ព្រះទ្រង់បានលើកព្រះយេស៊ូវនេះដែលអ្នករាល់គ្នាបានឆ្កាង ឲ្យទ្រង់ធ្វើជាព្រះអម្ចាស់ ហើយជាព្រះគ្រីស្ទផង។ កិច្ចការ ២:៣៦
ខ្សែភាពយន្តរឿង ទុក្ខវេទនា បានចាប់ផ្តើម ដោយមានអ្នកទោសម្នាក់ឈ្មោះ ហ្សង់ វ៉ាលហ្សង់(Jean Valjean) បានជាប់ចោទពីបទលួចប្រាក់របស់ពួកសង្ឃកាតូលិកម្នាក់។ គាត់ត្រូវគេចាប់ខ្លួនបាន ហើយរំពឹងថា នឹងត្រូវគេបញ្ជូនឲ្យទៅធ្វើការនៅក្នុងអណ្តូងរ៉ែវិញ។ ប៉ុន្តែ សង្ឃនោះបានធ្វើឲ្យគេរាល់គ្នាមានការភ្ញាក់ផ្អើល ដោយគាត់បានអះអាងថា គាត់បានឲ្យប្រាក់នោះទៅលោកវ៉ាលហ្សង់ទេ។ បន្ទាប់ពីប៉ូលិសចាកចេញទៅវិញ គាត់ក៏បានងាកមករកចោរនោះ ដោយណែនាំថា “ឯងមិនមែនជាកម្មសិទ្ធិផ្តាច់មុខរបស់សេចក្តីអាក្រក់ទៀតឡើយ តែត្រូវធ្វើជាកម្មសិទ្ធិរបស់សេចក្តីល្អវិញ”។
សេចក្តីស្រឡាញ់ដ៏លើសលប់នេះ បានចង្អុលបង្ហាញយើង ឲ្យងាកទៅរកសេចក្តីស្រឡាញ់ ដែលបានបង្ហូរចេញពីប្រភព ដែលជាទីបញ្ចេញព្រះគុណគ្រប់យ៉ាង។ នៅថ្ងៃបុណ្យទី៥០ លោកពេត្រុសបានចែកចាយថា ជិតពីរខែមុន ពួកគេបានឆ្កាងព្រះយេស៊ូវ ក្នុងទីក្រុងនេះ។ ហ្វូងមនុស្សមានការចុកចាប់ក្នុងចិត្ត ហើយក៏បានសួរគាត់ថា តើពួកគេត្រូវធ្វើដូចម្តេច។ លោកពេត្រុសក៏បានឆ្លើយថា “ចូរអ្នករាល់គ្នាប្រែចិត្តចុះ ហើយទទួលបុណ្យជ្រមុជទឹកទាំងអស់គ្នា ដោយនូវព្រះនាមព្រះយេស៊ូវគ្រីស្ទ ប្រយោជន៍ឲ្យបានរួចពីបាប នោះអ្នករាល់គ្នានឹងទទួលអំណោយទាន ជាព្រះវិញ្ញាណបរិសុទ្ធ”(កិច្ចការ ២:៣៨)។ ព្រះយេស៊ូវបានស៊ូទ្រាំទារុណកម្ម ដែលពួកគេសក្តិសមនឹងទទួល។ តែពេលនេះ ទោសរបស់ពួកគេនឹងត្រូវអត់ទោសឲ្យ បើសិនជាពួកគេទទួលជឿព្រះអង្គ។
ព្រះគុណរបស់ព្រះធ្វើការតាមរបៀបដែលមនុស្សមិននឹកស្មានដល់។ មនុស្សអាចទទួលការអត់ទោសបាប ដោយសារតែការសុគតរបស់ព្រះគ្រីស្ទប៉ុណ្ណោះ គឺការសុគត ដែលពួកគេត្រូវទទួលខុសត្រូវ។ ព្រះទ្រង់ប្រកបដោយព្រះគុណ និងមានអំណាចចេស្តា! ព្រះអង្គបានប្រើអំពើបាបធំបំផុតរបស់មនុស្ស ដើម្បីសម្រេចបាននូវការសង្រ្គោះសម្រាប់យើង។ បើសិនជាព្រះទ្រង់បានសម្រេចការនេះ ដោយការសុគតរបស់ព្រះយេស៊ូវនៅលើឈើឆ្កាង នោះយើងអាចសន្និដ្ឋានថា គ្មានការអ្វីដែលព្រះអង្គមិនអាចកែប្រែឲ្យក្លាយជាការល្អនោះឡើយ។ ចូរយើងទុកចិត្តលើព្រះមួយអង្គដែល “គ្រប់ការទាំងអស់ផ្សំគ្នា សំរាប់សេចក្តីល្អដល់ពួកអ្នកដែលស្រឡាញ់ព្រះ គឺដល់ពួកអ្នកដែលទ្រង់ហៅមក តាមព្រះដំរិះទ្រង់”(រ៉ូម ៨:២៨)។—Mike Wittmer
តើអ្នកបានថ្វាយខ្លួនទាំងស្រុងដល់ព្រះយេស៊ូវហើយឬនៅ? បើមិនទាន់បានថ្វាយទេ តើមានអ្វីរារាំងអ្នក? បើបានថ្វាយហើយ តើការថ្វាយទាំងការភ័យខ្លាចរបស់អ្នកដល់ព្រះអង្គ មានន័យយ៉ាងណាចំពោះអ្នក?
ឱព្រះវរបិតា ទូលបង្គំសូមអរព្រះគុណ សម្រាប់សេចក្តីស្រឡាញ់ដ៏ហូរហៀរ ដែលបានរំដោះទូលបង្គំឲ្យរួចពីបាប។ សូមព្រះអង្គដកយកការភ័យខ្លាច ហើយជួយទូលបង្គំឲ្យទុកចិត្តព្រះអង្គ។
Learn more about having a personal relationship with God at ODB.org/personal-relationship.
គម្រោងអានព្រះគម្ពីររយៈពេល១ឆ្នាំ : និក្ខមនំ ៧-៨ និង ម៉ាថាយ ១៥:១-២០
