ការកំណត់ចាំព្រះបន្ទូលក្នុងចិត្ត
ដោយXochitl Dixon
November 23, 2021
ទូលបង្គំបានកំណត់ចាំព្រះបន្ទូលទ្រង់ទុកនៅក្នុងចិត្ត ប្រយោជន៍កុំឲ្យទូលបង្គំធ្វើបាបនឹងទ្រង់ឡើយ។ ទំនុកដំកើង ១១៩:១១ ពេលដែលអេម៉ា(Emma) ចែកចាយ អំពីរបៀបដែលព្រះទ្រង់ជួយនាង ឲ្យឱបក្រសោបយកអត្តសញ្ញាណរបស់នាង ជាកូនស្ងួនភ្ងារបស់ទ្រង់ នាងក៏បានយកខគម្ពីរមកនិយាយ ក្នុងការសន្ទនារបស់យើងផងដែរ។ ខ្ញុំស្ទើរតែមិនអាចជឿ ពេលដែលបានឃើញសិស្សវិទ្យាល័យម្នាក់នេះ បានឈប់ចែកចាយ ដោយប្រើពាក្យពេចន៍របស់នាង តែចាប់ផ្តើមដកស្រង់ព្រះបន្ទូលព្រះ មកនិយាយវិញ។ ពេលដែលខ្ញុំនិយាយសរសើរថា នាងប្រៀបដូចជាមនុស្សព្រះគម្ពីរដែលចេះដើរ នាងក៏បានជ្រួញចិញ្ចើម។ នាងបានលើកយកខគម្ពីរទាំងនោះមកប្រើ ដោយមិនដឹងខ្លួន។ តាមរយៈការអានព្រះគម្ពីរប្រចាំថ្ងៃ ប្រាជ្ញានៅក្នុងព្រះគម្ពីរបានក្លាយជាផ្នែកមួយនៃពាក្យសម្តីរបស់អេម៉ា ជារៀងរាល់ថ្ងៃ។ នាងអរសប្បាយ ក្នុងព្រះវត្តមានដ៏ស្ថិតស្ថេររបស់ព្រះ ហើយអរសប្បាយនឹងឱកាសនីមួយៗ ដែលព្រះអង្គប្រទាន ឲ្យចែកចាយសេចក្តីពិតទ្រង់ ដល់អ្នកដទៃ។ ប៉ុន្តែ អេម៉ាមិនមែនជាយុវជនទីមួយ ដែលព្រះទ្រង់បានប្រើ ដើម្បីជំរុញចិត្តអ្នកដទៃ ឲ្យអាន ទន្ទេញ និងអនុវត្តតាមខគម្ពីរនោះឡើយ។ ពេលដែលសាវ័កប៉ុលលើកទឹកចិត្តលោកធីម៉ូថេ ឲ្យបោះជំហានចូលទៅក្នុងភាពជាអ្នកដឹកនាំ គាត់បានបង្ហាញទំនុកចិត្តចំពោះយុវជនម្នាក់នេះ(១ធីម៉ូថេ ៤:១១-១៦)។ សាវ័កប៉ុលទទួលស្គាល់ថា លោកធីម៉ូថេបានចាក់ឫសចូលក្នុងព្រះគម្ពីរ តាំងពីតូច(២ធីម៉ូថេ ៣:១៥)។ លោកធីម៉ូថេបានជួយមនុស្សដែលមិនទុកចិត្តព្រះ គឺមិនខុសពីសាវ័កប៉ុលឡើយ។ ប៉ុន្តែ បុរសទំាងពីរបានរស់នៅ ដោយជឿថា គ្រប់ទំាងបទគម្ពីរ គឺ “ព្រះទ្រង់បណ្តាលឲ្យតែង”។ ពួកគេទទួលស្គាល់ថា ព្រះគម្ពីរ “ក៏មានប្រយោជន៍សំរាប់ការបង្រៀន ការរំឭកឲ្យដឹងខ្លួន ការប្រដៅដំរង់ និងការបង្ហាត់ខាងឯសេចក្តីសុចរិត ដើម្បីឲ្យអ្នកសំណប់របស់ព្រះបានគ្រប់លក្ខណ៍ ហើយមានគ្រប់ទាំងចំណេះ សំរាប់នឹងធ្វើការល្អគ្រប់មុខ”(២ធីម៉ូថេ ៣:១៦-១៧)។ ពេលណាយើងកំណត់ប្រាជ្ញារបស់ព្រះ ទុកក្នុងចិត្តយើង សេចក្តីពិត និងសេចក្តីស្រឡាញ់របស់ទ្រង់ អាចចាក់បង្ហូរចូលក្នុងការសន្ទនាយើង ជាធម្មតា។ យើងអាចរស់នៅ ដោយចែកចាយសេចក្តីសង្ឃឹមដ៏អស់កល្បរបស់ព្រះ ទោះយើងទៅណាក៏ដោយ។—Xochitl Dixon តើអ្នកកំណត់ទុកព្រះបន្ទូលព្រះ ក្នុងចិត្ត និងគំនិតយើង ដោយរបៀបណា? តើព្រះទ្រង់បានប្រើប្រាជ្ញាទ្រង់យ៉ាងណា ដើម្បីជួយអ្នក ឲ្យកាន់តែមានទំនុកចិត្ត ក្នុងការចែកចាយសេចក្តីពិត និងសេចក្តីស្រឡាញ់ដល់អ្នកដទៃ? ឱព្រះវរបិតានៃសេចក្តីនៃសេចក្តីស្រឡាញ់ សូមព្រះអង្គជួយឲ្យចិត្តទូលបង្គំ ជ្រួតជ្រាប ទៅដោយប្រាជ្ញា ដែលផ្លាស់ប្រែជីវិត ដើម្បីឲ្យទូលបង្គំអាចចែកចាយ អំពីព្រះអង្គ ដល់អ្នកដទៃ ជាធម្មតា ដោយចិត្តស្មោះត្រង់ និងដោយចិត្តក្លាហាន។ To learn how to effectively study the Bible, visit ChristianUniversity.org/SF106. គម្រោងអានព្រះគម្ពីររយៈពេល១ឆ្នាំ : អេសេគាល ២០-២១ និង យ៉ាកុប ៥