មនុស្សដែលមានចិត្តសន្ធា នឹងបានបរិបូរ ហើយអ្នកណាដែលស្រោចទឹកដល់គេ នោះនឹងបានគេស្រោចទឹកដល់ខ្លួនដែរ។ សុភាសិត ១១:២៥
ពេលដែលអាជីវកម្មខ្នាតតូចជាច្រើន នៅរដ្ឋថេនេស៊ី បានបិទទ្វារភ្លាមៗ ដើម្បីទប់ស្កាត់ការរីករាលដាល នៃវីរូសកូវីត១៩ ម្ចាស់ហាងទាំងឡាយមានការព្រួយបារម្ភ អំពីការបង់ថ្លៃឈ្នួលបុគ្គលិក ការបង់ថ្លៃជួលហាង និងការឆ្លងកាត់វិបត្តិនេះ។ គ្រូគង្វាល របស់ព្រះវិហារមួយ នៅក្បែរទីក្រុងណាសវីឡ ក៏បានឆ្លើយតបចំពោះការព្រួយបារម្ភនេះ ដោយចាប់ផ្តើមរៃអង្គាសប្រាក់ សម្រាប់ជួយម្ចាស់អាជីវកម្មដែលកំពុងជួបការលំបាក។
លោកគ្រូគង្វាលក៏បានលើកទឹកចិត្តព្រះវិហារដទៃទៀត ក្នុងតំបន់ ឲ្យចូលរួម ក្នុងកិច្ចប្រឹងប្រែងនេះ ដោយពន្យល់ពួកគេថា “យើងមិនគិតថា យើងអាចអង្គុយស្រណុកស្រួល នៅលើប្រាក់បម្រុងសម្រាប់ពេលមានវិបត្តិ ខណៈពេលដែលអ្នកដទៃទៀត កំពុងតែជួបរឿងវិបត្តិនោះឡើយ”។
ប្រាក់បម្រុងសម្រាប់ពេលមានវិបត្តិ គឺជាប្រាក់ដែលគេបានញែកទុក សម្រាប់ពេលដែលចំណូលធម្មតាមានការថយចុះ នៅពេលណាមួយ ខណៈពេលដែលប្រតិបត្តិការណ៍ចាំបាច់ត្រូវបន្តទៅមុខទៀត។ វាជារឿងធម្មតាទេ ដែលយើងគិតអំពីខ្លួនឯងជាមុន តែព្រះគម្ពីរប៊ីបបានលើកទឹកចិត្តយើង មិនគ្រាន់តែគិតប្រយោជន៍ផ្ទាល់ខ្លួនប៉ុណ្ណោះទេ តែក៏ត្រូវស្វែងរកវិធីបម្រើអ្នកដទៃ និងមានចិត្តសប្បុរស។
បទគម្ពីរសុភាសិត ជំពូក ១១ បានរំឭកយើងថា “មានមនុស្សដែលចែកផ្សាយទ្រព្យ តែចេះតែចំរើនកើនឡើង ក៏មានមនុស្សដែលហួងហែងហួសខ្នាត តែគេចេះតែខ្វះខាតវិញ។ មនុស្សដែលមានចិត្តសទ្ធា នឹងបានបរិបូរ ហើយអ្នកណាដែលស្រោចទឹកដល់គេ នោះនឹងបានគេស្រោចទឹកដល់ខ្លួនដែរ”(ខ.២៤-២៥)។
តើផ្ទៃមេឃស្រឡះល្អ ក្នុងជីវិតអ្នក នៅថ្ងៃនេះឬទេ? ចូរមើលជុំវិញខ្លួនអ្នក ក្រែងលោមាននរណាម្នាក់ កំពុងតែស្ថិតក្នុងព្យុះភ្លៀង។ ព្រះពរដែលព្រះបានប្រទានអ្នក ដោយព្រះគុណទ្រង់ នឹងកើនឡើងជាពហុគុណ ពេលដែលអ្នកចែករំលែកព្រះពរ ដល់អ្នកដទៃ ដោយចិត្តជ្រះថ្លា។ ការមានចិត្តសប្បុរស និងបើកចំហ គឺជាវិធីដ៏ប្រសើរ ដើម្បីផ្តល់នូវក្តីសង្ឃឹម ដល់អ្នកដទៃ និងរំឭកអ្នកដែលកំពុងឈឺចាប់ថា ព្រះអង្គស្រឡាញ់ពួកគេ។—Cindy Hess Kasper
តើមាននរណាម្នាក់មានចិត្តសប្បុរស និងបើកចំហ នៅក្នុងការចែករំលែកធនធានដល់អ្នក នៅពេលណាខ្លះ? តើអ្នកអាចមានចិត្តសប្បុរសដូចនេះ សម្រាប់នរណាម្នាក់ នៅថ្ងៃនេះ ដោយរបៀបណា?
ឱព្រះប្រកបដោយព្រះគុណ សូមព្រះអង្គជួយទូលបង្គំ ឲ្យមានចិត្តទន់សន្តោស ចំពោះការខ្វះខាតរបស់អ្នកដទៃ ហើយបង្ហាញទូលបង្គំ នូវរបៀបដែលអាចចែករំលែកក្តីស្រឡាញ់ និងសេចក្តីសប្បុរសរបស់ព្រះអង្គ ដល់ពួកគេ។
គម្រោងអានព្រះគម្ពីររយៈពេល១ឆ្នាំ : យេរេមា ៣២-៣៣ និង ហេព្រើរ ១
