កិច្ចការដែលយើងធ្វើថ្វាយព្រះ
ដោយTim Gustafson
March 21, 2022
អស់អ្នកណាដែលមានសេចក្តីរំជួលក្នុងចិត្ត ជាអ្នកដែលមានវិញ្ញាណបណ្តាលឲ្យថ្វាយស្ម័គ្រពីចិត្ត នោះក៏យកដង្វាយមកថ្វាយដល់ព្រះយេហូវ៉ា សំរាប់ការធ្វើត្រសាលជំនុំ។ និក្ខមនំ ៣៥:២១ ពេលដែលស្តេច យ៉ុងចូ នៃប្រទេសកូរ៉េ(ឆ្នាំ១៦៩៤ ដល់១៧៧៦) មានការពិបាកព្រះទ័យ ដោយសារអំពើពុករលួយ និងភាពហ៊ឺហារបស់ពួកមន្រ្តី ដែលកំពុងតែបំផ្លាញនគររបស់ទ្រង់ ទ្រង់ក៏បានសម្រេចព្រះទ័យធ្វើការផ្លាស់ប្តូរបញ្ហាមួយចំនួន។ ទ្រង់បានហាមមិនឲ្យគេប្រើអំបោះពណ៌មាស នៅក្នុងការប៉ាក់ក្រណាត់ ដែលជាប្រពៃណីរបស់ពួកអ្នកមាន ដែលចូលចិត្តភាពហ៊ឺហា។ មិនយូរប៉ុន្មាន ចំណេះដឹងនៃការដេរប៉ាក់ប្រភេទនេះ ក៏បានរលាតសាបសូន្យ ទៅក្នុងអតីតកាល។ នៅឆ្នាំ២០១១សាស្ត្រាចារ្យ ស៊ីម យ៉ុន-អូក (Sim Yeon-ok) ចង់ស្តាប្រពៃណីមួយនេះឡើងវិញ បន្ទាប់ពីវាបានបាត់បង់តាំងពីយូរមកហើយ។ គាត់បានសន្និដ្ឋានថា គេបានយកសន្លឹកមាសមកបិទពីលើក្រដាសធ្វើពីដើមម៉ន រួចកាត់វាឲ្យក្លាយជាសរសៃអំបោះ។ គាត់អាចធ្វើតាមវិធីសាស្រ្តនេះ ដែលនាំឲ្យទម្រង់សិល្បៈបុរាណមួយនេះរស់ឡើងវិញ។ ក្នុងកណ្ឌនិក្ខមនំ យើងឃើញថា គេបានប្រើមាស ដើម្បីសាងសង់រោងឧបោសថ ដោយរាប់បញ្ចូលទាំងការប្រើខ្សែអំបោះមាស ដើម្បីធ្វើសំលៀកបំពាក់សង្ឃ ឲ្យលោកអើរ៉ុនផងដែរ។ ពួកជាងដ៏ចំណានបាន “ផែមាសយ៉ាងស្តើងហើយកាត់ជាខ្សែ យកទៅប៉ាក់នៅសំពត់ពណ៌ផ្ទៃមេឃ ពណ៌ស្វាយ ពណ៌ក្រហម ហើយនៅសំពត់ខ្លូតទេសយ៉ាងម៉ដ្ត នោះតាមរចនានៃជាងមានស្នាដៃ”(និក្ខមនំ ៣៩:៣)។ តើមានអ្វីកើតឡើងចំពោះស្នាដៃសិល្បៈដ៏ប្រណិតទាំងនោះ? តើក្រណាត់ទាំងនោះគ្រាន់តែបានចាស់ហើយដាច់រហែកឬ? តើពួកសត្រូវបានរឹបអូសយកទៅបាត់ឬ? តើវាបានក្លាយជារឿងអត់ប្រយោជន៍ទៅហើយមែនទេ? មិនមែនទេ! ផ្នែកនីមួយៗនៃការប្រឹងប្រែងរបស់ពួកគេ សុទ្ធតែបានធ្វើឡើង ដោយសារព្រះទ្រង់បានបង្គាប់ឲ្យធ្វើ ដោយការណែនាំដ៏ជាក់លាក់។ ព្រះទ្រង់បានប្រទានឲ្យយើងមានកិច្ចការ ដែលត្រូវធ្វើផងដែរ។ កិច្ចការទាំងនោះអាចជាការប្រព្រឹត្តដ៏សាមញ្ញ ដោយចិត្តសប្បុរស ជាការអ្វីដែលយើងត្រូវធ្វើថ្វាយព្រះអង្គ ខណៈពេលដែលយើងបម្រើគ្នាទៅវិញទៅមក។ យើងមិនចំាបាច់ត្រូវបារម្ភអំពីរឿងដែលអាចកើតឡើង នៅចុងបញ្ចប់នោះឡើយ(១កូរិនថូស ១៥:៥៨)។ ការអ្វីដែលយើងបានធ្វើ ថ្វាយព្រះវរបិតា ប្រៀបដូចជាខ្សែអំបោះមួយ ដែលលាតសន្ធឹងទៅដល់ភាពអស់កល្បជានិច្ច។—Tim Gustafson តើមានការអ្វីខ្លះ ដែលព្រះទ្រង់បានប្រទានឲ្យអ្នកធ្វើ ពេញមួយជីវិតអ្នក? តើទស្សនៈរបស់អ្នកមានការផ្លាស់ប្តូរយ៉ាងណាខ្លះ ពេលដែលអ្នកគិតថា អ្នកកំពុងធ្វើកិច្ចការតូចៗប្រចាំថ្ងៃថ្វាយព្រះអង្គ? ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំ ឲ្យសម្រេចចិត្តបម្រើព្រះអង្គ នៅថ្ងៃនេះ តាមរយៈអ្វីៗដែលទូលបង្គំធ្វើ។ គម្រោងអានព្រះគម្ពីររយៈពេល១ឆ្នាំ : យ៉ូស្វេ ៧-៩ និង លូកា ១:២១-៣៨