ចូរអត់ទោសឲ្យគេចុះ ដូចជាព្រះគ្រីស្ទបានអត់ទោសឲ្យអ្នករាល់គ្នាដែរ។ កូល៉ុស ៣:១៣
បណ្តាញសង្គមទ្វីតធ័រ(Twitter) បានបង្កើតវេទិការមួយ ដែលមនុស្សនៅទូទាំងពិភពលោកអាចប្រើ ដើម្បីបញ្ចេញគំនិតយោបល់របស់ខ្លួន ដោយប្រើសំណេរខ្លីៗ។ ទោះជាយ៉ាងណាក៏ដោយ កាលពីពេលថ្មីៗនេះ រូបមន្តនេះកាន់តែមានភាពរញ៉េរញ៉ៃ ខណៈពេលដែលបុគ្គលជាច្រើនបានចាប់ផ្តើមប្រើទ្វីតធ័រ ជាឧបករណ៍ ដើម្បីកែតម្រង់អ្នកដទៃ ដែលមានអាកប្បកិរិយា និងរបៀបនៃការរស់នៅ ដែលពួកគេមិនចូលចិត្ត។ បើសិនជាអ្នកចូលទៅក្នុងវេទិកានេះ នៅថ្ងៃក៏បាន នោះអ្នកនឹងឃើញមនុស្សជាច្រើននាំគ្នាលើកឈ្មោះមនុស្សម្នាក់ មកបង្ហោះតគ្នាពីម្នាក់ទៅម្នាក់។ ពេលដែលអ្នកចុចពីលើឈ្មោះនោះ អ្នកនឹងឃើញថា មនុស្សរាប់លាននាក់ កំពុងតែបញ្ចេញគំនិតយោបល់ អំពីរឿងចម្រូងចម្រាស់ណាមួយ ដែលគាត់កំពុងតែមាន។
យើងបានរៀនរិះគន់ជាសាធារណៈ អំពីរឿងគ្រប់យ៉ាង រាប់ចាប់តាំងពីជំនឿដែលគេមាន រហូតដល់ការស្លៀកពាក់របស់គេ។ ទោះជាយ៉ាងណាក៏ដោយ តាមពិត អាកប្បកិរិយាដែលចូលចិត្តរិះគន់គេ ដោយគ្មានក្តីស្រឡាញ់នេះ មិនសមស្របនឹងបំណងព្រះទ័យព្រះ ដែលបានត្រាស់ហៅយើងឲ្យធ្វើជាអ្នកជឿព្រះយេស៊ូវនោះទេ។ មានពេលខ្លះ យើងត្រូវប្រឈមមុខដាក់ការមិនចុះសម្រុងគ្នា តែព្រះគម្ពីរបានរំឭកយើងថា ក្នុងនាមយើងជាអ្នកជឿ យើងត្រូវតែប្រព្រឹត្ត ដោយ “ចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់” (កូល៉ុស ៣:១២)។ ព្រះទ្រង់បានជំរុញយើងឲ្យ “ទ្រាំទ្រគ្នា ទាំងអត់ទោសទៅវិញទៅមក”(ខ.១៣) ជាជាងរិះគន់ ដោយគ្មានសីលធម៌ សូម្បីតែចំពោះខ្មាំងសត្រូវរបស់យើងក៏ដោយ។
យើងប្រព្រឹត្តល្អយ៉ាងដូចនេះ គឺមិនគ្រាន់តែចំពោះអ្នកដែលមានការរស់នៅ និងជំនឿ ដែលយើងមិនចូលចិត្តប៉ុណ្ណោះទេ។ សូម្បីតែនៅពេលដែលពិបាកខ្លាំង ចូរយើងបង្ហាញព្រះគុណព្រះ និងក្តីស្រឡាញ់ ដល់នរណាម្នាក់ដែលយើងជួប តាមការដឹកនាំរបស់ព្រះគ្រីស្ទ ដោយទទួលស្គាល់ថា ព្រះអង្គបានប្រោសលោះយើង ដោយក្តីស្រឡាញ់របស់ព្រះអង្គ។—Kimya Loder
សូមគិតអំពីពេលដែលអ្នកប្រញាប់រិះគន់មិត្តភក្តិ ឬមនុស្សដែលអ្នកមិនស្គាល់។ តើអ្នកបានទទួលលទ្ធផលដូចម្តេច? តើអ្នកអាចធ្វើអ្វីផ្សេងពីនោះ ដើម្បីថ្វាយព្រះកិត្តិនាមដល់ព្រះ និងគោរពអ្នកនោះទេ?
ឱព្រះវរបិតា ទូលបង្គំដឹងថា ទូលបង្គំខ្វះមិនដល់សិរីល្អរបស់ព្រះអង្គ ជារៀងរាល់ថ្ងៃ។ ទូលបង្គំសូមអរព្រះគុណសម្រាប់សេចក្តីស្រឡាញ់ដោយគ្មានលក្ខខ័ណ្ឌរបស់ព្រះអង្គ។ សូមព្រះអង្គជួយទូលបង្គំឲ្យមានលក្ខណៈដូចព្រះអង្គ ដោយមានចិត្តអត់ធ្មត់ និងសុភាពចំពោះអ្នកដទៃ។
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ១៦-១៧ និង ម៉ាថាយ ៥:២៧-៤៨
