ការការពារពីព្រះបន្ទូលព្រះ
ដោយAlistair Begg
August 30, 2026
«ទូលបង្គំមិនសូមឲ្យយកគេចេញពីលោកីយទេ គឺសូមឲ្យទ្រង់រក្សាគេ ឲ្យរួចពីសេចក្ដីអាក្រក់វិញ» ។ យ៉ូហាន ១៧:១៥
នេះជាការអធិស្ឋានដែលព្រះយេស៊ូវបានបន្លឺព្រះសូរសៀងឡើង សម្រាប់ពួកសិស្ស ។ ហើយការអធិស្ឋាននេះក៏ជាសេចក្តីបង្គាប់ អំពីរបៀបដែលពួកគេមានទំនាក់ទំនងជាមួយលោកិយ នៅជុំវិញពួកគេ ។ របៀបនៃការរស់នៅ ដែលព្រះយេស៊ូវបានកំណត់ក្នុងសេចក្តីអធិស្ឋាននេះ មិនមែនជារបៀបនៃការរស់នៅ ដែលគ្រីស្ទានអាចមានយ៉ាងសុខស្រួល ដល់ថ្នាក់មិនអាចមើលឃើញភាពខុសគ្នាពីលោកិយនោះទេ ហើយក៏មិនមែនជាការផ្តាច់ខ្លួនចេញពីសង្គមដែរ ។
ចក្ខុវិស័យដែលព្រះយេស៊ូវមានសម្រាប់រាស្រ្តទ្រង់ គឺឲ្យពួកគេរស់នៅក្នុងលោកិយ តែមានភាពខុសប្លែកពីលោកិយ ។ តាមពិត ព្រះទ្រង់តែងតែត្រាស់ហៅរាស្រ្តរបស់ទ្រង់ឲ្យរស់នៅដូចនេះ ធ្វើជា «ពួកសង្ឃហ្លួង ជាសាសន៍បរិសុទ្ធ» (និក្ខមនំ ១៩:៦ និង ១ពេត្រុស ២:៩-១០) ។ បទគម្ពីរទំនុកដំកើងបានចែងយ៉ាងច្បាស់ថា ការអាក្រក់តែងតែមានវត្តមាន ដែលអាចបង្កគ្រោះថ្នាក់គ្រប់ពេល ។ មនុស្សដែលជា «ខ្មាំងសត្រូវ» និង «មនុស្សដែលកំចាយឈាម» (ទំនុកដំកើង ៥៩:១-២) ហើយ «អស់អ្នកដែលប្រព្រឹត្តអំពើអាក្រក់» មាននៅគ្រប់ទីកន្លែង (៩៤:៤) ហើយមានអ្នកខ្លះបែរទៅ តាមផ្លូវខ្វិចខ្វៀនរបស់ខ្លួន (១២៥:៥) ។ ហេតុនេះហើយ បញ្ហាប្រឈមធំបំផុតត្រង់ចំណុចនេះ គឺត្រូវដឹងអំពីរបៀបគោរពប្រតិបត្តិតាមព្រះបន្ទូលរបស់ព្រះយេស៊ូវ ដោយជៀសវាងការបន្ថែមបន្ថយសេចក្តីពិត តាមការជំរុញនៃសេចក្តីអាក្រក់នៅជុំវិញយើង ។
ព្រះយេស៊ូវបានទូលសូមព្រះវរបិតាថា «សូមឲ្យទ្រង់រក្សាគេ ឲ្យរួចពីសេចក្ដីអាក្រក់វិញ» ។ ការការពារ គឺមានសម្រាប់មនុស្សទាំងអស់ដែលថ្វាយជីវិតដាច់ដល់ព្រះ ។ សេចក្តីពិតនេះក៏ស្របនឹងបទគម្ពីរទំនុកដំកើង ដែលក្នុងនោះ យើងឃើញថា ព្រះទ្រង់ប្រទានការការពារដល់ជនទុរគត ។ ព្រះអម្ចាស់មានបន្ទូលថា «ដោយព្រោះដំងូររបស់មនុស្សកំសត់ទុគ៌ត អញនឹងដាក់គេឲ្យនៅទីសាន្តត្រាណ ដែលគេដង្ហក់រកនោះ» (ទំនុកដំកើង ១២:៥) ។ អាចនិយាយម្យ៉ាងទៀតថា ព្រះអង្គមិនការពារមនុស្សក្រអឺតក្រទម និងមនុស្សមានអំនួតឡើយ តែការពារមនុស្សដែលទទួលស្គាល់ថា ខ្លួនត្រូវពឹងផ្អែកលើព្រះអង្គ ។ ព្រះអង្គបានស្តាប់ឮសម្លេងទំនួញរបស់ពួកគេ ។ ហើយការការពារដែលព្រះអម្ចាស់មានសម្រាប់ជនទុរគត ក៏ជាការពារពួកគេឲ្យរួចពីមនុស្សអាក្រក់ផងដែរ ។ ស្តេច ដាវីឌ បានសារភាពថា ព្រះអម្ចាស់ «នឹងជួយទំនុកបំរុងគេ ចាប់តាំងពីដំណនេះជារៀងរាបតទៅ» (ខ.៧) ។ មនុស្សអាក្រក់អាចធ្វើឲ្យរាស្រ្តរបស់ព្រះរងទុក្ខវេទនា តែមួយរយៈពេលប៉ុណ្ណោះ ព្រោះពួកគេមិនអាចបំផ្លាញវិញ្ញាណរបស់យើងបានទេ ។ ព្រះទ្រង់នឹងថែរក្សាវិញ្ញាណរបស់អ្នកជឿពិតប្រាកដ មិនឲ្យដាច់ចេញពីព្រះអង្គឡើយ ។
ការការពាររបស់ព្រះ គឺសម្រាប់ជនទុរគត និងសម្រាប់ការពារឲ្យរួចពីមនុស្សអាក្រក់ ប៉ុន្តែ តើយើងអាចទទួលបានការការពារនេះដោយរបៀបណា? គឺតាមរយៈព្រះបន្ទូលព្រះ ដែលជាចង្កៀងបំភ្លឺផ្លូវយើង (ទំនុកដំកើង ១១៩:១០៥) ។ ព្រះបន្ទូលទ្រង់គឺជាពាក្យពិត ដែលផ្តល់ឲ្យយើងនូវខែលការពារឲ្យរួចពីខ្មាំងសត្រូវទាំងអស់ (១៨:៣០) ។ បើយើងចង់រស់នៅដោយស្មោះត្រង់ ក្នុងលោកិយនេះ យើងត្រូវតែមានការប្តូរផ្តាច់ចំពោះព្រះគម្ពីរប៊ីប ។ ដើម្បីឲ្យអ្នកមានការគិតដ៏ត្រឹមត្រូវ អំពីសេចក្តីអាក្រក់ក្នុងលោកិយ អ្នកត្រូវមានព្រះបន្ទូលជាប់ក្នុងចិត្ត គំនិត និងអណ្តាតរបស់អ្នក ។ ព្រះទ្រង់បានប្រទានព្រះបន្ទូលមកអ្នក ដើម្បីថែរក្សាអ្នកឲ្យជាប់នៅ ។ តើអ្នកបានអធិស្ឋានឲ្យខ្លួនឯង តាមលំនាំព្រះយេស៊ូវអធិស្ឋានឲ្យអ្នកដើរតាមព្រះអង្គ នៅថ្ងៃមុនពេលព្រះអង្គសុគតឬទេ? ចូរពិចារណាថា អ្នកកំពុងស្ថិតក្នុងគ្រោះថ្នាក់នៃការមានលក្ខណៈដូចលោកិយ ឬគ្រោះថ្នាក់នៃការផ្តាច់ខ្លួនចេញពីសង្គម ។ ចូរទូលសូមព្រះអម្ចាស់ នូវសេចក្តីស្រឡាញ់ ប្រាជ្ញា និងសេចក្តីក្លាហាន សម្រាប់រស់នៅតាមគំរូរបស់ព្រះអង្គ ក្នុងលោកិយ តែមានលក្ខណៈខុសពីលោកិយ ។
ខគម្ពីរជញ្ជឹងគិត ៖ យ៉ូហាន ១៧:៩-១៩
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ១២៩-១៣១ និង ២កូរិនថូស ៩