ព្រះអម្ចាស់នៃប្រជាជាតិទាំងអស់
ដោយAlistair Begg
August 14, 2026
«ព្រះយេហូវ៉ាទ្រង់នឹងស្រែកគ្រហឹមពីស៊ីយ៉ូន ហើយបញ្ចេញព្រះសូរសៀងពីក្រុងយេរូសាឡិមមក ... អញនឹងចាត់ប្រើភ្លើង ឲ្យចូលទៅក្នុងផ្ទះរបស់ហាសែល ... អញនឹងបំបាក់រនុកទ្វាររបស់ក្រុងដាម៉ាស» ។ អេម៉ុស ១:២,៤-៥
ព្រះនៃព្រះគម្ពីរគឺជាព្រះនៃសេចក្តីយុត្តិធម៌ ។ ព្រះអង្គទតឃើញទាំងអស់ ជ្រាបទាំងអស់ ហើយសន្យាថា នឹងជម្រះបញ្ជីទាំងអស់ ។ នេះដំណឹងល្អអស្ចារ្យសម្រាប់រាស្រ្តរបស់ព្រះ ដែលអាចសម្រាក ដោយទុកចិត្តថា គ្មានអំពើអយុត្តធម៌ណា ដែលអាចជៀសផុតពីព្រះនេត្ររបស់ព្រះអង្គឡើយ ។ គឺដូចដែលអ្នកនិពន្ធបទគម្ពីរទំនុកដំកើងបានសរសេរថា «ព្រះទ្រង់គ្រប់គ្រងលើអស់ទាំងសាសន៍ ព្រះទ្រង់គង់លើបល្ល័ង្កបរិសុទ្ធនៃទ្រង់» (ទំនុកដំកើង ៤៧:៨) ។ មនុស្សទាំងអស់នឹងសារភាពគ្រប់អ្វីៗទាំងអស់ដែលពួកគេបានធ្វើ ។ នេះជាសេចក្តីពិតដែលបានបង្ហាញយ៉ាងច្បាស់ តាមរយៈហោរា អេម៉ុស ដែលតាមរយៈគាត់ ព្រះអម្ចាស់បានប្រកាសការជំនុំជម្រះ មកលើបណ្តាប្រជាជាតិទាំង៦ ។
ក្នុងបទគម្ពីរអេម៉ុស ១:៣-២:៣ ព្រះទ្រង់បានចាប់ផ្តើមប្រកាស អំពីការជំនុំជម្រះមកលើនគរស៊ីរី និងទីក្រុងដាម៉ាសជារាជធានី ដោយសារពួកគេបានប្រព្រឹត្តយ៉ាងសាហាវព្រៃផ្សៃមកលើប្រជាជនដែលពួកគេបានវាយកាន់កាប់ ។ បន្ទាប់មក ព្រះអង្គប្រកាសអំពីការជំនុំជម្រះមកលើក្រុងកាសា ដែលបានចូលរួមការជួញដូរមនុស្ស និងទាសករ ។ បន្ទាប់មក ទីក្រុងបន្ទាប់ពី ទីក្រុងទីរ៉ុស ដែលមានទោសពីបទជួញដូរមនុស្ស ។ ព្រះអង្គក៏បានងាកទៅរកប្រជាជននៅទឹកដីអេដំម ដែលមានទោស ដោយសារសេចក្តីសម្អប់ និងកំហឹងរបស់ពួកគេ ។ ទីក្រុងបន្ទាប់ គឺទីក្រុងអាំម៉ូន ដោយសារការស្រេកឃ្លានចង់បានទឹកដីរបស់ពួកគេ បានបណ្តាលឲ្យពួកគេប្រព្រឹត្តហិង្សា យ៉ាងព្រៃផ្សៃ ។ ទឹកដីចុងក្រោយ គឺម៉ូអាប់ ដែលមានទោស ពីបទសងសឹកដ៏សាហាវ ។
តាមរយៈខគម្ពីរទាំងនេះ យើងមិនគ្រាន់តែបានដឹងថា ព្រះទ្រង់បានគិតដូចម្តេចខ្លះ អំពីជាតិសាសន៍បុរាណទាំងអស់នេះ និងការអាក្រក់ជាពិសេសរបស់ពួកគេប៉ុណ្ណោះទេ តែយើងក៏អាចធ្វើការសន្និដ្ឋាន អំពីការអ្វីដែលព្រះអង្គស្រឡាញ់ និងស្អប់ជាទូទៅ ។ យើងអាចដឹងច្បាស់ថា ព្រះទ្រង់ស្រឡាញ់មនុស្សដែលព្រះអង្គបានបង្កើតឲ្យត្រូវរូបអង្គទ្រង់ តែព្រះអង្គស្អប់ទង្វើដែលគេធ្វើមកលើពួកគេដូចសត្វធាតុ ឬវត្ថុ ។ យើងអាចដឹងច្បាស់ថា ព្រះអង្គនឹងជម្រះបញ្ជី ជាមួយមនុស្សដែលឲ្យតម្លៃមកលើផលចំណេញ ជាជាងឲ្យតម្លៃមនុស្ស ឬជម្រះបញ្ជីជាមួយមនុស្សដែលមិនធ្វើតាមពាក្យសម្បថ ។
ព្រះទ្រង់មិនបានកែប្រែគំនិតទ្រង់ ទាក់ទងនឹងរឿងនេះ ចាប់ផ្តើមតាំងពីពេលដែលលោក អេម៉ុសបានប្រាប់ថា ព្រះអង្គនៅតែស្អប់បាបទាំងអស់នេះ ហើយនឹងឲ្យជាតិសាសន៍ និងមនុស្សម្នាក់ៗ ទទួលខុសត្រូវចំពោះកំហុសរបស់ខ្លួន ។ ដូចនេះ ដោយសារកំហុសនោះ គឺជាការប្រព្រឹត្តមកលើរាស្រ្តរបស់ព្រះ យើងអាចដឹងច្បាស់ថា ព្រះអង្គនឹងសម្រេចសេចក្តីយុត្តិធម៌ ។ យុត្តិធម៌នឹងកើតមាន ក្នុងដំណាក់កាលនៃប្រវត្តិសាស្រ្តសម្រាប់ជាតិសាសន៍ និងបុគ្គលមួយចំនួន ហើយនឹងកើតមានអស់កល្បជានិច្ច សម្រាប់ពួកគេម្នាក់ៗ ។
ដំណឹងនេះគួរតែកម្សាន្តចិត្តយើង នៅពេលដែលយើងរងទុក្ខ តែក៏ជាដំណឹងដ៏សោកសៅ ដោយសារយើងបានប្រព្រឹត្តបាប ។
យើងគួរតែសួរខ្លួនឯងថា ចិត្តរបស់យើងបានដិតដានទៅដោយអាកប្បកិរិយាទាំងនេះឬទេ ។ យើងប្រហែលមិនបានប្រព្រឹត្តហិង្សាដ៏ព្រៃផ្សៃ ឬលោភចង់បានដីគេ តែកំហឹង សេចក្តីសម្អប់ ភាពលោភលន់ អាត្មានិយម និងអំនួត ដែលនាំទៅរកការអាក្រក់ដូចនោះ អាចនៅតែមានក្នុងចិត្តយើង ។ យើងគួរតែទូលសូមព្រះអម្ចាស់ ឲ្យពិនិត្យមើលចិត្តយើង ហើយបើកបង្ហាញដោយសេចក្តីមេត្តា នូវផ្នែកណាខ្លះ ដែលនៅមានបាប ។ ក្នុងនាមយើងជារាស្រ្តរបស់ព្រះ យើងអាចទូលសូម ដោយមិនខ្លាចការជំនុំជម្រះ ដោយដឹងថា ព្រះអម្ចាស់យេស៊ូវគ្រីស្ទ បានទទួលរងការជំនុំជម្រះជំនួសយើង នៅភ្នំកាល់វ៉ារីរួចហើយ ។ ព្រះទ្រង់គ្រប់គ្រងប្រជាជាតិទាំងឡាយ ហើយគ្រងរាជអស់កល្បជានិច្ច ។ សូមព្រះអង្គគ្រងរាជក្នុងជីវិតអ្នកផងដែរ នៅពេលដែលអ្នកប្រឈមមុខដាក់អំពើអយុត្តិធម៌ ក្នុងលោកិយនេះ ហើយប្រែចិត្តចេញពីអំពើអយុត្តិធម៌ដែលមានក្នុងចិត្តអ្នក ។
ខគម្ពីរជញ្ជឹងគិត ៖ អេម៉ុស ២:៦-៨
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៨៩-៩០ និង ១ពេត្រុស ៤