។ លោកគ្រូ ឆាល ស្ព័រជិន (Charles Spurgeon)បានសរសេរថា «ទោះយើងមិនឃើញព្រះនាមព្រះកត់ទុកក្នុងកណ្ឌគម្ពីរនាងអេសធើរក៏ដោយ ក៏ព្រះអម្ចាស់មានព្រះវត្តមានគង់នៅក្នុងរឿងនោះ ក្នុងហេតុការណ៍ទាំងអស់ ដោយយើងមិនអាចប្រកែកបាន... គឺប្រៀបដូចជារូបផ្ទាំងគំនូរដែលគេគូរបានល្អឥតខ្ចោះ បានជាគេអាចមើលស្គាល់រូបមនុស្សក្នុងគំនូរនោះ ដោយមិនចាំបាច់ត្រូវការគេសរសេរឈ្មោះគាត់ នៅលើផ្ទាំងគំនូរនោះ ។ អ្នកអាចមើលស្គាល់ថា មនុស្សក្នុងផ្ទាំងគំនូរនោះជានរណា ពេលអ្នកបានឃើញផ្ទាំងគំនូរនោះ ។ ដូចគ្នានេះដែរ ព្រះហស្តរបស់ព្រះអម្ចាស់បានធ្វើការ ក្នុងរឿងនាងអេសធើរក្នុងគ្រប់ឆាកទាំងអស់ សូម្បីតែនៅក្រោយឆាកក៏ដោយ» ។ 58
ដូចនេះ ព្រះនាមព្រះមិនមានកត់ទុកក្នុងរឿងនាងអេសធើរ តែមានភស្តុតាងបញ្ជាក់ច្បាស់ថា ព្រះវត្តមានរបស់ព្រះអង្គ បានគង់នៅក្នុងរឿងនេះ ។ ព្រះអង្គកំពុងធ្វើការ នៅពេលដែលក្សត្រីរបស់ចក្រភពពើស៊ី ព្រះនាមវ៉ាសធី បានបដិសេធន៍មិនព្រមមកគាល់ស្តេច តាមបង្គាប់ទ្រង់ (នាងអេសធើរ ១:១២) ។ ព្រះអម្ចាស់ក៏កំពុងធ្វើការ ក្នុងពេលដែលព្រះអង្គបានឲ្យនាង អេសធើរចាប់កំណើតមក មានរូបឆោមឆាយស្រស់ល្អ (២:៧) ហើយឈ្មោះនាង បានក្លាយជាចំណងជើងនៃកណ្ឌគម្ពីរនេះ ។ ព្រះអង្គក៏កំពុងធ្វើការ នៅពេលដែលស្តេចផ្ទំមិនលក់ ហើយក៏បានឲ្យគេយកសៀវភៅឲ្យទ្រង់អាន (៦:១) ។ ព្រះអង្គក៏កំពុងធ្វើការ នៅពេលផែនការអាក្រក់របស់លោក ហាម៉ាន ជាមន្ត្រីធំបំផុតរបស់ស្តេចបានបរាជ័យ (៨:៧-៨,១៧) ។ នាង អេសធើរបានរស់នៅ ក្នុង «សម័យស្តេចអ័ហាស៊ូរុស» ជាស្តេចពើស៊ីដែលមានអំណាចយ៉ាងខ្លាំង ។ ប៉ុន្តែ នាងក៏រស់នៅក្នុងសម័យរបស់ព្រះអាទិករដ៏មានចេស្តា ដែលកំពុងគ្រងរាជពីស្ថានសួគ៌មក ។ ហើយយើងក៏កំពុងរស់នៅក្នុងសម័យនោះផងដែរ ។
នៅពេលដែលយើងបានដឹងអំពីដំណាក់កាលនីមួយៗរបស់រឿងនៃជីវិត យើងក៏បានដឹងថា ព្រះទ្រង់តែងតែគង់នៅក្នុងរឿងដែលតូច និងសាមញ្ញបំផុត ។ កណ្ឌគម្ពីរនាង អេសធើរបានបង្ហាញច្បាស់ថា ព្រះអង្គមានវត្តមាន មិនគ្រាន់តែនៅក្នុង «ផ្លេកបន្ទោរ» នៃការធ្វើអន្តរាគមន៍របស់ព្រះ នៅក្នុងការញែកទឹកសមុទ្រក្រហម (និក្ខមនំ ១៤) ឬការធ្វើឲ្យខ្យល់ព្យុះស្ងប់ (ម៉ាកុស ៤:៣៥-៤១) ប៉ុន្តែ ក៏នៅក្នុងភាពសាមញ្ញនៃជីវិតយើងផងដែរ ។ ក្នុងហេតុការណ៍ ជារៀងរាល់ថ្ងៃ ព្រះទ្រង់កំពុងសម្រេចគោលបំណងរបស់ព្រះអង្គ ។ អ្នកប្រហែលជាកំពុងតែជាប់នៅក្នុងកាលៈទេសៈ នៃភាពងងឹតដ៏សែនជ្រៅ ដែលព្យាយាមធ្វើឲ្យអ្នកទ្រាំលែងបាន ។ បើដូច្នោះមែន ចូរអធិស្ឋានសូមព្រះទ្រង់ជួយអ្នកឲ្យស្តាប់ឮព្រះបន្ទូលព្រះអង្គ ដែលសន្យាថា «អញនឹងមិនចាកចេញពីឯង ក៏មិនបោះបង់ចោលឯងឡើយ» (ហេព្រើរ ១៣:៥) ហើយក៏បានធានាដល់យើងថា «គ្រប់ការទាំងអស់ផ្សំគ្នា សំរាប់សេចក្ដីល្អដល់ពួកអ្នកដែលស្រឡាញ់ព្រះ គឺដល់ពួកអ្នកដែលទ្រង់ហៅមក តាមព្រះដំរិះទ្រង់» (រ៉ូម ៨:២៨) ហើយត្រាស់ហៅយើងថា «ផ្ទេរបន្ទុករបស់អ្នកទៅលើព្រះយេហូវ៉ា នោះទ្រង់នឹងជួយទប់ទល់អ្នក» (ទំនុកដំកើង ៥៥:២២) ។ នៅពេលដែលព្រះទ្រង់ហាក់ដូចជាអវត្តមានក្នុងជីវិតអ្នក អ្នកត្រូវចាំថា ព្រះអង្គនៅតែធ្វើការក្នុងជីវិតអ្នក ។
ខគម្ពីរជញ្ជឹងគិត៖ ទំនុកដំកើង ៥៥
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ២៦-២៨ និង កិច្ចការ ១៥:១-២១