បើគ្មានព្រះអង្គទេ យើងគ្មានអ្វីល្អឡើយ
ដោយAlistair Begg
August 2, 2026
«ឱព្រះអង្គអើយ សូមការពារទូលបង្គំផង ដ្បិតទូលបង្គំយកទ្រង់ជាទីពឹង ។ ខ្ញុំបានទូលដល់ព្រះយេហូវ៉ាថា ទ្រង់ជាព្រះអម្ចាស់នៃទូលបង្គំ ក្រៅពីទ្រង់ ទូលបង្គំរកសេចក្ដីល្អមិនបានឡើយ» ។ ទំនុកដំកើង ១៦:១-២
តើអ្នកឲ្យតម្លៃអ្វីខ្លាំងជាងគេ ក្នុងជីវិតនេះ? យើងរាល់គ្នាសុទ្ធតែមានអ្វីមួយ ដែលធ្វើឲ្យយើងមានអំណរយ៉ាងខ្លាំង ឬមានទីកន្លែងដែលហាក់ដូចជាត្រូវចិត្តយើង និងផ្តល់ឲ្យនូវការសម្រាក ។ ជួនកាល យើងមានការយល់ដឹងបន្តិចបន្តួច អំពីជីវិត ដែលមិនមានការសប្បាយទាំងនោះនៅលើផែនដីទេ ។ យើងប្រហែលជាយល់ដឹងកាន់តែច្បាស់ថា មានអ្វីខ្លះដែលពិតជាសំខាន់ក្នុងជីវិត នៅពេលដែលយើងប្រឈមមុខនឹងជំងឺ ឬការសោកសង្រេង ដោយសារការបាត់បង់មនុស្សជាទីស្រឡាញ់ ។ រថយន្តរបស់អ្នកមានម៉ាកអ្វី មិនសំខាន់ទេ នៅពេលដែលអ្នកបើកឡានចេញពីមន្ទីរពេទ្យ បន្ទាប់ពីមនុស្សជាទីស្រឡាញ់របស់អ្នកបានពិនិត្យសុខភាពរកឃើញថា គាត់មានជំងឺមហារីកកំរិតធ្ងន់ តើមែនទេ? ភ្លាមៗនោះ សំលៀកបំពាក់ គ្រឿងអលង្ការ សម្ភារៈប្រើប្រាស់ និងផ្ទះរបស់អ្នក ក៏មិនសំខាន់ដូចមុនដែរ នៅពេលដែលអ្នកជួបរឿងរន្ធត់ដូចនេះ ។
យើងគួរតែអរសប្បាយនឹងការអ្វីដែលព្រះទ្រង់បានប្រទានមកយើង ដោយព្រះគុណទ្រង់ ។ «ទ្រង់ប្រទានគ្រប់ទាំងអស់មកយើងរាល់គ្នាជាបរិបូរ ឲ្យយើងបានអរសប្បាយ» (១ធីម៉ូថេ ៦:១៧) ។ ដូចនេះបញ្ហាមិនស្ថិតនៅត្រង់ថា ការសប្បាយនៅលើផែនដីនេះ សុទ្ធតែអាក្រក់នោះទេ ។ ប៉ុន្តែ អ្វីៗដែលយើងមាននៅក្នុងព្រះអង្គ បាននាំមកនូវអំណរយ៉ាងខ្លាំង ហើយក៏មានតម្លៃណាស់ដែរ បានជាការស្គាល់ព្រះអង្គ ប្រៀបដូចជាការរកឃើញកំណប់ ដែលបានលាក់ទុកក្នុងទីវាល ។ កំណប់ទ្រព្យនោះពិតជាមានតម្លៃណាស់ បានជាយើងធ្វើអ្វីគ្រប់យ៉ាង ដោយអំណរ ដើម្បីឲ្យបានទិញដីដែលមានកំណប់នោះ (ម៉ាថាយ ១៣:៤៤) ។
តាមបទគម្ពីរទំនុកដំកើងជំពូក១៦ បើយើងគ្មានកំណប់ទ្រព្យនៅក្នុងព្រះអង្គទេ អ្វីផ្សេងទៀតមិនមានតម្លៃសម្រាប់យើងឡើយ ។ នៅពេលដែលយើងអង្គុយញ៉ាំបាយស្រូប ឬបបរ ឬក៏អាហារអ្វីក៏ដោយនៅពេលព្រឹក យើងគួរតែនិយាយក្នុងគំនិតយើងថា បើគ្មានព្រះអង្គទេ ទូលបង្គំគ្មានរបស់ល្អក្នុងជីវិតទេ ។ ព្រះអង្គជាអ្នកដែលបានធ្វើឲ្យគ្រាប់ពូជដុះឡើយ ។ ព្រះអង្គជាអ្នកប្រទានអាហារដល់ទូលបង្គំ ។ ពេលណាយើងក្រោកឡើង ហើយដើរចេញតាមទ្វារផ្ទះ ដោយមានសុខភាព និងកម្លាំងអាចដើរចេញបាន តើនរណាជាអ្នកជួយឲ្យយើងអាចដើរបាន? នៅពេលដែលយើងប្រាស់ខ្លួនដេកនៅលើគ្រែ នៅពេលយប់ ហើយអាចសម្រាករហូតដល់ភ្លឺ តើនរណាធ្វើឲ្យយើងអាចសម្រាកបាន?
អ្នកមិនមានសមត្ថភាព សូម្បីតែមើលឃើញអក្សរក្នុងសៀវភៅនេះ ឬយល់អំពីអ្វីដែលអ្នកកំពុងអាន បើព្រះគុណព្រះមិនបានជួយអ្នកទេនោះ ។ មានតែព្រះអង្គទេ ដែលអាចរក្សា និងទ្រទ្រង់យើង ។ មានតែព្រះអង្គទេដែលប្រទានយើងឲ្យ «មានជីវិត មានដង្ហើមគ្រប់ជំពូក» (កិច្ចការ ១៧:២៥) ។ នៅចុងបញ្ចប់ បើគ្មានព្រះអង្គទេ យើងគ្មានអ្វីដែលល្អទេ ប៉ុន្តែ ព្រះអង្គមានសេចក្តីល្អលើសពីគ្រប់គ្រាន់ សម្រាប់ប្រទានមកយើង ។ ព្រះអង្គគឺជាប្រភពនៃកំណប់ទ្រព្យ ហើយព្រះអង្គគឺជាកំណប់ទ្រព្យមានតម្លៃបំផុតរបស់យើង ។ ពេលអ្នកស្គាល់ព្រះអង្គច្បាស់ អ្នកនឹងឆ្លើយតបចំពោះព្រះអង្គ ដោយយកព្រះអង្គធ្វើជាចំណុចកណ្តាលនៃជីវិតអ្នក ដើម្បីដឹកនាំការគិត ការសម្រេចចិត្ត អារម្មណ៍ និងការប្រព្រឹត្តិរបស់អ្នក ។ បានជាអ្នកអាចនិយាយទៅកាន់ព្រះអង្គថា «នៅចំពោះទ្រង់មានសេចក្ដីអំណរដ៏ពោរពេញ នៅព្រះហស្តស្ដាំទ្រង់មានសេចក្ដីអរសប្បាយជាដរាបតទៅ» (ទំនុកដំកើង ១៦:១១) ។ តើអ្នកចង់ទៅជ្រកកោន នៅកន្លែងណា ហើយអ្នកឲ្យតម្លៃអ្វីខ្លាំងជាងព្រះអង្គ?
ខគម្ពីរជញ្ជឹងគិត ៖ ម៉ាថាយ ១៣:៤៤-៤៦
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៦០-៦២ និង កិច្ចការ ២២