មិនដែលភ្លេចកិច្ចការដែលយើងបានធ្វើ
ដោយBill Crowder
February 13, 2022
ដ្បិតព្រះទ្រង់មិនមែនជាអ្នករមឹលគុណ ដែលទ្រង់នឹងភ្លេចការអ្នករាល់គ្នាធ្វើ និងសេចក្តីស្រឡាញ់ ដែលអ្នករាល់គ្នាបានសំដែងដល់ព្រះនាមទ្រង់ ដោយបានបំរើពួកបរិសុទ្ធ ហើយក៏នៅតែបំរើទៀតនោះទេ។ ហេព្រើរ ៦:១០ ពេលដែលយើងគិត អំពីបេសកជន ដែលជាអ្នកត្រួសត្រាយផ្លូវ ក្នុងប្រវត្តិសាស្រ្ត យើងប្រហែលមិនបានឮឈ្មោះ លោក ចច លេលី(George Liele ឆ្នាំ១៧៥០ ដល់ ១៨២០)នោះទេ។ តែយើងគួរតែស្គាល់គាត់។ គាត់បានចាប់កំណើតក្នុងគ្រួសារទាសករ។ គាត់បានទទួលជឿព្រះយេស៊ូវ នៅរដ្ឋចចជា ហើយក៏បានទទួលសិទ្ធិសេរីភាព មុនពេលសង្រ្គាមឯករាជ្យអាមេរិក។ គាត់បាននាំព្រះរាជសាររបស់ព្រះយេស៊ូវ ទៅប្រទេសចាម៉ៃកា ដោយឈោងចាប់ពួកទាសករ នៅក្នុងតំបន់ចំការ ហើយក៏បានបម្រើការជាគ្រូគង្វាល និងស្ថាបនិក នៃព្រះវិហាររបស់ជនជាតិអាមេរិក ដើមកំណើតអាហ្វ្រិក ក្នុងទីក្រុងសាវ៉ាណា រដ្ឋចចជា ដែលគេបានចាត់ទុកជា “ព្រះវិហារដំបូងនៃព្រះវិហារបាទីស្ទរបស់ជនជាតិស្បែកខ្មៅ”។ អ្នកខ្លះប្រហែលមិនបាននឹកចាំ អំពីជីវិតនៃការងារបម្រើនគរព្រះដ៏គួរឲ្យកត់សំគាល់ របស់លោកលេលីឡើយ តែព្រះទ្រង់នឹងមិនដែលភ្លេចការបម្រើខាងវិញ្ញាណរបស់គាត់ឡើយ។ ព្រះអង្គក៏មិនភ្លេចកិច្ចការដែលអ្នកធ្វើថ្វាយព្រះអង្គដែរ។ កណ្ឌគម្ពីរសំបុត្រហេព្រើរបានលើកទឹកចិត្តយើង យ៉ាងដូចនេះថា “ដ្បិតព្រះទ្រង់មិនមែនជាអ្នករមឹលគុណ ដែលទ្រង់នឹងភ្លេចការអ្នករាល់គ្នាធ្វើ និងសេចក្តីស្រឡាញ់ ដែលអ្នករាល់គ្នាបានសំដែងដល់ព្រះនាមទ្រង់ ដោយបានបំរើពួកបរិសុទ្ធ ហើយក៏នៅតែបំរើទៀតនោះទេ”(៦:១០)។ មនុស្សមិនអាចមើលស្រាលភាពស្មោះត្រង់របស់ព្រះអង្គបានឡើយ ព្រោះព្រះអង្គពិតជាជ្រាប និងនឹកចាំអ្វីៗដែលព្រះអង្គបានធ្វើ ក្នុងព្រះនាមព្រះអង្គ។ ហើយបទគម្ពីរហេព្រើរបានលើកទឹកចិត្តយើង “ឲ្យត្រាប់តាមពួកអ្នក ដែលគ្រងបានសេចក្តីសន្យាទុកជាមរដក ដោយចិត្តជឿ ហើយអត់ធន់វិញ”(ខ.១២)។ បើយើងបម្រើព្រះ ក្នុងលក្ខណៈមិនចេញមុខ ក្នុងព្រះវិហារ ឬសហគមន៍របស់យើង នោះយើងងាយនឹងមានអារម្មណ៍ថា គេមិនឲ្យតម្លៃកិច្ចការដែលយើងធ្វើ។ ចូរសង្ឃឹមឡើង។ ទោះកិច្ចការយើងត្រូវគេទទួលស្គាល់ ឬឲ្យរង្វាន់ឬអត់ក៏ដោយ ព្រះអង្គនៅតែស្មោះត្រង់។ ព្រះអង្គនឹងមិនដែលភ្លេចយើងឡើយ។—Bill Crowder តើមានការបម្រើអ្វីខ្លះ ដែលអ្នកធ្វើថ្វាយព្រះ? តើអ្នកមានការលើកទឹកចិត្តយ៉ាងណា ពេលដែលបានដឹងថា ព្រះទ្រង់មិនដែលភ្លេចការបម្រើរបស់អ្នក សូម្បីតែនៅពេលគេហាក់ដូចជាមិនអើពើ? ឱព្រះនៃក្តីស្រឡាញ់ ការបម្រើដែលទូលបង្គំមានចំពោះព្រះអង្គ មិនល្អឥតខ្ចោះឡើយ តែទូលបង្គំក៏បានដឹងថា កាលណាទូលបង្គំបម្រើព្រះអង្គ នោះព្រះអង្គក៏នឹកចាំ និងឲ្យតម្លៃមកលើការបម្រើរបស់ទូលបង្គំ។ ទូលបង្គំសូមអរព្រះគុណសម្រាប់ការប្រទានលទ្ធភាពឲ្យទូលបង្គំបម្រើព្រះអង្គ។ To learn more about serving others, listen to DiscovertheWord.org/series/open-hands-willing-heart/. គម្រោងអានព្រះគម្ពីររយៈពេល១ឆ្នាំ: លេវីវិន័យ ១៤ និង ម៉ាថាយ ២៦:៥១-៧៥