ឈោងចាប់អ្នកដទៃ ថ្វាយព្រះយេស៊ូវ
ដោយTim Gustafson
November 2, 2021
ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍។ ម៉ាថាយ ២៨:១៩ កាល១ទសវត្សរ៍មុន កុលសម្ព័ន្ធបានវ័ន មិនទាន់បានស្គាល់ព្រះនាមព្រះយេស៊ូវទេ។ ដោយសារពួកគេរស់នៅ ក្នុងតំបន់ដែលបិទបំាងទៅដោយភ្នំជាច្រើន នៅខេត្តមីនដាណៅ ប្រទេសភីលីពីន នោះពួកគេមានទំនាក់ទំនងតែបន្តិចបន្តួច ជាមួយអ្នកខាងក្រៅ។ ការធ្វើដំណើរទៅចែកអំណោយដល់ពួកគេ ត្រូវចំណាយពេលពីរថ្ងៃ ដោយថ្មើរជើង តាមផ្លូវរដិបរដុបកាត់ព្រៃភ្នំ។ ពិភពលោកមិនបានចាប់អារម្មណ៍ពួកគេទេ។ បន្ទាប់មក មានក្រុមបេសកកម្មមួយ បានឈោងចាប់ពួកគេ ដោយនាំមនុស្សចេញចូលតំបន់នោះ តាមឧទ្ធម្ភាគចក្រ។ ការនេះបាននាំឲ្យកុលសម្ព័ន្ធបានវ័នអាចទទួលការផ្គត់ផ្គង់ និងជំនួយផ្នែកពេទ្យដ៏សំខាន់ ដែលពួកគេត្រូវការ ព្រមទាំងមានការយល់ដឹងអំពីពិភពខាងក្រៅ។ ការនេះក៏បាននាំពួកគេឲ្យស្គាល់ព្រះយេស៊ូវផងដែរ។ សព្វថ្ងៃនេះ ពួកគេមិនច្រៀងឲ្យពួកវិញ្ញាណអាក្រក់ស្តាប់ទៀតទេ តែពួកគេបានច្រៀងបទចម្រៀងប្រពៃណីកុលសម្ព័ន្ធរបស់ខ្លួន ដោយពាក្យពេចន៍ថ្មី ដែលសរសើរដំកើងព្រះដ៏ពិតតែមួយ។ ដូចនេះ ការបំពេញបេសកកម្ម ដោយការធ្វើដំណើរតាមផ្លូវអាកាសនេះ បានបង្កើតឲ្យមានការតភ្ជាប់ទំនាក់ទំនងដ៏សំខាន់។ ពេលដែលព្រះយេស៊ូវបានយាងត្រឡប់ទៅព្រះវរបិតាទ្រង់វិញ ទ្រង់ក៏បានបង្គាប់ពួកសិស្សទ្រង់ឲ្យ “ទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ”(ម៉ាថាយ ២៨:១៩)។ ព្រះរាជបញ្ជានេះ នៅតែមានអំណាចរហូតមកដល់សព្វថ្ងៃ។ ក្រុមមនុស្សដែលគេមិនទាន់ឈោងចាប់ មិនមែនមានតែ នៅក្នុងតំបន់ដាច់ស្រយាល ដែលយើងមិនដែលបានស្គាល់នោះទេ។ ពួកគេច្រើនតែកំពុងរស់នៅ ក្នុងចំណោមយើង។ ការឈោងចាប់កុលសម្ព័ន្ធបានវ័ន តម្រូវឲ្យគេមានភាពប៉ិនប្រសប់ និងមានធនធានច្រើន ហើយរឿងនេះក៏បានលើកទឹកចិត្តយើង ឲ្យស្វែងរកវិធីដ៏ប៉ិនប្រសប់ ដើម្បីជម្នះរនាំងនៃការផ្សាយដំណឹងល្អ ក្នុងសហគមន៍របស់យើងផងដែរ។ ក្រុមដែលគេមិនទាន់ឈោងចាប់នោះ អាចរាប់បញ្ចូល មនុស្សដែលអ្នកមិនបានគិតដល់ ដែលកំពុងរស់នៅក្នុងតំបន់ដែលអ្នករស់នៅជាដើម។ តើព្រះទ្រង់អាចប្រើអ្នក ឲ្យឈោងចាប់អ្នកដទៃ ថ្វាយព្រះយេស៊ូវ ដោយរបៀបណាខ្លះ?—Tim Gustafson តើនរណាខ្លះ ជាមនុស្សដែលពិបាកឈោងចាប់បំផុត ក្នុងតំបន់របស់អ្នក? តើអ្នកអាចប្រើវិធីសាស្រ្តអ្វី ដើម្បីនាំពួកគេ ឲ្យស្គាល់ព្រះយេស៊ូវ? ឱព្រះវរបិតា ទូលបង្គំសូមអធិស្ឋានឲ្យមនុស្ស ដែលហាក់ដូចជាពិបាកឈោងទៅរក ដោយសេចក្តីពិត និងក្តីស្រឡាញ់របស់ព្រះអង្គ។ សូមព្រះអង្គប្រើទូលបង្គំ តាមបំណងព្រះទ័យទ្រង់ ដើម្បីនាំពួកគេឲ្យជឿព្រះអង្គ។ Read Evangelism: Reaching Out Through Relationships at DiscoverySeries.org/Q0913. គម្រោងអានព្រះគម្ពីររយៈពេល១ឆ្នាំ : យេរេមា ២៧-២៩ និង ទីតុស ៣