ស្តេចទ្រង់មានព្រះបន្ទូលសួរខ្ញុំថា ដូច្នេះ តើអ្នកចង់បានអ្វី ខ្ញុំក៏អធិស្ឋានដល់ព្រះនៃស្ថានសួគ៌។ នេហេមា ២:៤
មានពេលមួយ ខ្ញុំឆៀងចូលរកមើលសៀវភៅ ក្នុងប្រអប់ដែលមានឈ្មោះលោក ស៊ី អេស លូអ៊ីស(Lewis) នៅហាងលក់សៀវភៅដែលគេបានប្រើហើយ។ ម្ចាស់ហាងក៏បានចេញមក។ ពេលយើងជជែកគ្នា អំពីចំណងជើងសៀវភៅ ដែលលក់ក្នុងហាងនោះ ខ្ញុំឆ្ងល់ថា តើគាត់មានចំណាប់អារម្មណ៍ ចំពោះជំនឿ ដែលបានបណ្តាលចិត្តលោកលូអ៊ីសឲ្យនិពន្ធសៀវភៅដ៏ល្បីល្បាញទាំងនោះ។ ខ្ញុំក៏បានអធិស្ឋានយ៉ាងស្ងាត់ស្ងៀម សូមការដឹកនាំមកពីព្រះ។ ខ្ញុំក៏បាននឹកឃើញជីវប្រវត្តិរបស់លោកលូអ៊ីស ហើយក៏បានចាប់ផ្តើមពិភាក្សា អំពីរបៀបដែលតួអង្គរបស់លោកស៊ី អេស លូអ៊ីស ចង្អុលបង្ហាញគេ ឲ្យងាករកព្រះ។ ទីបំផុត ខ្ញុំអរព្រះគុណព្រះអង្គ ដែលការអធិស្ឋានក្នុងចិត្តតែបន្តិច អាចជួយឲ្យការសន្ទនារបស់យើង ងាកបែរទៅរករឿងខាងវិញ្ញាណ។
លោកនេហេមាបានចំណាយពេលអធិស្ឋាន មុនពេលការសន្ទនាដ៏សំខាន់ជាមួយស្តេចអើថាស៊ើកសេស នៃចក្រភពពើរស៊ី។ ស្តេចបានសួរលោកនេហេមាថា មានការអ្វីដែលទ្រង់អាចជួយគាត់ទេ ខណៈពេលដែលគាត់កំពុងមានទុក្ខព្រួយ ដោយសារការបំផ្លិចបំផ្លាញទីក្រុងយេរូសាឡិម។ លោកនេហេមាជាអ្នកបម្រើស្តេច ដូចនេះ គាត់គ្មានតួនាទីអ្វីដែលត្រូវសុំឲ្យស្តេចជួយនោះទេ តែគាត់ត្រូវការជំនួយដ៏សំខាន់មួយ។ គាត់ចង់ស្តាទីក្រុងយេរូសាឡិមឡើងវិញ។ ដូចនេះ គាត់ក៏បាន “អធិស្ឋានដល់ព្រះដែលគង់នៅស្ថានសួគ៌” មុនពេលគាត់លាចេញពីការងាររបស់គាត់ ដើម្បីឲ្យគាត់អាចជួសជុលទីក្រុងឡើងវិញ(នេហេមា ២:៤-៥)។ ស្តេចក៏បានអនុញ្ញាត ហើយថែមទាំងព្រមជួយលោកនេហេមា ក្នុងការរៀបចំការធ្វើដំណើរ និងផ្គត់ផ្គង់ឈើសម្រាប់គម្រោងសាងសង់នោះផងដែរ។
ព្រះគម្ពីរបានលើកទឹកចិត្តយើង ឲ្យប្រើសេចក្តីអធិស្ឋាន និងសេចក្តីទូលអង្វរគ្រប់យ៉ាង(អេភេសូរ ៦:១៨)។ ការនេះរាប់បញ្ចូលពេលដែលយើងត្រូវការសេចក្តីក្លាហាន ការដឹងខ្នាត ឬសូមឲ្យយើងឆាប់ឆ្លើយតប ចំពោះព្រះវិញ្ញាណជាដើម។ ការអធិស្ឋាន មុនពេលយើងនិយាយ អនុញ្ញាតឲ្យព្រះទ្រង់គ្រប់គ្រងអាកប្បកិរិយា និងពាក្យសម្តីរបស់យើង។
តើព្រះអង្គសព្វព្រះទ័យនឹងដឹកនាំពាក្យសម្តីរបស់អ្នក នៅថ្ងៃនេះ យ៉ាងដូចម្តេចខ្លះ? ចូរទូលសូមព្រះអង្គ ហើយរង់ចាំព្រះអង្គធ្វើការ។—Jennifer Benson Schuldt
តើអ្នកត្រូវការព្រះអង្គជួយកែប្រែរបៀបនៃការនិយាយស្តីមួយណា? តើអ្នកចាំបាច់ត្រូវអធិស្ឋាន អំពីស្ថានភាពណាខ្លះ ក្នុងជីវិតអ្នក?
ឱព្រះអម្ចាស់ ទូលបង្គំសូមព្រះអង្គគ្រប់គ្រងពាក្យសម្តីរបស់ទូលបង្គំ។ សូមព្រះអង្គប្រើពាក្យសម្តីទូលបង្គំ ដើម្បីថ្វាយសិរីល្អដល់ព្រះអង្គ ព្រមទាំងបណ្តាលចិត្ត និងលើកទឹកចិត្តអ្នកដទៃផងដែរ។
To learn more about the act of prayer, visit ChristianUniversity.org/SF120.
គម្រោងអានព្រះគម្ពីររយៈពេល១ឆ្នាំ : យ៉ូអែល ១-៣ និង វិវរណៈ ៥
