ចូរអត់ទោសឲ្យគេចុះ ដូចជាព្រះគ្រីស្ទបានអត់ទោសឲ្យអ្នករាល់គ្នាដែរ។ កូល៉ុស ៣:១៣
គេបានទទួលស្គាល់លោកអូលីវ័រ ក្រមវែល(Oliver Cromwell) ថាជា “អ្នកការពារចក្រភពអង់គ្លេស”។ គាត់ជាមេបញ្ជាការកងទ័ព នៅសតវត្សរ៍ទី១៧។ នៅសម័យនោះ វាជារឿងធម្មតាទេ ដែលបុគ្គលមានមុខនាទីសំខាន់ បានឲ្យគេគូរូបឲ្យខ្លួន។ ហើយវាក៏មិនមែនជារឿងចម្លែកដែរ ដែលវិចិត្រករបានព្យាយាមគូរតែចំណុចដែលទាក់ទាញនៅលើមុខរបស់បុគ្គលនោះ។ ទោះជាយ៉ាងណាក៏ដោយ លោកក្រមវែល មិនចង់ឲ្យគេគូររូបគាត់ជាលក្ខណៈបញ្ជោរនោះទេ។ គាត់ក៏បានណែនាំវិចិត្រករថា “អ្នកត្រូវតែគូរូប ឲ្យដូចលក្ខណៈពិតរបស់ខ្ញុំ គឺគូរទាំងប្រជ្រុយ និងស្លាកស្នាមទាំងអស់ ពុំនោះទេ ខ្ញុំនឹងមិនបង់លុយឲ្យអ្នកឡើយ”។
គេជឿថា វិចិត្រករនោះក៏បានធ្វើតាមការណែនាំរបស់គាត់។ រូបគំនូររបស់លោកក្រមវែលដែលគេបានគូរហើយ បានបង្ហាញឲ្យគេឃើញប្រជ្រុយមួយចំនួន គឺខុសពីមនុស្សជាច្រើននៅសម័យសព្វថ្ងៃ ដែលចូលចិត្តកែរូបខ្លួនឯងឲ្យស្អាត មិនឲ្យឃើញស្នាមជ្រួញ ឬប្រជ្រុយ មុននឹងបង្ហោះរូបនោះ នៅតាមបណ្តាញសង្គម។
មនុស្សគួរតែទទួលគ្នាទៅវិញទៅមក ទោះពួកគេមានកំហុស អាកប្បកិរិយា ឬបញ្ហាដែលគួរឲ្យរំខានក៏ដោយ។ ក្នុងករណីខ្លះ យើងយល់ឃើញថា រឿងនេះពិតជាពិបាកធ្វើណាស់។ តែពេលណាយើងខំពិនិត្យមើលខាងក្នុងខ្លួនយើងឲ្យច្បាស់ យើងនឹងរកឃើញចារិកលក្ខណៈមួយចំនួន ដែលមិនគួរឲ្យចូលចិត្ត។
យើងអរព្រះគុណព្រះ ដែលមិនបានប្រកាន់ចំណុចខ្វះខាតរបស់យើង។ ហើយបទគម្ពីរ កូល៉ុស ជំពូក៣ បានបង្រៀនយើងឲ្យចេះអត់ទោសឲ្យអ្នកដទៃ។ សាវ័កប៉ុលបានលើកទឹកចិត្តយើងឲ្យមានចិត្តអត់ធ្មត់ សប្បុរស និងមានក្តីអាណិតដល់អ្នកដទៃ គឺសូម្បីតែអ្នកដែលយើងពិបាកស្រឡាញ់។ គាត់បានជំរុញយើងឲ្យមានវិញ្ញាណដែលអត់ទោស ដូចដែលព្រះទ្រង់បានអត់ទោសឲ្យយើង(ខ.១២-១៣)។ តាមរយៈគំរូរបស់ព្រះអង្គ នោះព្រះអង្គបានបង្រៀនយើងឲ្យស្រឡាញ់អ្នកដទៃ ដូចដែលព្រះអង្គបានស្រឡាញ់យើង ទោះយើងមានចំណុចខ្វះខាតយ៉ាងណាក៏ដោយ។—Cindy Hess Kasper
តើអ្នកដទៃមានកំហុសអ្វីខ្លះ ដែលអ្នកពិបាកទទួល ឬអត់ទោសឲ្យ? តើអ្នកអាចយកគំរូតាមព្រះដូចម្តេចខ្លះ ក្នុងរបៀបដែលអ្នកទំនាក់ទំនងជាមួយអ្នកដទៃ?
ឱព្រះនៃក្តីស្រឡាញ់ សូមព្រះអង្គបង្ហាញចំណុចខ្វះខាតរបស់ទូលបង្គំ ដែលរារាំងអ្នកដទៃ មិនឲ្យស្គាល់ព្រះអង្គ តាមរយៈទូលបង្គំ។ សូមព្រះអង្គជួយទូលបង្គំឲ្យមានចិត្តអត់ធ្មត់ និងស្រឡាញ់ ហើយអត់ទោសឲ្យគេ តាមគំរូព្រះអង្គ។
គម្រោងអានព្រះគម្ពីររយៈពេល១ឆ្នាំ : ចោទិយកថា ២០-២២ និង ម៉ាកុស ១៣:២១-៣៧
