ដើម្បីឲ្យយើងបានគេងលក់ស្រួល
ដោយCindy Hesskasper
February 6, 2022
កាលណាឯងដេកទៅ នោះនឹងគ្មានភ័យខ្លាចអ្វីសោះ អើ ឯងនឹងដេកទៅ ហើយលក់ស្រួល។ សុភាសិត ៣:២៤ ពេលដែលមិត្តភក្តិរបស់ខ្ញុំឈ្មោះ ផ្លូស(Floss) គេងមិនលក់នៅពេលយប់ គាត់ក៏បានគិតអំពីពាក្យពេចន៍ ក្នុងបទចម្រៀងទំនុកសកល មានចំណងជើងថា “ព្រះយេស៊ូវ ទូលបង្គំស្រឡាញ់ព្រះអង្គ”។ គាត់ក៏បានហៅបទចម្រៀងនេះថា បទចម្រៀង “ពេលពាក់កណ្តាលអាធ្រាត្រ” ព្រោះបទនេះបានជួយឲ្យគាត់នឹកចាំ អំពីព្រះបន្ទូលសន្យារបស់ព្រះអង្គ និងមូលហេតុជាច្រើន ដែលគាត់ស្រឡាញ់ព្រះអង្គ។ ការគេងជាផ្នែកដ៏ចាំបាច់នៃជីវិត តែជួនកាល យើងមានការពិបាកក្នុងការគេង។ នៅពេលខ្លះ យើងអាចស្តាប់ឮព្រះសូរសៀងរបស់ព្រះវិញ្ញាណបរិសុទ្ធ ប្រាប់យើងអំពីអំពើបាបដែលមិនទាន់បានលន់តួ។ ពុំនោះទេ យើងចាប់ផ្តើមមានការព្រួយបារម្ភ អំពីការងារ ទំនាក់ទំនង បញ្ហាហិរញ្ញវត្ថុ សុខភាព ឬកូនៗរបស់យើងជាដើម។ មិនយូរប៉ុន្មាន ខួរក្បាលរបស់យើងមានពេញដោយការព្រួយបារម្ភ អំពីពេលអនាគតដ៏លំបាកលំបិន។ យើងគិតស្មានថា បន្តិចទៀតយើងគេងលក់ហើយ តែពេលយើងមើលទៅនាឡិកា យើងក៏បានដឹងថា ជាច្រើនម៉ោងហើយ យើងនៅមិនទាន់គេងលក់ទៀត។ ក្នុងបទគម្ពីរសុភាសិត ៣:១៩-២៤ ស្តេចសាឡូម៉ូនបានលើកឡើងថា យើងអាចទទួលផលប្រយោជន៍ពីការគេង ពេលដែលយើងឱបក្រសោបយកប្រាជ្ញា ការយល់ដឹង និងចំណេះដឹងមកពីព្រះ។ តាមពិត ទ្រង់បានប្រកាសថា “សេចក្តីនោះនឹងបានជាជីវិតដល់ព្រលឹងឯង …កាលណាឯងដេកទៅ នោះនឹងគ្មានភ័យខ្លាចអ្វីសោះ អើ ឯងនឹងដេកទៅ ហើយលក់ស្រួល”(ខ.២២,២៤)។ យើងប្រហែលជាត្រូវការបទចម្រៀងទំនុកដំកើង “នៅពាក់កណ្តាលអធ្រាត្រ” ការអធិស្ឋាន ឬខគម្ពីរ ដែលបន្លឺសម្លេងខ្សឹបយ៉ាងស្រទន់ ដើម្បីជួយឲ្យយើង បង្វែរគំនិតដ៏រញ៉េរញ៉ៃ ទៅជាគំនិតដែលផ្តោតទាំងស្រុងទៅលើព្រះ និងចារិកលក្ខណៈរបស់ព្រះអង្គ។ បញ្ញាចិត្តដែលជ្រះស្អាត និងចិត្តដែលពេញដោយការដឹងគុណ សម្រាប់ភាពស្មោះត្រង់ និងសេចក្តីស្រឡាញ់របស់ព្រះ អាចនាំមកនូវការគេងលក់ស្រួល។—Cindy Hess Kasper តើការងាកទៅរកព្រះ ពេលដែលអ្នកមិនអាចគេងលក់ បាននាំឲ្យអ្នកមានសន្តិភាពក្នុងចិត្តយ៉ាងណាខ្លះ? តើមានបទចម្រៀង ការ អធិស្ឋាន ឬខគម្ពីរណា ដែលអ្នកអាចជញ្ជឹងគិត ដើម្បីឲ្យអ្នកផ្តោតចិត្តទៅលើព្រះអង្គ? ឱព្រះអម្ចាស់ ទូលបង្គំសូមអរព្រះគុណសម្រាប់ការស្រឡាញ់ទូលបង្គំ។ សូមព្រះអង្គជួយទូលបង្គំឲ្យផ្តោតទៅលើសេចក្តីស្មោះត្រង់របស់ព្រះអង្គ ជាជាងព្រួយបារម្ភអំពីជីវិតនេះ។ គម្រោងអានព្រះគម្ពីររយៈពេល១ឆ្នាំ: និក្ខមនំ ៣៩-៤០ និង ម៉ាថាយ ២៣:២៣-៣៩