ការបើកបង្ហាញ និងការធានាជាថ្មី
ដោយJohn Blase
March 10, 2022
កុំឲ្យខ្វល់ខ្វាយអ្វីឡើយ ចូរទូលដល់ព្រះ ឲ្យជ្រាបពីសេចក្តីសំណូមរបស់អ្នករាល់គ្នាក្នុងគ្រប់ការទាំងអស់ ដោយសេចក្តីអធិស្ឋាន និងពាក្យទូលអង្វរ ទាំងពោលពាក្យអរព្រះគុណផង។ ភីលីព ៤:៦ កាលពីឆ្នាំ២០១៩ មនុស្សជាច្រើនបានប្រើវីធីប្លែកៗ ដើម្បីប្រកាសថា កូនរបស់ខ្លួនដែលទើបចាប់កំណើត ជាកូនប្រុស ឬកូនស្រី។ នៅខែកក្កដា មានវីដេអូមួយបានបង្ហាញរថយន្តមួយគ្រឿង កំពុងបញ្ចេញផ្សែងពណ៌ខៀវ ដើម្បីប្រាប់គេថា កូនដែលទើបចាប់កំណើតជាកូនប្រុស។ នៅខែកញ្ញា មានយន្តហោះស្រោចជីមួយគ្រឿង នៅរដ្ឋតិចសាស់ បានស្រោចទឹកពណ៌ផ្កាឈូក រាប់រយលីត្រ ដើម្បីប្រកាសឲ្យគេដឹងថា កូនដែលទើបចាប់កំណើតជាកូនស្រី។ តែទន្ទឹមនឹងនោះ អ្នកផ្សេងទៀតក៏បានធ្វើ “ការបើកបង្ហាញ” មួយទៀត អំពីរឿងសំខាន់ៗ ដែលកំពុងកើតឡើង ក្នុងពិភពលោកដែលក្មេងៗទាំងនោះកំពុងតែចម្រើនវ័យធំឡើង។ នៅចុងឆ្នាំ២០១៩ វិបសាយ YouVersion បានបើកបង្ហាញថា ខគម្ពីរដែលគេបានគូសចំណាំច្រើនជាងគេ ក្នុងវិបសាយ និង app ព្រះគម្ពីររបស់ YouVersion គឺបទគម្ពីរ ភីលីព ៤:៦ ដែលបានចែងថា “កុំឲ្យខ្វល់ខ្វាយអ្វីឡើយ ចូរទូលដល់ព្រះ ឲ្យជ្រាបពីសេចក្តីសំណូមរបស់អ្នករាល់គ្នាក្នុងគ្រប់ការទាំងអស់ ដោយសេចក្តីអធិស្ឋាន និងពាក្យទូលអង្វរ ទាំងពោលពាក្យអរព្រះគុណផង”។ នេះជាការបើកបង្ហាញដ៏សំខាន់។ សព្វថ្ងៃនេះ មនុស្សកំពុងតែថប់បារម្ភ អំពីរឿងជាច្រើន ដែលរាប់ចាប់តាំងពីការព្រួយបារម្ភ អំពីតម្រូវការរបស់កូនៗ រហូតដល់ការព្រួយបារម្ភ អំពីការបែកបាក់គ្រួសារ ឬមិត្តភក្តិ ឬរហូតដល់ការព្រួយបារម្ភអំពីគ្រោះធម្មជាតិ និងសង្រ្គាម។ ប៉ុន្តែ ក្នុងពេលដែលមានការព្រួយបារម្ភទាំងនេះ មនុស្សជាច្រើនបាននឹកចាំខគម្ពីរដែលចែងថា “កុំឲ្យខ្វល់ខ្វាយអ្វីឡើយ”។ ជាងនេះទៅទៀត ពួកគេក៏បានលើកទឹកចិត្តអ្នកដទៃ ក៏ដូចជាខ្លួនឯង ឲ្យទូលថ្វាយដល់ព្រះ “គ្រប់កាលៈទេសៈ”។ ផ្នត់គំនិតដែលដឹងគុណព្រះ មិនព្រងើយកន្តើយចំពោះការថប់បារម្ភ តែប្រឈមមុខដាក់ការថប់បារម្ភ។ នៅបន្ទាប់ខដ៏ពេញនិយមនេះ គឺមានខ ដែលចែងថា “យ៉ាងនោះ សេចក្តីសុខសាន្តរបស់ព្រះ ដែលហួសលើសពីអស់ទាំងគំនិត និងជួយការពារចិត្ត ហើយនិងគំនិតរបស់អ្នករាល់គ្នា ក្នុងព្រះគ្រីស្ទយេស៊ូវ”(ខ.៧)។ នេះជាការធានាដ៏ប្រសើរ!—John Blasé តើមានបញ្ហាអ្វីខ្លះ ដែលអ្នកកំពុងតែថប់បារម្ភ? តើការនឹកចាំអំពីពេលដែលព្រះទ្រង់ធ្លាប់នាំអ្នកឆ្លងកាត់រឿងពិបាកៗ បានលើកទឹកចិត្តអ្នកយ៉ាងណាខ្លះ ឲ្យឈប់មានការថប់បារម្ភ? ឱព្រះយេស៊ូវ នៅថ្ងៃខ្លះ ទូលបង្គំមានអារម្មណ៍ថា ពិបាកខ្លាំង។ ទូលបង្គំសូមអរព្រះគុណសម្រាប់សន្តិភាពរបស់ព្រះអង្គ ដែលបានការពារចិត្តគំនិតទូលបង្គំ នៅថ្ងៃម្សិលមិញ ថ្ងៃនេះ និងជារៀងរហូត។ គម្រោងអានព្រះគម្ពីររយៈពេល១ឆ្នាំ : ចោទិយកថា ១១-១៣ និង ម៉ាកុស ១២:១-២៧