ក្នុងព្រះហស្តដែលមានសុវត្ថិភាព
ដោយArthur Jackson
March 5, 2022
ទ្រង់ជាទីពំនួននៃទូលបង្គំ ទ្រង់នឹងការពារទូលបង្គំ ឲ្យរួចពីសេចក្តីទុក្ខលំបាក។ ទំនុកដំកើង ៣២:៧ ជីវិតរបស់លោកដាក មើឃី(Doug Merkey) បានដាច់ម្តងបន្តិចៗ ប្រៀបដូចជាខ្សែពួរដែលដាច់ម្តងមួយធ្លុងៗ។ លោកគ្រូគង្វាល និងជាងចម្លាក់រូបនេះក៏បានសរសេរថា “ម្តាយរបស់ខ្ញុំបានចាញ់ការតយុទ្ធនឹងជំងឺមហារីក ដែលអស់ពេលជាយូរ ទំនាក់ទំនងស្នេហា ដែលខ្ញុំមានជាច្រើនឆ្នាំកំពុងតែជួបការបែកបាក់ ហិរញ្ញវត្ថុរបស់ខ្ញុំក៏បានថយចុះ ការងាររបស់ខ្ញុំមានពេញដោយភាពមិនច្បាស់លាស់…ភាពងងឹតផ្លូវអារម្មណ៍ និងខាងវិញ្ញាណនៅជុំវិញខ្លួន និងនៅក្នុងខ្ញុំ ក៏មានជម្រៅជ្រៅ ហើយហាក់ដូចជាមិនអាចគេចចេញរួច”។ បញ្ហាចម្រុះទាំងនេះ គួបផ្សំនឹងការរស់នៅក្នុងបន្ទប់ក្នុងដំបូលផ្ទះដ៏ចង្អៀត គឺជាកត្តាដែលនាំឲ្យគាត់ឆ្លាក់រូបចម្លាក់ដ៏ល្បីល្បាញមួយ ដែលមានចំណងជើងថា កន្លែងជ្រកកោន ។ រូបចម្លាក់នោះបានពិពណ៌នា អំពីព្រះហស្តរបស់ព្រះយេស៊ូវ ដែលមានស្នាមរបួសដែលដែកគោលបានចាក់ទម្លុះ បានផ្គុំផ្ងារទៅលើបង្កើតបានជាកន្លែងជ្រកកោនដែលមានសុវត្ថិភាព។ លោកដាកក៏បានពន្យល់ អំពីការរចនាស្នាដៃសិល្បៈរបស់ខ្លួន យ៉ាងដូចនេះថា “រូបចម្លាក់នោះ គឺបានពិពណ៌នា អំពីការត្រាស់ហៅរបស់ព្រះគ្រីស្ទ ឲ្យយើងចូលជ្រកកោនក្នុងព្រះអង្គ”។ ក្នុងបទគម្ពីរទំនុកដំកើង ជំពូក៣២ ស្តេចដាវីឌបានរៀបរាប់ អំពីការដែលទ្រង់បានរកឃើញកន្លែងដែលមានសុវត្ថិភាពបំផុត គឺនៅក្នុងព្រះអម្ចាស់។ ព្រះអង្គប្រទានការអត់ទោសបាបមកយើង(ខ.១-៥) ហើយបានលើកទឹកចិត្តយើង ឲ្យអធិស្ឋាន ក្នុងពេលដ៏វឹកវរ(ខ.៦)។ ក្នុងខ.៧ អ្នកនិពន្ធបទគម្ពីរទំនុកដំកើងរូបនេះ ក៏បានប្រកាស អំពីជំនឿរបស់ខ្លួនថា “ទ្រង់ជាទីពំនួននៃទូលបង្គំ ទ្រង់នឹងការពារទូលបង្គំ ឲ្យរួចពីសេចក្តីទុក្ខលំបាក ទ្រង់នឹងព័ទ្ធទូលបង្គំជុំវិញ ដោយទំនុកនៃសេចក្តីសង្គ្រោះ”។ ពេលដែលយើងមានបញ្ហា តើយើងងាកទៅរកនរណា? យើងអាចដឹងថា ពេលណាខ្សែពួរដ៏ផុយស្រួយនៃជីវិតរបស់យើងនៅផែនដីចាប់ផ្តើមដាច់ម្តងមួយធ្លុងៗ យើងអាចរត់ទៅរកព្រះ ដែលបានប្រទានកន្លែងមានសុវត្ថិភាពអស់កល្បជានិច្ច តាមរយៈព្រះរាជកិច្ចដែលព្រះយេស៊ូវបានធ្វើ ដើម្បីអត់ទោសបាបឲ្យយើង។—Arthur Jackson តើការស្វែងរកជម្រក សុវត្ថិភាព និងការអត់ទោសបាប ក្នុងព្រះយេស៊ូវ មានន័យយ៉ាងណាសម្រាប់អ្នក? តើព្រះអង្គជួយអ្នកយ៉ាងណាខ្លះ ពេលដែលអ្នកមានទុក្ខព្រួយ ការភ័យខ្លាច និងបន្ទុក? ឱព្រះវរបិតា ព្រះអង្គជ្រាប អំពីពេលដែលទូលបង្គំបានព្យាយាមផ្គុំជីវិតខ្លួនឯងចូលគ្នា ដោយមិនបានពឹងផ្អែកព្រះអង្គ។ សូមព្រះអង្គជួយទូលបង្គំ ឲ្យបោះបង់ចោលផែនការរបស់ទូលបង្គំ ហើយប្រញាប់រត់ទៅរកព្រះអង្គវិញ។ គម្រោងអានព្រះគម្ពីររយៈពេល១ឆ្នាំ : ជនគណនា ៣៤-៣៦ និង ម៉ាកុស ៩:៣០-៥០