ការចូលរួមរបស់មនុស្សពីគ្រប់ជាតិសាសន៍
ដោយAmy Boucher Pye
December 9, 2021
ក្រោយនោះមក ខ្ញុំក្រឡេកទៅឃើញមនុស្ស១ហ្វូងយ៉ាងធំ ដែលគ្មានអ្នកណាអាចនឹងរាប់បានឡើយ គេមកពីគ្រប់ទាំងសាសន៍ គ្រប់ទាំងពូជមនុស្ស គ្រប់ទាំងគ្រួសារ ហើយគ្រប់ទាំងភាសា ។ វិវរណៈ ៧:៩ យើងបានមកជួបជុំគ្នា សម្រាប់កម្មវិធីថ្វាយបង្គំនៅថ្ងៃអាទិត្យ ដោយក្តីអំណរ និងការរំពឹងចង់បាន។ ទោះសព្វថ្ងៃនេះ យើងត្រូវនៅដាច់ដោយឡែកពីគ្នា នៅតាមតំបន់ខុសៗគ្នា ដោយសារការរាតត្បាតនៃជំងឺកូវីឌ យើងនៅតែស្វាគមន៍ឱកាសអបអរពិធីមង្គលការរបស់លោកហ្គាវិន(Gavin) និងកញ្ញាទីយ៉ាណា(Tijana)។ មិត្តភក្ដិយើងជាជនជាតិអ៊ីរ៉ង់ ដែលមានអំណោយទានផ្នែកបច្ចេកវិទ្យា បានចាក់ផ្សាយផ្ទាល់នូវកម្មវិធីរៀបមង្គលការ ដល់មិត្តភក្តិ និងបងប្អូន នៅតំបន់ផ្សេងៗ ដោយរាប់បញ្ចូលទំាងប្រទេសអេស្ពាញ ប៉ូឡូញ និងសឺបៀ។ ដំណោះស្រាយដ៏ប៉ិនប្រសព្វនេះ បានជួយឲ្យយើងជម្នះការលំបាកក្នុងការជួបជុំគ្នា ខណៈពេលដែលយើងអរសប្បាយ នៅក្នុងការចូលរួមពិធីមង្គលការនោះ។ ព្រះវិញ្ញាណរបស់ព្រះបង្រួបបង្រួមយើង ហើយប្រទានយើងនូវក្តីអំណរ។ ពេលព្រឹកថ្ងៃអាទិត្យនោះ អ្នកចូលរួមដែលមានជាតិសាសន៍ខុសគ្នា នៅប្រទេសផ្សេងគ្នា បានធ្វើការអបអរសាទរដល់គូរស្វាមីភរិយាថ្មី ហើយក៏បានធ្វើឲ្យខ្ញុំនឹកចាំ អំពីសិរីល្អដែលនឹងមកដល់ ពេលដែលមនុស្សមកពី “គ្រប់ជាតិសាសន៍ កុលសម្ព័ន្ធ និងភាសា” នឹងឈរនៅចំពោះព្រះ នៅនគរស្ថានសួគ៌(វិវរណៈ ៧:៩)។ សាវ័កយ៉ូហាន បានទទួលការបើកសម្តែង ឲ្យឃើញ “មនុស្សដ៏ច្រើនសន្ធឹកនេះ” ហើយក៏បានកត់ត្រារឿងនេះទុក ក្នុងកណ្ឌគម្ពីរវិវរណៈ។ អ្នកដែលមកជួបជុំគ្នានៅទីនោះ នឹងថ្វាយបង្គំព្រះទាំងអស់គ្នា ជាមួយពួកទេវតា និងពួកចាស់ទុំ ដោយបន្លឺសម្លេងសរសើរព្រមគ្នាថា “សូមថ្វាយព្រះពរ សិរីល្អ ប្រាជ្ញា ពាក្យអរព្រះគុណ កិត្តិនាម ព្រះចេស្តា និងឥទ្ធិឫទ្ធិ ដល់ព្រះនៃយើងរាល់គ្នា នៅអស់កល្បជានិច្ចរៀងរាបតទៅ អាម៉ែន”(ខ.១២)។ ការជួបជុំ និងមង្គលការរវាងព្រះយេស៊ូវ និងកូនក្រមុំរបស់ទ្រង់ មកពីគ្រប់ជាតិសាសន៍ ក្នុង “ការមកបរិភោគការកូនចៀម”(១៩:៩) នឹងក្លាយជាពេលថ្វាយបង្គំ និងអបអរសាទរដ៏អស្ចារ្យ។ បទពិសោធន៍ដែលពួកខ្ញុំទទួលបាននៅថ្ងៃអាទិត្យនោះ ជាមួយមនុស្សនៅប្រទេសជាច្រើន បានចង្អុលបង្ហាញឲ្យខ្ញុំ ងាកទៅរកព្រឹត្តិការណ៍នេះ ដែលថ្ងៃមួយយើងនឹងបានអរសប្បាយទាំងអស់គ្នា។ ខណៈពេលដែលយើងកំពុងរង់ចាំ ដោយក្តីសង្ឃឹមថា នឹងបានចូលរួមព្រឹត្តិការណ៍ដ៏មានអំណរនោះ នៅនគរស្ថានសួគ៌ យើងអាចឱបក្រសោបយកការប្រកបគ្នា និងអរសប្បាយជាមួយគ្នា ក្នុងចំណោមរាស្រ្តទ្រង់ ក្នុងការរស់នៅសព្វថ្ងៃ។—Amy Boucher Pye តើអ្នកយល់ឃើញយ៉ាងណា អំពីការជួបជុំរបស់មនុស្សដ៏ច្រើនសន្ធឹក និងការបរិភោគការរបស់កូនចៀម? តើការទទួលការអញ្ជើញ ឲ្យចូលរួមការអបអរដ៏អស្ចារ្យ នៅស្ថានសួគ៌ មានឥទ្ធិពលយ៉ាងណា មកលើជីវិតអ្នកប្រចាំថ្ងៃ? ឱកូនចៀមនៃព្រះ ព្រះអង្គបានដកអំពើបាប ចេញពីពិភពលោកនេះ និងពីទូលបង្គំ។ សូមអរព្រះគុណ សម្រាប់ការអញ្ជើញដ៏អស្ចារ្យ ឲ្យទូលបង្គំចូលរួមពិធីមង្គលការរបស់ព្រះអង្គនៅស្ថានសួគ៌។ គម្រោងអានព្រះគម្ពីររយៈពេល១ឆ្នាំ : ដានីយ៉ែល ១១-១២ និង យូដាស