សូមឲ្យបាននៅជាប់ក្នុងព្រះវត្តមានទ្រង់
ដោយKirsten Holmberg
November 15, 2021
ខ្ញុំបានសូមសេចក្តីតែ១ពីព្រះយេហូវ៉ា…គឺឲ្យខ្ញុំបាននៅក្នុងដំណាក់នៃព្រះយេហូវ៉ា រាល់តែថ្ងៃអស់១ជីវិតខ្ញុំ។ ទំនុកដំកើង ២៧:៤ ខណៈពេលដែលហ្សែនឌ័រ(Zander) និងម្តាយគាត់ កំពុងតែដើរសំដៅទៅឡានរបស់ខ្លួន ហ្សែនឌ័រក៏បានគេចចេញពីរង្វង់ដៃរបស់ម្តាយគាត់ ហើយក៏បានស្ទុះរត់ទៅរកច្រកទ្វារព្រះវិហារវិញ ដោយមិនចង់ចាកចេញពីព្រះវិហារ។ ម្តាយគាត់រត់តាមពីក្រោយគាត់ ហើយក៏បានព្យាយាមណែនាំគាត់ដោយក្តីស្រឡាញ់ ដើម្បីឲ្យពួកគេអាចចាកចេញទៅផ្ទះ។ ពេលដែលម្តាយរបស់គាត់បានលើកគាត់ ពរ គាត់ក៏បានយំអណ្ដឺតអណ្ដក ហើយងាកមកក្រោយពីលើស្មារបស់ម្តាយគាត់ ទៅរកព្រះវិហារ ខណៈពេលដែលម្តាយគាត់ ពរគាត់ដើរចេញទៅ។ ហ្សែនឌ័រប្រហែលជាគ្រាន់តែវក់លេងជាមួយមិត្តភក្តិ នៅព្រះវិហារយ៉ាងសប្បាយរីករាយ តែភាពក្លៀវក្លារបស់គាត់ បានធ្វើឲ្យខ្ញុំនឹកចាំ អំពីបំណងចិត្តរបស់ស្តេចដាវីឌ ដែលចង់ថ្វាយបង្គំព្រះ។ ស្តេចដាវីឌបានទូលសូមព្រះអម្ចាស់ ឲ្យរារាំងសត្រូវរបស់ទ្រង់ ដើម្បីឲ្យទ្រង់មានការកម្សាន្តចិត្ត និងសន្តិសុខក៏ដោយ តែទ្រង់សព្វព្រះទ័យឲ្យសន្តិភាពបានកើតមាន ដើម្បីឲ្យទ្រង់អាច “រំពឹងមើលសេចក្តីលំអនៃព្រះយេហូវ៉ា ហើយនឹងពិនិត្យពិចារណានៅក្នុងព្រះវិហាររបស់ទ្រង់”(ទំនុកដំកើង ២៧:៤)។ ទ្រង់ប្រាថ្នាចង់នៅជាមួយព្រះអម្ចាស់ គ្រប់ទីកន្លែង ហើយអរសប្បាយនឹងព្រះវត្តមានព្រះអង្គ។ ទ្រង់ជាស្តេចដ៏អស្ចារ្យបំផុត និងជាវីរបុរសនៃសាសន៍អ៊ីស្រាអែល ដែលសព្វព្រះទ័យនឹងប្រើពេលដែលមានសុខសន្តិភាព ដើម្បី “ច្រៀង និងប្រគំតន្រ្តីថ្វាយព្រះអម្ចាស់”(ខ.៦)។ យើងអាចថ្វាយបង្គំព្រះ នៅគ្រប់ទីកន្លែង ដោយសេរី ដ្បិតព្រះអង្គគង់នៅក្នុងយើង តាមរយៈអង្គព្រះវិញ្ញាណបរិសុទ្ធ (១កូរិនថូស ៣:១៦ និង អេភេសូរ ៣:១៧)។ ចូរយើងមានចិត្តស្រេកឃ្លានចង់ចំណាយពេល ក្នុងព្រះវត្តមានព្រះអង្គ ហើយជួបជុំគ្នាថ្វាយបង្គំព្រះអង្គ ជាមួយអ្នកជឿដទៃទៀត។ យើងអាចរកឃើញសុវត្ថិភាព និងក្តីអំណរអស្ចារ្យបំផុត ក្នុងព្រះអង្គមិនមែនក្នុងសំណង់អគារនោះទេ។—Kirsten Holmberg តើពេលណា អ្នកបានពិសោធន៍នឹងចិត្តដែលឆេះឆួលចង់ថ្វាយបង្គំព្រះ? តើមានអ្វីរារាំងអ្នក មិនឲ្យពិសោធន៍នឹងការនេះ ឲ្យកាន់តែញឹកញាប់? ឱព្រះវរបិតា ព្រះអង្គជាក្តីអំណរ និងភាពរីករាយរបស់ទូលបង្គំ។ ទូលបង្គំចង់ថ្វាយបង្គំព្រះអង្គ ដោយគ្មានការរំខាន ឬការបែកអារម្មណ៍។ Read “Pure Worship,” at ODB.org/us/2020/03/08/pure-worship. គម្រោងអានព្រះគម្ពីររយៈពេល១ឆ្នាំ : អេសេគាល ១-២ និង ហេព្រើរ ១១:១-១៩