ត្រាស់ហៅឲ្យមានសកម្មភាព
ដោយAlistair Begg
July 29, 2026
«ម៉ាដេកាយប្រាប់គាត់ ពីគ្រប់ទាំងដំណើរដែលបានកើតមកដល់ខ្លួន នឹងពីចំនួនប្រាក់ដែលហាម៉ានបានសន្យាបញ្ចេញទៅឯឃ្លាំងហ្លួងទាំងប៉ុន្មាន ឲ្យបានបំផ្លាញដល់ពួកសាសន៍យូដា ក៏ឲ្យសំណៅព្រះរាជឱង្ការ១ច្បាប់ ជាសេចក្ដីដែលបានប្រកាសប្រាប់នៅក្រុងស៊ូសាន បង្គាប់ឲ្យសំឡាប់គេ ដល់ភ្នាក់ងារនោះ ឲ្យនាំយកទៅបង្ហាញដល់អេសធើរ ហើយរាប់រៀបទូលព្រះនាងឲ្យជ្រាប ព្រមទាំងផ្ដាំ ឲ្យព្រះនាងចូលទៅ ទូលអង្វរចំពោះស្ដេច ថ្វាយពាក្យសំណូមជំនួសសាសន៍របស់ខ្លួនផង» ។ នាងអេសធើរ ៤:៧-៨
លោក ម៉ាដេកាយ បានដើរទៅមក នៅតាមផ្លូវខាងក្រៅក្លោងទ្វាររាជវាំងរបស់ស្តេចអ័ហាស៊ូរុស ដោយសង្ឃឹមថា នឹងបានទទួលដំណឹងថ្មីៗ ។ ទោះជាយ៉ាងណាក៏ដោយ អ្វីដែលគាត់ឮនៅថ្ងៃនោះ ដូចដែលខគម្ពីរខាងលើបានពិពណ៌នា គឺពិតជាបានធ្វើឲ្យគាត់មានការពិបាកចិត្តខុសពីធម្មតា ព្រោះចក្រភពពើស៊ីហៀបនឹងប្រហារជីវិតជនជាតិយូដាឲ្យវិនាសផុតពូជ ។
ព្រះនាងអេសធើរ ដែលជាប្អូនជីដូនមួយរបស់គាត់ មិនបាននៅក្បែរក្លោងទ្វាររាជវាំងទេ ។ ព្រះនាងកំពុងតែនៅម្នាក់ឯង ក្នុងដំណាក់របស់ព្រះនាង ហើយមិនបានជ្រាបថា មានរឿងអ្វីកំពុងកើតឡើងឡើយ ។ នៅពេលដែលព្រះនាងបានទទួលដំណឹងថា ជនជាតិយូដា រួមទាំងលោក ម៉ាដេកាយ កំពុងសោកសង្រេង អធិស្ឋានតម និងទួញយំ នាងក៏បានឆ្លើយតប ដោយសេចក្តីអាណិត ប៉ុន្តែ ព្រះនាងនៅតែមិនបានដឹងថា មានរឿងអ្វីកំពុងកើតឡើងទេ (នាងអេសធើរ ៤:៣-៥) ។
ម្នាក់បានដឹងអំពីទម្ងន់នៃស្ថានភាពនេះ ហើយម្នាក់ទៀតមិនបានដឹង តែទោះជាយ៉ាងណាក៏ដោយ ទាំងលោក ម៉ាដេកាយ និងព្រះនាងអេសធើរ សុទ្ធតែប្រឈមមុខដាក់សំណួរដ៏សំខាន់ដូចគ្នា ។ តើបុរសដូចលោក ម៉ាដេកាយអាចរស់នៅជាអ្នកជឿព្រះផង និងជាមន្ត្រីដ៏សំខាន់របស់ស្តេច ដោយរបៀបណា? តើព្រះនាងអេសធើរ ដែលគេនាំចូលក្រឡាបន្ទំរបស់ស្តេច អាចយល់អំពីការពិតដែលថា ព្រះនាងមានឈ្មោះជាសាសន៍ពើស៊ីផង និងសាសន៍យូដាផងដោយរបៀបណា? តើព្រះនាងរាប់ខ្លួននាងជារាស្រ្តរបស់ព្រះដែរឬទេ? ឬព្រះនាងសម្រេចព្រះទ័យរស់នៅ ក្នុងភាពដាច់ដោយឡែក ដែលគេបានផ្តល់ឲ្យក្នុងរាជវាំង?
ទីបំផុត លោក ម៉ាដេកាយ មិនអាចអង្គុយរង់ចាំបានឡើយ ។ គាត់បានទាក់ទងអ្នកបម្រើរបស់ព្រះនាងអេសធើរ ហើយក៏បានជួយព្រះនាងឲ្យយល់អំពីរឿងដែលកំពុងកើតឡើង និងអំពីតួនាទីដែលព្រះនាងអាចប្រើប្រាស់ ។
ព្រះនាងអេសធើរបានសម្រេចព្រះទ័យលះបង់ភាពសុខស្រួល ហើយថែមទាំងប្រថុយព្រះជន្មផង ដើម្បីធ្វើអន្តរាគមន៍ជួយសាសន៍របស់ព្រះនាង ។ អ្នកទាំងពីរបានយល់ថា ព្រះទ្រង់មានផែនការ និងអធិបតេយ្យភាពគ្រប់គ្រងអ្វីៗទាំងអស់ តែមិនមានន័យថា អ្នកជឿទ្រង់មិនចាំបាច់ត្រូវទទួលខុសត្រូវ ក្នុងការធ្វើអ្វីដែលត្រឹមត្រូវ និងប្រើឥទ្ធិពល ដែលពួកគេមាន ដើម្បីជួយរាស្រ្តទ្រង់នោះទេ ។
ក្នុងនាមយើងជាមនុស្សដែលជឿលើអធិបតេយ្យភាពរបស់ព្រះ តើយើងគួរតែរស់នៅ ក្នុងលោកិយដែលទាស់ប្រឆាំងនឹងដំណឹងល្អដោយរបៀបណា? ពេលខ្លះ យើងអាចមានអារម្មណ៍ថា យើងមិនមានលទ្ធភាពផ្លាស់ប្តូរវប្បធម៌ ដែលព្យាយាមបំបិទជំនឿរបស់យើង ។ ហើយប្រហែលជាគ្រាន់តែចង់បានភាពសុខស្រួល ដោយបន្តមិនដឹងមិនឮ ដោយជៀសវាងលោកិយនៅជុំវិញយើង ហើយទំនាក់ទំនងតែជាមួយគ្រីស្ទបរិស័ទ ដើម្បីកុំឲ្យពិបាកជម្នះបញ្ហាប្រឈមខាងវប្បធម៌ ។ ប៉ុន្តែ ផែនការរបស់ព្រះ មិនបានត្រាស់ហៅយើង ឲ្យអសកម្មនោះទេ ។ តែបានត្រាស់ហៅឲ្យមានសកម្មភាព ។ ដ្បិតផែនការទ្រង់ ច្រើនតែសម្រេចតាមរយៈភាពក្លាហានរបស់រាស្រ្តទ្រង់ តាមរយៈការដែលពួកគេបដិសេធមិនព្រមឈប់ប្រយុទ្ធ ដើម្បីអ្វីដែលត្រឹមត្រូវ និងល្អ ។ នៅថ្ងៃនេះ ខណៈពេលដែលអ្នកអានព្រះគម្ពីរប៊ីប ចូរព្យាយាមយល់អំពីភាពចាំបាច់ដែលព្រះគម្ពីរប៊ីប នៅតែមានសម្រាប់ព្រឹត្តិការណ៍ក្នុងពិភពលោក នៅពេលសព្វថ្ងៃ ។ ហើយចូរទូលសូមព្រះវិញ្ញាណនៃព្រះបង្ហាញអ្នក អំពីរបៀបដែលព្រះអង្គអាចត្រាស់ហៅអ្នកឲ្យបោះជំហានទៅមុខដោយជំនឿ ប្រឈមនឹងគ្រោះថ្នាក់ ហើយហ៊ានបើកមាត់និយាយ ដើម្បីបុព្វហេតុដំណឹងល្អ និងរាស្រ្តរបស់ព្រះ ។
ខគម្ពីរជញ្ជឹងគិត៖ ម៉ាកុស ៦:១៤-២៩
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៤៩-៥០ និង កិច្ចការ ២០:១-១៦