ប្រាជ្ញាជាដើមឈើនៃជីវិតដល់អស់អ្នកណាដែលចាប់យកបាន។ សុភាសិត ៣:១៨
លោកអេដវើត ជែកសិន(Edward Jackson) ដែលជាអ្នកស្វែងរករ៉ែមាស បានចេញទៅដំណើរទៅរដ្ឋកាលីហ្វូញ៉ា ក្នុងអំឡុងសម័យផ្អើលរករ៉ែមាសធំបំផុត ក្នុងប្រវត្តិសាស្រ្តអាមេរិក។ ក្នុងសៀវភៅកំណត់ហេតុរបស់គាត់ គាត់បានសរសេរ អំពីហេតុការណ៍ នៅថ្ងៃទី២០ ខែឧសភា ឆ្នាំ១៨៤៩ ដោយពោលទំនួញ អំពីការធ្វើដំណើរដ៏លំបាកលំបិន ដោយជិះរទេះគោជាក្រុម ដែលដិតដាមដោយជម្ងឺ និងសេចក្តីស្លាប់។ គាត់សរសេរថា “ខ្ញុំមិនត្រូវចោលឆ្អឹងនៅទីនេះទេ។ បើសិនជាអាច សូមឲ្យខ្ញុំបានស្លាប់នៅផ្ទះវិញ”។ អ្នកស្វែងរករ៉ែមាសម្នាក់ទៀត ឈ្មោះ ចន វ៉កឃ័រ(John Walker) ក៏បានសរសេរផងដែរថា “វាជាការផ្សងសំណាងទាំងស្រុង ដូចការចាក់ឆ្នោតអញ្ចឹង…ខ្ញុំមិនអាចផ្តល់យោបល់ ឲ្យនរណាម្នាក់មកទីនេះទេ”។
តាមពិត លោកវ៉កឃ័របានវិលត្រឡប់មកផ្ទះវិញ ហើយក៏បានជោគជ័យ ក្នុងរបរកសិកម្ម ចិញ្ចឹមសត្វ និងនយោបាយក្នុងរដ្ឋរបស់គាត់។ ពេលដែលសមាជិកគ្រួសារគាត់ម្នាក់ បានយកសំបុត្រកំណត់ហេតុកញ្ចាស់របស់គាត់ ដែលប្រែពណ៌លឿង ទៅកម្មវិធីពិពណ៌វត្ថុបុរាណ ក្នុងកម្មវិធីទូរទស្សន៍អាមេរិក គេក៏បានឲ្យតម្លៃសំបុត្រនោះរាប់ពាន់ដុល្លា។ ពិធីករទូរទស្សន៍ក៏បានមានប្រសាសន៍ថា “ដូចនេះ គាត់ពិតជារកបានរបស់មានតម្លៃ ក្នុងសម័យផ្អើលរកមាស។ គឺសំបុត្រនេះឯង”។
ជាងនេះទៅទៀត ទាំងលោកវ៉កឃ័រ និងលោកចនសិន បានវិលត្រឡប់មកផ្ទះវិញ បន្ទាប់ពីទទួលបាននូវប្រាជ្ញា ដែលបណ្តាលចិត្តពួកគេ ឲ្យរស់នៅ ដែលមានការប្រតិបត្តិជាក់ស្តែងពិតប្រាកដជាង។ សូមយើងពិចារណា អំពីពាក្យនៃប្រាជ្ញារបស់ស្តេចសាឡូម៉ូន ដែលបានចែងថា “សប្បាយហើយ អស់អ្នកណាដែលរកបានប្រាជ្ញា … ប្រាជ្ញាជាដើមឈើនៃជីវិតដល់អស់អ្នកណាដែលចាប់យកបាន”(សុភាសិត ៣:១៣,១៨) ។ ការសម្រេចចិត្តគួរតែប្រកបដោយប្រាជ្ញា ដែល“វិសេសជាងបានប្រាក់ទៅទៀត ហើយកំរៃអំពីនោះមកក៏ប្រសើរជាងមាសសុទ្ធផង”(ខ.១៤) ហើយមានតម្លៃលើសអ្វីៗដែលចិត្តមនុស្សប្រាថ្នាចង់បាន នៅលើផែនដី(ខ.១៥)។
“មានអាយុវែងនៅដៃស្តាំ ព្រមទាំងទ្រព្យសម្បត្តិ និងកិត្តិសព្ទនៅដៃឆ្វេងនៃប្រាជ្ញានោះ អស់ទាំងផ្លូវរបស់ប្រាជ្ញា សុទ្ធតែជាផ្លូវសោមនស្ស ហើយអស់ទាំងផ្លូវច្រកនោះក៏ជាសេចក្តីសុខដែរ”(ខ.១៦-១៧)។ ដូចនេះ អ្វីដែលយើងត្រូវធ្វើនោះ គឺត្រូវតោងឲ្យជាប់ប្រាជ្ញា មិនមែនដេញតាមសេចក្តីប្រាថ្នានោះឡើយ។ នេះជាផ្លូវដែលព្រះទ្រង់នឹងប្រទានពរ។—Patricia Raybon
តើមានសេចក្តីប្រាថ្នាអ្វី ដែលអ្នកកំពុងដេញតាម ក្នុងជីវិត? តើផ្លូវនៃប្រាជ្ញាអាចនាំជីវិតអ្នកទៅរកអ្វី?
ឱព្រះវរបិតា ដែលគង់នៅស្ថានសួគ៌ ពេលដែលទូលបង្គំមានភាពងងឹតងងុល ដោយការលួងលោម នៃសេចក្តីប្រាថ្នា សូមព្រះអង្គបណ្តាលចិត្តទូលបង្គំឲ្យធ្វើការសម្រេចចិត្ត ប្រកបដោយប្រាជ្ញា ដោយដើរក្នុងផ្លូវនៃប្រាជ្ញា ត្រឡប់ទៅរកសន្តិភាពប្រកបដោយព្រះពររបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : សាការី ១៣-១៤ និង វិវរណៈ ២១
