តើអ្នកណានឹងពង្រាត់យើងចេញពីសេចក្តីស្រឡាញ់របស់ផងព្រះគ្រីស្ទបាន តើសេចក្តីទុក្ខលំបាក ឬសេចក្តីវេទនា សេចក្តីបៀតបៀន សេចក្តីអត់ឃ្លាន សេចក្តីអាក្រាត សេចក្តីអន្តរាយ ឬដាវឬអី? រ៉ូម ៨:៣៥
ពេលឪពុករបស់ព្រីស(Pris) ជាគ្រូគង្វាល បានឆ្លើយតបការត្រាស់ហៅរបស់ព្រះ ឲ្យចាប់ផ្តើមការងារបេសកកម្ម នៅលើកោះតូចមួយ ក្នុងប្រទេសឥណ្ឌូណេស៊ី ក្រុមគ្រួសាររបស់ព្រីស ក៏បានទៅរស់នៅ ក្នុងខ្ទមចាស់មួយ ដែលកាលពីមុន ជាក្រោលសត្វ។ ព្រីសបាននឹកចាំពេលដែលក្រុមគ្រួសារគាត់អបអរថ្ងៃណូអែល ដោយអង្គុយនៅលើកម្រាលឥដ្ឋ ហើយច្រៀងសរសើរព្រះ ខណៈពេលទឹកភ្លៀងបានលិចតាមដំបូលស្បូវ។ ប៉ុន្តែ ឪពុកនាងបានរំឭកនាងថា “ព្រីស យើងក្រ តែមិនមែនមានន័យថា ព្រះទ្រង់មិនស្រឡាញ់យើងនោះទេ”។
អ្នកខ្លះគិតថា ជីវិតដែលព្រះប្រទានពរ ជាជីវិតដែលមានពេញដោយភាពសម្បូរសប្បាយ សុខភាពល្អ និងមានអាយុវែង។ ហេតុនេះហើយ ពេលមានទុក្ខលំបាក ពួកគេប្រហែលជាឆ្ងល់ថា ព្រះអង្គនៅតែស្រឡាញ់ពួកគេឬទេ។ តែក្នុងបទគម្ពីររ៉ូម ៨:៣១-៣៩ សាវ័កប៉ុលបានរំឭកយើងថា គ្មានអ្វីអាចពង្រាត់យើង ចេញពីសេចក្តីស្រឡាញ់របស់ព្រះយេស៊ូវ ដែលរាប់បញ្ចូលបញ្ហា ទុក្ខលំបាក ការបៀតបៀន និងភាពអត់ឃ្លានជាដើម(ខ.៣៥)។ ជីវិតដែលពិតជាមានពរ មានមូលដ្ឋានគ្រឹះនៅក្នុងសេចក្តីពិតដែលថា ព្រះទ្រង់បានបង្ហាញសេចក្តីស្រឡាញ់របស់ទ្រង់មកយើង ដោយចាត់ព្រះរាជបុត្រាទ្រង់ ព្រះនាមយេស៊ូវ ឲ្យយាងមកសុគត ដើម្បីលោះបាបយើង(ខ.៣២)។ ព្រះគ្រីស្ទមានព្រះជន្មរស់ពីសុគត ហើយសព្វថ្ងៃនេះ កំពុងតែគង់នៅខាងស្តាំព្រះវរបិតា ដើម្បីទូលអង្វរឲ្យយើង(ខ.៣៤)។
នៅពេលមានទុក្ខវេទនា យើងអាចប្រកាន់ខ្ជាប់តាមសេចក្តីពិត ដ៏កម្សាន្តចិត្តដែលថា ជីវិតយើងបានចាក់ឫសចូលទៅក្នុងការអ្វី ដែលព្រះយេស៊ូវបានធ្វើសម្រាប់យើង។ គ្មានអ្វីមួយ “ទោះសេចក្តីស្លាប់ ឬជីវិត … ឬអ្វីក៏ដោយដែលព្រះអង្គបានបង្កើត”(ខ.៣៨-៣៩) ដែលអាចពង្រាត់យើង ចេញពីសេចក្តីស្រឡាញ់របស់ព្រះអង្គបានឡើយ។ ទោះយើងស្ថិតក្នុងកាលៈទេសៈអ្វី មានទុក្ខលំបាកយ៉ាងណាក៏ដោយ យើងអាចនឹកចាំថា ព្រះទ្រង់គង់នៅជាមួយយើង ហើយគ្មានអ្វីអាចពង្រាត់យើង ចេញពីព្រះអង្គឡើយ។—Yohanna Suryani H.
តើអ្នកអាចរំឭកខ្លួនឯងយ៉ាងណាខ្លះ ដើម្បីនឹកចាំថា គ្មានអ្វីអាចពង្រាត់អ្នក ចេញពីសេចក្តីស្រឡាញ់របស់ព្រះយេស៊ូវបានឡើយ ? តើការដឹងអំពីសេចក្តីពិតនេះ បានផ្លាស់ប្តូររបៀបដែលអ្នកឆ្លើយតប ចំពោះបញ្ហាប្រឈមក្នុងជីវិត យ៉ាងណាខ្លះ?
ឱព្រះវរបិតា ដែលគង់នៅស្ថានសួគ៌ សូមព្រះអង្គបើកភ្នែក និងចិត្តទូលបង្គំ ឲ្យស្គាល់ក្តីស្រឡាញ់ព្រះអង្គកាន់តែច្បាស់ ហើយសូមជួយទូលបង្គំឲ្យដឹងថា សេចក្តីស្រឡាញ់របស់ព្រះអង្គ គឺគ្រប់គ្រាន់សម្រាប់ជីវិតទូលបង្គំ។
គម្រោងអានព្រះគម្ពីររយៈពេល១ឆ្នាំ : បរិទេវ ១-២ និង ហេព្រើរ ១០:១-១៨
