ការផ្តោតទៅលើភាពយុត្តិធម៌
ដោយDavid C. McCasland
September 6, 2013
អស់រយៈពេល ១៣៥ឆ្នាំ មកហើយ ដែលកីឡាបេសប៊ល មាននៅក្នុងសហរដ្ឋអាមេរិក តែមានអ្នកចោលកូនបាល់តែ២០នាក់ប៉ុណ្ណោះ ដែលបានប្រកួតបានយ៉ាងល្អឥតខ្ចោះ ។ នៅថ្ងៃទី ២ ខែមិថុនា ឆ្នាំ២០១០ លោកអាមែនដូ កាឡារ៉ាហ្កា(Armando Galarraga) ហៀបនឹងក្លាយទៅជាកីឡាករទី២១ទៅហើយ ប៉ុន្តែ កំហុសរបស់អជ្ញាកណ្តាល បានរារាំងមិនឲ្យគាត់សម្រេចក្តីស្រម៉ៃ ដែលអ្នកចោលកូនបាល់គ្រប់រូបសុទ្ធតែប្រាថ្នាចង់បានផងដែរនោះ ។ ការចាក់បង្ហាញរូបភាពយឺតៗឡើងវិញ បានបង្ហាញអំពីការពិត ។ ទោះបីជាក្រោយមក អាជ្ញាកណ្តាលបានទទួលស្គាល់កំហុសរបស់ខ្លួន ហើយសុំការអភ័យទោសពីលោកឡារ៉ាហ្កាក៏ដោយ ក៏គេនៅតែមិនអាចកែប្រែសេចក្តីសម្រេច ក្នុងការប្រកួតបានឡើយ ។ ទោះជាយ៉ាងណាក៏ដោយ ក៏លោកកាឡារ៉ាហ្កា នៅតែមានទឹកមុខស្ងប់រំងាប់ ហើយបង្ហាញនូវការអាណិត ដល់អាជ្ញាកណ្តាល ហើយមិនដែលរិះគន់គាត់ឡើយ ។ អ្នកគាំទ្រ កីឡាករដទៃទៀត និងអ្នកនិពន្ធអំពីកីឡា បានមានការភ្ញាក់ផ្អើល នៅពេលដឹងថា លោកអាមែនដូមិនបានសងសឹកឡើយ ។ បើសិនជាយើងទទូចចង់ឲ្យគេ មានភាពយុត្តិធម៌ចំពោះខ្លួនយើង នោះយើងនឹងអាចក្លាយទៅជាខឹង ហើយនឿយណាយ ។ ប៉ុន្តែ នៅពេលយើងឱបក្រសោបយកប្រាជ្ញាក្នុងព្រះគម្ពីរ នោះយើងនឹងស្វែងរកភាពសុខសាន្តឲ្យអ្នកដទៃវិញ ។ ព្រះគម្ពីរសុភាសិតបានត្រាសហៅឲ្យយើង “ស្គាល់ប្រាជ្ញា និងសេចក្តីប្រៀនប្រដៅ ក៏សំរាប់ឲ្យទទួលសេចក្តីបង្រៀននៃគំនិតត្រឹមត្រូវនៃសេចក្តីសុចរិត សេចក្តីយុត្តិធម៌ និងសេចក្តីទៀងត្រង់”(១:២-៣)។ លោកអូសវ៉លដ៏ ឆេមបឺរ(Oswald Chambers) បានមានប្រសាសន៍អំពីរបៀបដោះស្រាយរបស់យើងចំពោះអ្នកដទៃថា “ចូរកុំស្វែងរកយុត្តិធម៌ឡើយ តែក៏មិនត្រូវឈប់ផ្តល់ភាពយុត្តិធម៌ដល់អ្នកដទៃដែរ ហើយមិនត្រូវអនុញ្ញាត ឲ្យការអ្វីដែលអ្នកជួបប្រទះ ធ្វើឲ្យមានភាពល្វីងជូរចត់ នៅក្នុងទំនាក់ទំនង ដែលអ្នកមានជាមួយអ្នកដទៃ តាមរយៈព្រះយេស៊ូវឡើយ”។ នៅពេលយើងជួបភាពអយុត្តិធម៌ ក្នុងនាមជាអ្នកដើរតាមព្រះគ្រីស្ទ យើងមានអភ័យឯកសិទ្ធិ និងការទទួលខុសត្រូវ នៅក្នុងការឆ្លើយតប ដោយភាពស្មោះត្រង់ និងសុចរិត ដោយធ្វើការអ្វីដែលត្រឹមត្រូវ យុត្តិធម៌ និងសមរម្យ ។ - David McCasland
បទគម្ពីរប្រចាំថ្ងៃ
ចូរស្អប់អំពើអាក្រក់ ហើយស្រឡាញ់អំពើល្អវិញ ចូរតាំងឲ្យមានសេចក្តីយុត្តិធម៌នៅត្រង់ទ្វារក្រុងចុះ ។ - អេម៉ុស ៥:១៥