ព្រះគុណ សេចក្តីមេត្តា និងសន្តិភាពរបស់ព្រះអង្គ
ដោយAlistair Begg
September 7, 2026
«សូមឲ្យអ្នករាល់គ្នាបានប្រកបដោយព្រះគុណ នឹងសេចក្ដីមេត្តាករុណា ហើយនឹងសេចក្ដីសុខសាន្ត អំពីព្រះដ៏ជាព្រះវរបិតា ហើយអំពីព្រះអម្ចាស់យេស៊ូវគ្រីស្ទ ជាព្រះរាជបុត្រានៃព្រះវរបិតា គឺដោយសេចក្ដីពិត នឹងសេចក្ដីស្រឡាញ់» ។ ២យ៉ូហាន ៣
ព្រះទ្រង់ប្រទានអ្វីដែលយើងមិនសមនឹងទទួល ។ សេចក្តីពិតនេះ ស្ថិតក្នុងចំណោមសេចក្តីពិតជាមូលដ្ឋានគ្រឹះ និងអស្ចារ្យបំផុតនៃជំនឿគ្រីស្ទាន ។ ក្នុងនាមយើងជាមនុស្សមានបាប យើងរាល់គ្នាទាំងប្រុសស្រី ទាំងចាស់ក្មេង សមនឹងទទួលបានសេចក្តីស្លាប់ ។ ហើយតើព្រះទ្រង់ប្រទានអ្វីមកយើងវិញ? គឺអំណោយទាននៃព្រះ ដែលជា «ជីវិតដ៏នៅអស់កល្បជានិច្ច ដោយព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា» (រ៉ូម ៦:២៣)។
ដូចនេះ ព្រះទ្រង់ប្រទានយើង នូវអ្វីដែលយើងមិនសមនឹងទទួល ហើយបង្ខាំងទុកអ្វីដែលយើងសមនឹងទទួល ។ ការធ្វើបញ្ច្រាសដូចនេះ មានតម្លៃណាស់ បានជាយើងប្រើពាក្យ ព្រះគុណ ជាពាក្យពិសេស ។ ដោយសារព្រះគុណព្រះ ព្រះអង្គបានប្រទានយើងនូវអំណោយមានតម្លៃបំផុតនៃជីវិត ដែលយើងមិនសមទទួលទាល់តែសោះ ។
តើហេតុអ្វីព្រះអង្គអាចប្រទានយើងនូវព្រះគុណច្រើនយ៉ាងនេះ ដោយរំដោះយើងចេញពីបាប និងទោសរបស់បាប ហើយនាំយើងចូលទៅទទួលអត្ថប្រយោជន៍គ្រប់យ៉ាង ក្នុងព្រះយេស៊ូវគ្រីស្ទ? មូលហេតុគឺដោយសារសេចក្តីមេត្តារបស់ព្រះអង្គ ។ ដោយសារសេចក្តីមេត្តាដ៏អស្ចារ្យរបស់ព្រះ ដែលបានបណ្តាលព្រះទ័យព្រះអង្គឲ្យប្រទានអ្វីដែលយើងមិនសមទទួល ហើយដោយសារសេចក្តីមេត្តានោះ ព្រះអង្គចាក់បង្ហូរព្រះគុណមកលើយើងជាបរិបូរ ។
សន្តិភាពជាបរិបូរក៏បានហូរចេញពីព្រះគុណ និងសេចក្តីមេត្តា ។ អ្នកដែលបានទទួលការផ្សះផ្សាឲ្យជានឹងព្រះ ក៏ទទួលបានសន្តិភាពនោះ គឺអស់អ្នកដែលមិនដាច់ចេញពីព្រះអង្គ តែរស់នៅដោយការប្រកបជាមួយព្រះអង្គ និងក្នុងសហគមន៍នៃមនុស្សដែលបានទទួលព្រះគុណរបស់ព្រះអង្គ ។ សន្តិភាពនេះជាអ្វីដែលយើងអាចដកពិសោធន៍ ដោយព្រះគុណ និងសេចក្តីមេត្តារបស់ព្រះ ខុសពីសន្តិភាពរបស់លោកិយ ពោលគឺ «ហួសលើសពីអស់ទាំងគំនិត» ដែលអាចយល់ដឹង (ភីលីព ៤:៧)។
ក្នុងលោកិយដែលហាក់ដូចជាមានពេញដោយការខកចិត្ត និងគ្រោះថ្នាក់ ហើយពេលខ្លះ មិនមានអត្ថន័យ ឬគោលបំណង ក្នុងចំណោមអ្វីៗដែលអាចទូលសូម តើមានអ្វីល្អជាងព្រះគុណ សេចក្តីមេត្តា និងសន្តិភាព? សេចក្តីទាំងបីនេះមានស្ថិរភាព និងស្ថិតស្ថេរនៅជារៀងរហូត ។ ហើយព្រះវរបិតាតែងតែសព្វព្រះទ័យនឹងប្រទាន ដោយព្រះទ័យសប្បុរស ដល់អស់អ្នកដែលចូលមករកព្រះអង្គ តាមរយៈព្រះរាជបុត្រាស្ងួនភ្ងាទ្រង់ គឺព្រះយេស៊ូវគ្រីស្ទ ។ បើអ្នកទទួលជឿព្រះគ្រីស្ទ ព្រះគុណ សេចក្តីមេត្តា និងសន្តិភាព នឹងនៅជាប់ជាមួយអ្នក ។ ដូចនេះ ចូរឈប់បង្អង់សិន មុននឹងបន្តដំណើរទៅមុខទៀត ហើយចូរឲ្យអត្ថន័យ និងទំហំ នៃពាក្យទាំងបីនេះបានជ្រួតជ្រាបក្នុងចិត្តអ្នក ។ ព្រះទ្រង់បានប្រទានព្រះគុណ សេចក្តីមេត្តា និងសន្តិភាពរបស់ទ្រង់ ដល់អ្នកហើយ គឺតាមរយៈព្រះយេស៊ូវ ជាព្រះអង្គសង្គ្រោះរបស់អ្នក ។
ខគម្ពីរជញ្ជឹងគិត៖ ២យ៉ូហាន
គម្រោងអានព្រះគម្ពីររយៈពេល១ឆ្នាំ៖ ពួកចៅហ្វាយ ១-៣ និង យ៉ូហាន ២