អត្តសញ្ញាណថ្មីរបស់យើង
ដោយPatricia Raybon
November 16, 2021
ព្រះយេស៊ូវមានព្រះបន្ទូលទៅស៊ីម៉ូនថា កុំខ្លាចអី ពីនេះទៅមុខ អ្នកនឹងចាប់មនុស្សវិញ។ លូកា ៥:១០ ថ្ងៃមួយ មានបុរសម្នាក់បានចូលទិញឧបករណ៍ស្ទូចត្រី ក្នុងហាងលក់ដងសន្ទូច ក្នុងទីក្រុងរបស់គាត់។ ពីដំបូង គាត់បានរើសយកប្រអប់សម្រាប់ដាក់ឧបករណ៍ស្ទូចត្រី រួចគាត់ក៏បានបំពេញរទេះដាក់ឥវ៉ាន់ ដោយផ្លែសន្ទូច ខ្សែ នុយ ប៉ោល និងដុំសំណ។ ទីបំផុត គាត់ក៏បានរើសយកនុយរស់ថែមទៀត ហើយក៏បានជ្រើសរើសដងសន្ទូចថ្មីមួយដើម។ ម្ចាស់ហាងក៏បានសួរគាត់ថា “ធ្លាប់ស្ទូចត្រីទេ?” បុរសនោះក៏បាននិយាយថា ទេ។ ម្ចាស់ហាងក៏បានប្រាប់គាត់ថា “យកល្អ លោកគួរតែទិញរបស់នេះផង”។ វាជាប្រអប់សង្រ្គោះបឋម។ បុរសនោះក៏បានយល់ព្រម ហើយក៏បានបង់ប្រាក់ បន្ទាប់មក ក៏បានចេញទៅស្ទូចត្រីពេញមួយថ្ងៃ ដោយស្ទូចមិនបានអ្វីសោះ ក្រៅពីធ្វើឲ្យមុតម្រាមដៃខ្លួនឯង។ លោកស៊ីម៉ូន ពេត្រុស មិនបានជួបបញ្ហាដូចនេះទេ។ ក្នុងនាមគាត់ជាអ្នកនេសាទដែលមានបទពិសោធន៍ គាត់មានការភ្ញាក់ផ្អើល នៅពេលព្រឹកមួយ ពេលដែលព្រះយេស៊ូវប្រាប់គាត់ ឲ្យចេញទូក ទៅទឹកជ្រៅ ហើយ “ទម្លាក់អួនចាប់ត្រី”(លូកា ៥:៤)។ ទោះមុននោះ គាត់ចាប់ត្រីមិនបានសោះ ពេញមួយយប់ គាត់ និងគ្នាគាត់ក៏បាន “ទម្លាក់អួនទៅ នោះក៏ជាប់បានត្រីសន្ធឹក ដល់ម៉្លេះបានជាអួនចាប់តាំងធ្លាយ”។ តាមពិត ពួកគេចាប់ត្រីបានពេញទូកទាំង២ ទាល់តែពៀបស្ទើរនឹងលិច(ខ.៧)។ កាលស៊ីម៉ូន-ពេត្រុសបានឃើញដូច្នោះ នោះគាត់ក្រាបនៅទៀបព្រះជង្ឃព្រះយេស៊ូវ ទូលថា “ព្រះអម្ចាស់អើយ សូមថយចេញពីទូលបង្គំ ដ្បិតទូលបង្គំជាមនុស្សមានបាប” (ខ.៨)។ ទោះជាយ៉ាងណាក៏ដោយ ព្រះយេស៊ូវស្គាល់អត្តសញ្ញាណពិតរបស់លោកស៊ីម៉ូន។ ព្រះយេស៊ូវមានព្រះបន្ទូលទៅស៊ីម៉ូនថា “កុំខ្លាចអី ពីនេះទៅមុខ អ្នកនឹងចាប់មនុស្សវិញ”។ រួចកាលទូកបានដល់គោក នោះគេទុករបស់ទាំងអស់ចោល ហើយដើរតាមទ្រង់ទៅ(ខ.១០-១១)។ ពេលយើងដើរតាមព្រះអង្គ ព្រះអង្គជួយយើង ឲ្យស្គាល់ខ្លួនយើងជានរណា ហើយព្រះអង្គបានត្រាស់ហៅយើង ឲ្យធ្វើអ្វី ក្នុងនាមយើងជាកម្មសិទ្ធិរបស់ទ្រង់។—Patricia Raybon ពេលមិនទាន់ជឿព្រះគ្រីស្ទ តើអ្នកមានអត្តសញ្ញាណ ឬតួនាទីជាអ្វី? ពេលអ្នកបានដើរតាមព្រះអង្គ តើអត្តសញ្ញាណអ្នកបានផ្លាស់ប្តូរដូចម្តេចខ្លះ? ឱព្រះវរបិតា ពេលណាទូលបង្គំមានការពិបាក ក្នុងការស្គាល់អត្តសញ្ញាណពិតរបស់ទូលបង្គំ សូមព្រះអង្គរំឭកទូលបង្គំ ឲ្យដើរតាមព្រះអង្គ ដើម្បីស្គាល់ខ្លួនឯងច្បាស់។ គម្រោងអានព្រះគម្ពីររយៈពេល១ឆ្នាំ : អេសេគាល ៣-៤ និង ហេព្រើរ ១១:២០-៤០