ព្រះយេស៊ូវជាមិត្តសំឡាញ់ពិត
ដោយAlistair Begg
September 22, 2026
«នេះជាសេចក្ដីបញ្ញត្តរបស់ខ្ញុំ គឺឲ្យអ្នករាល់គ្នាស្រឡាញ់ដល់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ គ្មានអ្នកណាមានសេចក្ដីស្រឡាញ់ធំជាងនេះ គឺដែលអ្នកណានឹងប្ដូរជីវិត ជំនួសពួកសំឡាញ់របស់ខ្លួននោះទេ ។ បើអ្នករាល់គ្នាធ្វើតាមសេចក្ដីដែលខ្ញុំបង្គាប់ នោះអ្នករាល់គ្នាជាពួកសំឡាញ់ខ្ញុំហើយ ខ្ញុំមិនហៅជាអ្នកបំរើទៀត ពីព្រោះអ្នកបំរើគេមិនដឹងជាចៅហ្វាយធ្វើអ្វីទេ គឺខ្ញុំហៅអ្នករាល់គ្នាថាជាសំឡាញ់វិញ ពីព្រោះខ្ញុំបានឲ្យអ្នករាល់គ្នាដឹងគ្រប់ការទាំងអស់ ដែលខ្ញុំឮពីព្រះវរបិតាខ្ញុំមក» ។ យ៉ូហាន ១៥:១២-១៥
អ្នកចម្រៀងទំនុកប្រពៃណី និងទំនុកសម័យទំនើបជាច្រើន បាននិពន្ធបទចម្រៀង ដែលនិយាយអំពីភាពឯកោ ព្រោះវាឆ្លុះបញ្ចាំងអំពីអារម្មណ៍របស់មនុស្សបានច្បាស់លាស់ ។ លោក ប៉ុល សាយមិន (Paul Simon)បានពិពណ៌នាយ៉ាងក្បោះក្បាយ នៅក្នុងការច្រៀងអំពីការសាងសង់ជញ្ជាំងដែលគេមិនអាចទំលុះបាន ក្នុងជីវិតគាត់ និងអំពីការក្លាយជា «ថ្ម» និង «កោះ» ដោយបដិសេធក្តីស្រឡាញ់ និងសំណើច ព្រោះ «មិត្តភាពធ្វើឲ្យគាត់មានការឈឺចាប់» ។74
ប៉ុន្តែ មិត្តភាពមានសារៈសំខាន់យ៉ាងខ្លាំង ចំពោះយើងម្នាក់ៗ ។ នេះជាសេចក្តីពិតដែលយើងរាល់គ្នាបានដឹងក្នុងជម្រៅចិត្តយើង ។ ព្រះទ្រង់រចនាយើងមក ឲ្យយកចិត្តទុកដាក់ចំពោះគ្នាទៅវិញទៅមក ។ យើងចង់បានទំនាក់ទំនង ដែលមានគេស្គាល់ មានគេស្រឡាញ់យើង ។ យើងដឹងថា សូម្បីតែមិត្តភក្តិពិតប្រាកដតែម្នាក់ ធ្វើឲ្យយើងក្លាយជាមនុស្សមានតម្លៃពិតប្រាកដនៅក្នុងពិភពលោក ។ យើងមិនចង់ក្លាយជាកោះកណ្ដោចកណ្ដែងតែម្នាក់ឯងនោះទេ ។
យើងអាចមានមិត្តភក្តិពិតប្រាកដ ដែលស្មោះត្រង់ យល់អារម្មណ៍យើង និងស្មោះត្រង់ តែយើងអាចរកឃើញមិត្តភាពពិតប្រាកដតែនៅក្នុងព្រះយេស៊ូវប៉ុណ្ណោះ ។ មានតែព្រះអង្គទេ ដែលជាមិត្តសំឡាញ់ដែល «នៅតែដដែល គឺពីថ្ងៃម្សិល ថ្ងៃនេះ ហើយទៅដល់អស់កល្បជានិច្ចតទៅ» (ហេព្រើរ ១៣:៨)។ ចំណងមិត្តភាពរបស់ព្រះអង្គ មានន័យជ្រាលជ្រៅជាងមិត្តភាពរបស់មនុស្ស ព្រោះព្រះអង្គជ្រាបថា ការធ្វើជាមិត្តភក្តិពិតប្រាកដ ជាមួយអ្នកយកពន្ធ និងមនុស្សមានបាប មានលក្ខណៈដូចម្តេច (ម៉ាថាយ ១១:១៩ លូកា ៧:៣៤)។ មូលហេតុមួយ ដែលអ្នកខ្លះមើលឃើញមិត្តភាពជារឿងដែលពិបាកខ្លាំង ព្រោះមិត្តភាពតម្រូវឲ្យមានការបើកចំហ និងការហ៊ានប្រឈមនឹងការរងគ្រោះ ។ ប៉ុន្តែ ព្រះយេស៊ូវជាមិត្តភក្តិមិនដែលមានអារម្មណ៍មិនល្អ មិនដែលបោះបង់ចោលយើង ហើយមិនដែលប្រែប្រួលឡើយ ។ ហើយព្រះអង្គសព្វព្រះទ័យធ្វើជាមិត្តសំឡាញ់របស់យើង ។ ខណៈពេលដែលអ្នកទទួលជឿព្រះអង្គ ព្រះដែលបានបង្កើតរបស់សព្វសារពើមក មានព្រះទ័យរីករាយ ក្នុងការហៅអ្នកថា មិត្តសំឡាញ់របស់ព្រះអង្គ ។ ចូរយើងចំណាយពេលគិតអំពីរឿងនេះបន្តិច ។
មិត្តភាពនីមួយៗតម្រូវឲ្យមានការប្រឹងប្រែង ហើយមិត្តភាពជាមួយព្រះយេស៊ូវ ក៏មានការតម្រូវដូចនេះផងដែរ! ហេតុនេះហើយព្រះយេស៊ូវបានប្រាប់យើងថា «បើអ្នករាល់គ្នាធ្វើតាមសេចក្ដីដែលខ្ញុំបង្គាប់ នោះអ្នករាល់គ្នាជាពួកសំឡាញ់ខ្ញុំហើយ» ។ ពេលណាយើងទទួលព្រះយេស៊ូវជាមិត្តសំឡាញ់ យើងក៏ទទួលព្រះអង្គជាស្តេចរបស់យើងផងដែរ ។
អ្នកប្រហែលជាយល់ឃើញថា ទំនាក់ទំនងជាមួយមនុស្សមានការឈឺចាប់ ឬមិនស្ថិតស្ថេរ ។ អ្នកប្រហែលជាហ៊ុមព័ទ្ធទៅដោយមិត្តភក្តិ ឬអ្នកប្រហែលមិនមានមិត្តភក្តិសូម្បីតែម្នាក់ ។ ទោះអ្នកមានមិត្តភក្តិច្រើនឬអត់ អ្នកអាចមានមិត្តសំឡាញ់ដែលល្អបំផុត ជាព្រះដែលជ្រាបអំពីអ្នកគ្មានកន្លែងចន្លោះ ហើយស្រឡាញ់យើងដូចគ្នា ។ យើងក៏អាចមានមិត្តភក្តិម្យ៉ាង «ដែលនៅជាប់ជាងបងប្អូនទៅទៀត» (សុភាសិត ១៨:២៤)។
មិត្តភក្តិនៅផែនដីអាចធ្វើឲ្យយើងខកចិត្ត ឬបោះបង់ចោលយើង
ថ្ងៃមួយ គេធ្វើឲ្យយើងធូរស្បើយ ថ្ងៃបន្ទាប់ ធ្វើឲ្យយើងសោកសង្រេង
ប៉ុន្តែ ទ្រង់ជាមិត្តសំឡាញ់ដែលមិនបោកបញ្ឆោតយើង
ព្រះអង្គស្រឡាញ់យើងខ្លាំងណាស់!75
ខគម្ពីរជញ្ជឹងគិត៖ យ៉ូហាន ១៥:១២-១៧
គម្រោងអានព្រះគម្ពីររយៈពេល១ឆ្នាំ៖ អេសេគាល ៥-៧ និង យ៉ូហាន ៩:២២-៤១