លោកភីទ័រ ក្រូហ្វ(Peter Croft) បាននឹកចាំ អំពីកិច្ចការដែលជីតារបស់គាត់បានធ្វើ បានជាគាត់សរសេរថា “សម្រាប់អ្នកដែលបានរើសយកព្រះគម្ពីរប៊ីបរបស់ខ្លួនមកអាន ទោះជាភាសាអ្វីក៏ដោយ ក្នុងជម្រៅចិត្តរបស់ខ្ញុំ ខ្ញុំចង់ឲ្យគាត់មិនគ្រាន់តែយល់ តែបានពិសោធន៍នឹងអត្ថបទព្រះគម្ពីរ ក្នុងលក្ខណៈជាឯកសារដ៏រស់ ដែលនៅតែសំខាន់ គ្រោះថ្នាក់ និងរំភើបរីករាយ ដូចកាលរាប់ពាន់ឆ្នាំមុន”។ ជីតារបស់លោកភីធ័រ គឺលោក ជេ ប៊ី ភីលីព(J.B. Phillips) ជាអ្នកបម្រើព្រះក្នុងផ្នែកយុវជន ដែលបានធ្វើការបកស្រាយព្រះគម្ពីរប៊ីប ជាភាសាអង់គ្លេស ក្នុងអំឡុងសម័យសង្រ្គាមលោកលើកទី២ ដើម្បីឲ្យសិស្សនៅព្រះវិហាររបស់គាត់អាចយល់។
យើងក៏ជួបឧបសគ្គនៅក្នុងការអាន និងពិសោធន៍នឹងព្រះបន្ទូលព្រះ ក្នុងព្រះគម្ពីរប៊ីប មិនខុសពីសិស្សរបស់លោកភីលីពឡើយ ហើយភាគច្រើនមិនមែនដោយសារបញ្ហាភាសានោះទេ។ យើងប្រហែលជាខ្វះពេលវេលា ការលត់ដំ ឬវិធីសាស្រ្តត្រឹមត្រូវ ដើម្បីរៀនព្រះបន្ទូលព្រះ។ ប៉ុន្តែ បទគម្ពីរទំនុកដំកើង ជំពូក១ បានចែងថា មនុស្សដែលមានពរ “នោះត្រេកអរតែនឹងក្រឹត្យវិន័យរបស់ព្រះយេហូវ៉ាវិញ ក៏រំពឹងគិតក្នុងក្រឹត្យវិន័យទ្រង់ទាំងយប់ទាំងថ្ងៃដែរ”(ខ.១-២)។ ការជញ្ជឹងគិតអំពីព្រះបន្ទូល ក្នុងព្រះគម្ពីរជារៀងរាល់ថ្ងៃ ជួយឲ្យយើងចម្រើនឡើង ក្នុងគ្រប់រដូវកាល ទោះយើងជួបប្រទះទុក្ខលំបាកយ៉ាងណាក៏ដោយ។
តើអ្នកមានទស្សនៈយ៉ាងណា ចំពោះព្រះគម្ពីរប៊ីបរបស់អ្នក? ព្រះគម្ពីរប៊ីបនៅតែសំខាន់ ក្នុងការផ្តល់គំនិតយោបលសម្រាប់ការរស់នៅសព្វថ្ងៃ តែនៅតែគ្រោះថ្នាក់ នៅក្នុងការត្រាស់ហៅឲ្យមនុស្សជឿ និងដើរតាមព្រះយេស៊ូវ ហើយនៅតែមានភាពរំភើបរីករាយ នៅក្នុងការផ្តល់ចំណេះដឹងអំពីព្រះ និងមនុស្សជាតិ។ ព្រះគម្ពីរប៊ីបប្រៀបបាននឹងផ្លូវទឹក(ខ.៣) ដែលផ្តល់ឲ្យនូវការទ្រទ្រង់ជីវិត ដែលយើងត្រូវការជារៀងរាល់ថ្ងៃ។ ថ្ងៃនេះ ចូរយើងបន្ទន់ឥរិយាបថ ដើម្បីចំណាយពេល ប្រើវិធីសាស្រ្តត្រឹមត្រូវ និងទូលសូមព្រះទ្រង់ជួយយើង ឲ្យពិសោធន៍នឹងព្រះបន្ទូលព្រះអង្គ ក្នុងព្រះគម្ពីរប៊ីប ក្នុងលក្ខណៈជាឯកសារដ៏រស់។—Karen Pimpo
