ភាពអស្ចារ្យនៃស្នាព្រះហស្តព្រះអង្គ
ដោយKirsten Holmberg
February 4, 2022
ចូរឲ្យដីដុះតិណជាតិឡើង គឺជាពួកស្មៅដែលមានគ្រាប់ និងរុក្ខជាតិមានផ្លែតាមពូជ ដែលមានគ្រាប់ក្នុងផ្លែនោះនៅផែនដី។ លោកុប្បត្តិ ១:១១ ខណៈពេលដែលលោកធីម(Tim) កំពុងធ្វើដំណើរកម្សាន្តកាត់តាមផែនទឹកកកនៅលើភ្នំរូទ ក្លេស័រ នៅរដ្ឋអាឡាស្កា គាត់បានប្រទះឃើញអ្វីម្យ៉ាង ដែលគាត់មិនដែលបានឃើញពីមុនមក។ ទោះលោកធីមបានធ្វើការសិក្សាផែនទឹកកកនៅលើភ្នំ ជាលក្ខណៈអាជីព គាត់បានប្រទះឃើញដុំស្លែមូលៗតូចៗ ដ៏ច្រើនសន្ធឹក ដែលគាត់មិនដែលស្គាល់ទាល់តែសោះ។ បន្ទាប់ពីគាត់បានតាមដានរុក្ខជាតិនេះ ដែលមានរាងមូលពណ៌បៃតងភ្លឺ អស់ជាច្រើនឆ្នាំ គាត់និងមិត្តរួមការងាររបស់គាត់ ក៏បានរកឃើញថា ខុសពីស្លែនៅលើដើមឈើ ដុំស្លែ ដែលមានរហ័សនាមថា “សត្វកណ្តុរនៅផ្ទាំងទឹកកក” មិនតោងនៅលើដើមឈើ ហើយដែលកាន់តែគួរឲ្យភ្ញាក់ផ្អើលថែមទៀតនោះ គឺពួកវាធ្វើការផ្លាស់ទី ដូចហ្វូងសត្វ។ ពីដំបូង លោកធីម និងមិត្តរួមការងាររបស់គាត់សង្ស័យថា ពួកវាផ្លាស់ទីដោយសារមានខ្យល់បក់ ឬពួកវារមៀលចុះពីលើទួលមក ប៉ុន្តែ ការស្រាវជ្រាវរបស់ពួកគេបានបង្ហាញថា ទាំងនេះសុទ្ធតែជាការស្មានខុស។ ពួកគេនៅមិនទាន់ដឹងច្បាស់ថា ដុំស្លែទាំងនោះបានផ្លាស់ទីដោយរបៀបណាទេ។ ភាពអាថ៌កំបាំងដូចនេះ បានធ្វើឲ្យយើងនឹកចាំ អំពីភាពប៉ិនប្រសប់របស់ព្រះ។ ក្នុងពេលដែលព្រះអង្គបង្កើតរបស់សព្វសារពើ ព្រះអង្គបានបង្គាប់ឲ្យដី ដុះតិណជាតិ និងដើមឈើ (លោកុប្បតិ្ត ១:១១)។ ព្រះអង្គក៏បានរចនាឲ្យមានដុំស្លែទាំងនោះផងដែរ ទោះមនុស្សភាគច្រើននឹងមិនដែលបានឃើញពួកវាដោយផ្ទាល់ ទាល់តែយើងបានទៅដល់តំបន់ផែនទឹកកក ដែលមានលក្ខខ័ណ្ឌប្រកបគ្រប់គ្រាន់ឲ្យពួកវាលូតលាស់។ ដុំស្លែទាំងនោះបានទាក់ទាញអ្នកវិទ្យាសាស្រ្តជាច្រើន ដោយសាររូបរាងមូលស្រមូវៗរបស់ពួកវា ចាប់តាំងពីពេលដែលគេបានរកឃើញពួកវា ក្នុងទសវត្សរ៍ឆ្នាំ១៩៥០។ បន្ទាប់ពីព្រះអង្គបានបង្កើតរុក្ខជាតិទាំងអស់ហើយ ព្រះអង្គបានទតឃើញថាល្អ(ខ.១២)។ ព្រះទ្រង់បានរចនាឲ្យមានរុក្ខជាតិដ៏ស្រស់ស្អាត នៅជុំវិញខ្លួនយើង ដែលសុទ្ធតែបានបង្ហាញអំណាចចេស្តាដ៏ប៉ិនប្រសប់របស់ព្រះអង្គ ហើយកំពុងអញ្ជើញយើង ឲ្យថ្វាយបង្គំព្រះអង្គ។ យើងអាចអរសប្បាយ ចំពោះដើមឈើ និងតិណជាតិនីមួយៗ ដែលព្រះអង្គបានបង្កើត ដ្បិតពួកវាសុទ្ធតែល្អ!—Kirsten Holmberg តើស្នាព្រះហស្តណាខ្លះរបស់ព្រះ ដែលបាននាំឲ្យអ្នកមានក្តីអំណរ? តើផ្នែកណាមួយនៃការបង្កើតរបស់ព្រះអង្គ ដែលបានបណ្តាលចិត្តអ្នកឲ្យថ្វាយបង្គំព្រះអង្គ? ឱព្រះអម្ចាស់ ទូលបង្គំសូមអរព្រះគុណ សម្រាប់ភាពអស្ចារ្យនៃស្នាព្រះហស្តព្រះអង្គ និងឯកសិទ្ធិក្នុងការរៀនសូត្រអំពីព្រះអង្គ តាមរយៈស្នាព្រះហស្តព្រះអង្គ។ គម្រោងអានព្រះគម្ពីររយៈពេល១ឆ្នាំ: និក្ខមនំ ៣៤-៣៥ និង ម៉ាថាយ ២២:២៣-៤៦