ភាពខុសឆ្គងដែលគេមើលមិនឃើញ
ដោយAlistair Begg
August 26, 2026
«ដ្បិតមានមនុស្សជាច្រើន គឺក្នុងពួកអ្នកកាត់ស្បែកជាដើម ដែលរឹងរូស ជាពួកអ្នកដែលពោលពាក្យឥតប្រយោជន៍ ហើយបង្ខូចគំនិតមនុស្ស ។ ត្រូវតែបំបាត់មាត់គេ ដ្បិតគេផ្ដួលពួកអ្នកផ្ទះទាំងមូល ដោយបង្រៀនសេចក្ដីដែលមិនគួរគប្បី ឲ្យតែបានកំរៃដ៏លាមក» ។ ទីតុស ១:១០-១១
ចូរយើងមានការប្រុងប្រយ័ត្នចំពោះគ្រោះថ្នាក់ ដែលបណ្តាលមកពីមនុស្សពោលពាក្យឥតប្រយោជន៍ ។
ពួកជំនុំនៅលើកោះក្រេត កំពុងទទួលការគំរាមកំហែងពីអ្នកខ្លះ ដែលមានលក្ខណៈបះបោរ ក្នុងសហគមន៍នៃជំនឿ ។ ពួកគេប្រៀបដូចជាមនុស្សដែលចុះឈ្មោះចូលធ្វើទាហាន ពួកគេទទួលភារកិច្ច និងពាក់ឯកសណ្ឋាន តែពេលដែលសង្គ្រាមផ្ទុះឡើង ពួកគេបដិសេធមិនព្រមស្តាប់តាមមេបញ្ជាការរបស់ពួកគេ ។
សាវ័កប៉ុលបានហៅបុគ្គលដែលបះបោរទាំងនោះថា «ពួកអ្នកដែលពោលពាក្យឥតប្រយោជន៍» ។ ពួកគេធ្វើអ្វីដែលគ្មានន័យ តែពួកគេធ្វើឲ្យអ្នកគិតស្មានថា រឿងនោះសំខាន់បំផុត ក្នុងជីវិតអ្នក ។ ពួកគេចង់ជៀសវាងរឿងធំ ដែលអាចឃើញច្បាស់ ក្នុងព្រះគម្ពីរប៊ីប ហើយចង់ឲ្យគេរាល់គ្នាផ្ដោតទៅលើរឿងឥតប្រយោជន៍ ។ ហើយអ្វីដែលគួរឲ្យភ្ញាក់ផ្អើលនោះ ទោះពួកគេគឺជា «មនុស្សបោកបញ្ឆោត» ពួកគេអាចនាំមនុស្សដើរតាមពួកគេ ។
អ្នកខ្លះងាយនឹងធ្លាក់ចូលទៅក្នុងរឿងឥតប្រយោជន៍ដូចនេះ ។ អ្នកមិនអាចមានផលិតផលដែលអាចលក់បានឡើយ បើសិនជាអ្នកមិនមានទីផ្សាដែលនឹងទិញផលិតផលនោះទេ ។ បើពួកជំនុំមិនយល់សេចក្តីពិតច្បាស់ទេ ហើយមិនមានពួកចាស់ទុំ ដូចដែលបានពិពណ៌នា ក្នុងបទគម្ពីរទីតុស ១:៥-៩ ដើម្បីថែរក្សាហ្វូងចៀមទេ នោះពួកគេងាយរងគ្រោះ ដោយសារបុគ្គលដែលលេចឡើង ពីក្នុងចំណោមអ្នកជឿ ហើយព្យាយាមនាំពួកស្មោះត្រង់ឲ្យវង្វេងចេញ ។
គ្រោះថ្នាក់ធំបំផុត មិនមែនទាល់តែមានការបៀតបៀនពីកម្លាំងខាងក្រៅ មកលើពួកជំនុំនោះទេ ។ ភាគច្រើន គ្រោះថ្នាក់ធំបំផុតកើតមានស្ងាត់ៗ ដែលគេមិនចាប់អារម្មណ៍ភ្លាមៗ ពោលគឺវាចេញពីខាងក្នុងពួកជំនុំមក ។ មនុស្សដែលបោកបញ្ឆោតយ៉ាងដូចនេះ គឺគេមិនងាយមើលដឹងឡើយ ។ ពួកគេមិននិយាយត្រង់ៗថា «សូមមកតាមខ្ញុំ ខ្ញុំកំពុងតែងាកបែរចេញពីសេចក្តីពិតហើយ» ។ ផ្ទុយទៅវិញ ពួកគេនិយាយថា «សូមមកតាមខ្ញុំ ព្រោះខ្ញុំមានការបង្រៀនជាគន្លឹះ ដែលអ្នកចាំបាច់ត្រូវជឿ ។ អ្នកត្រូវប្រាកដថា អ្នកត្រូវធ្វើយ៉ាងដូចនេះ គឺមិនមែនធ្វើយ៉ាងនោះទេ» ។
ដំណឹងល្អគឺជារឿងដ៏អស្ចារ្យ ដែលតាមរយៈព្រះយេស៊ូវ និងព្រះរាជកិច្ចដែលព្រះអង្គបានធ្វើ នៅលើឈើឆ្កាង ព្រះទ្រង់បានកែប្រែជីវិតរបស់កូនទ្រង់ទាំងស្រុង ។ ក្រៅពីការផ្លាស់ប្រែ ក្នុងចិត្តយើង ព្រះអង្គក៏ប្រទានសេចក្តីពិតនៃព្រះបន្ទូលដែលមិនចេះប្រែប្រួល ជាសេចក្តីពិតដែលសក្តិសមនឹងឲ្យយើងអធិស្ឋាន ឲ្យពួកជំនុំ និងពួកចាស់ទុំរបស់យើង ។ សេចក្តីពិតមានតម្លៃណាស់ គឺសក្តិសមនឹងឲ្យយើងការពារអស់ពីកម្លាំងរបស់យើង ។ ដូចនេះ សូមឲ្យការបង្រៀនរបស់សាវ័កប៉ុលបានក្រើនរំឭកយើង ឲ្យការពារពួកជំនុំ ឲ្យរួចពីពួកមនុស្សដែលបោកបញ្ឆោត ហើយក៏មានការប្រុងប្រយ័ត្ន ក្នុងការពិនិត្យមើលចិត្តរបស់យើងផងដែរ ។ ចូរយើងស្តាប់មនុស្សដែលមានពាក្យសម្តីប្រកបដោយសេចក្តីពិត និងព្រះគុណ ហើយត្រូវប្រាកដថា ពាក្យសម្តីរបស់យើងក៏ពេញដោយសេចក្តីពិត និងព្រះគុណ ដែលជាសញ្ញាសំគាល់ដ៏សំខាន់នៃជីវិតគ្រីស្ទបរិស័ទផងដែរ ។
ខគម្ពីរជញ្ជឹងគិត ៖ ទីតុស ១:៥-១៦
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ១១៩:៨៩-១៧៦ និង ២កូរិនថូស ៥