ទ្រង់បានដោះឲ្យទូលបង្គំរួចពីខ្មាំងសត្រូវយ៉ាងខ្លាំងរបស់ទូលបង្គំ។ ២សាំយ៉ូអែល ២២:១៨
កាលពីឆ្នាំ២០១០ ពេលដែលលោកចច វូជណូវិជ(George Vujnovich) មានអាយុ៩៤ឆ្នាំ គាត់បានទទួលរង្វាន់ផ្កាយសំរឹត សម្រាប់ការរៀបចំការជួយសង្រ្គោះមួយ ដែលសារព័ត៌មានញូយ៉កថែមបានហៅថា “ការជួយសង្រ្គោះមួយ ក្នុងចំណោមការជួយសង្រ្គោះអស្ចារ្យបំផុត ក្នុងសម័យសង្រ្គាម លោកលើកទី២។ លោកវូជណូវិជ ជាកូនជនជាតិសឺបៀ ដែលបានផ្លាស់មករករស់នៅក្នុងសហរដ្ឋអាមេរិក។ គាត់បានចូលបម្រើការក្នុងជួរទ័ពអាមេរិក។ ពេលដែលគាត់បានទទួលដំណឹងថា ពួកទ័ពអាកាសរបស់អាមេរិក ដែលធ្លាក់យន្តហោះ កំពុងស្ថិតក្រោមការការពាររបស់ពួកឧទាមនៅប្រទេសយូហ្គោស្លាវី គាត់ក៏បានវិលត្រឡប់ទៅស្រុកកំណើតរបស់ក្រុមគ្រួសារគាត់វិញ ដោយលោតឆ័ត្រយោង ចូលទៅក្នុងព្រៃ ដើម្បីស្វែងរកទីតាំងរបស់ពួកអ្នកបើកយន្តហោះទាំងនោះ។ គាត់បានចែកពួកគេជាក្រុមតូចៗ ហើយបង្រៀនពួកគេ អំពីរបៀបរស់នៅជាមួយជនជាតិសឺបៀ(ដោយស្លៀកពាក់ខោអាវ និងបរិភោគអាហារជនជាតិសឺបៀ)។ បន្ទាប់មក គាត់បានចំណាយពេលជាច្រើនខែ ដើម្បីនាំពួកគេចេញម្តងមួយក្រុមៗ ទៅរកយន្តហោះដឹកជញ្ជូនC-47 ដែលកំពុងរង់ចាំ នៅលើផ្លូវសម្រាប់ចុះចត ដែលគេបានបង្កើតឡើង ដោយការកាប់ឆ្ការព្រៃ។ លោកវូជណូវិជក៏បានសង្រ្គោះពួកទ័ពអាកាស៥១២នាក់ ដែលសុទ្ធតែមានពេញដោយអំណរ។
ស្តេចដាវីឌបានពិពណ៌នា អំពីក្តីអំណរដែលកើតមាន ពេលដែលព្រះបានសង្រ្គោះទ្រង់ ឲ្យរួចផុតពីខ្មាំងសត្រូវដែលបានឡោមព័ទ្ធជុំជិត។ ស្តេចដាវីឌមានបន្ទូលថា ព្រះទ្រង់ “ចាត់ពីលើស្ថានដ៏ខ្ពស់ ឲ្យមកចាប់ទូលបង្គំស្រង់ចេញពីទឹកធំ”(២សាំយ៉ូអែល ២២:១៧)។ ស្តេចសូលក៏មានព្រះទ័យក្រោធ ដោយការច្រណែន។ ទ្រង់បានតាមសម្លាប់ដាវីឌ ដោយគ្មានត្រាប្រណី។ តែព្រះទ្រង់មានផែនការ។ គឺដូចដែលស្តេចដាវីឌបានមានបន្ទូលថា “ទ្រង់បានដោះឲ្យទូលបង្គំរួចពីខ្មាំងសត្រូវយ៉ាងខ្លាំងរបស់ទូលបង្គំ គឺពីពួកអ្នកដែលស្អប់ទូលបង្គំ ដ្បិតគេមានកំឡាំងច្រើនជាងទូលបង្គំ”(ខ.១៨)។
ព្រះទ្រង់បានសង្រ្គោះដាវីឌឲ្យរួចពីស្តេចសូល។ ទ្រង់សង្គ្រោះរាស្រ្តអ៊ីស្រាអែល ឲ្យរួចផុតពីនគរអេស៊ីព្ទ។ ហើយក៏បានសង្រ្គោះយើងរាល់គ្នា តាមរយៈព្រះយេស៊ូវ។ ព្រះយេស៊ូវសង្រ្គោះយើង ឲ្យរួចពីបាប ការអាក្រក់ និងសេចក្តីស្លាប់។ ព្រះអង្គមានអំណាចលើខ្មាំងសត្រូវគ្រប់យ៉ាង។—Winn Collier
តើអ្នកធ្លាប់មានអារម្មណ៍ថា ទាល់ច្រក ដោយមិនអាចគេចចេញពីការកុហក ឬអំពើបាបដែលបានចងរឹតអ្នកឬទេ? តើព្រះយេស៊ូវបានជួយរំដោះអ្នកយ៉ាងណាខ្លះ?
ឱព្រះដ៏មានគ្រប់ចេស្តា ទូលបង្គំត្រូវការការសង្រ្គោះ។ បើគ្មានជំនួយពីព្រះអង្គទេ ទូលបង្គំនឹងពិបាកជាខាន។ ទូលបង្គំទាល់ច្រកហើយ។ ដូចនេះ ទូលបង្គំសូមងាកមករកព្រះអង្គ។ សូមព្រះអង្គជួយទូលបង្គំផង។
គម្រោងអានព្រះគម្ពីររយៈពេល១ឆ្នាំ : ហូសេ ១-៤ និង វិវរណៈ ១
