បើកាលណាអ្នករៀបលៀងភ្ញៀវនោះ ចូរអញ្ជើញពួកអ្នកក្រ អ្នកពិការ អ្នកខ្ញើច និងអ្នកខ្វាក់វិញ យ៉ាងនោះ អ្នកនឹងបានពរពិត។-លូកា ១៤:១៣-១៤
អ្នកស្រីលូដមីឡា(Ludmilla) ជាស្រ្តីមេម៉ាយ អាយុ៨២ឆ្នាំ បានប្រកាសថា ផ្ទះរបស់គាត់នៅសាធារណៈរដ្ឋឆេក គឺជា “ស្ថានទូតនៃនគរស្ថានសួគ៌” ដោយនិយាយថា ផ្ទះរបស់គាត់ គឺជាផ្នែកមួយនៃនគររបស់ព្រះគ្រីស្ទ។ គាត់បានស្វាគមន៍មនុស្សដែលគាត់មិនស្គាល់ និងមិត្តភក្តិ ដែលកំពុងមានការឈឺចាប់ ហើយត្រូវការការស្វាគមន៍ដោយក្តីស្រឡាញ់ ហើយជួនកាល គាត់ផ្តល់អាហារ និងកន្លែងគេងដល់ពួកគេ ដោយវិញ្ញាណដែលអាណិត និងការអធិស្ឋាន។ គាត់បានពឹងផ្អែកលើការបណ្តាលចិត្តពីព្រះវិញ្ញាណបរិសុទ្ធ ដែលជួយឲ្យគាត់មើលថែភ្ញៀវរបស់គាត់ ដូចនេះ គាត់មានចិត្តអរសប្បាយ ចំពោះរបៀបដែលព្រះទ្រង់ឆ្លើយតបការអធិស្ឋានរបស់ពួកគេ។ អ្នកស្រីលូដមីឡាបម្រើព្រះយេស៊ូវ តាមរយៈការបើកទ្វារផ្ទះ និងចិត្តចំហ ទទួលអ្នកដែលត្រូវការជំនួយ គឺខុសពីអ្នកដឹកនាំសាសនាដ៏ល្បីម្នាក់ ដែលបានអញ្ជើញព្រះយេស៊ូវឲ្យយាងចូលផ្ទះគាត់ សោយអាហារនៅថ្ងៃឈប់សម្រាក។ ព្រះយេស៊ូវបានប្រាប់គ្រូក្រិត្យវិន័យរូបនោះថា “ចូរអញ្ជើញពួកអ្នកក្រ អ្នកពិការ អ្នកខ្ញើច និងអ្នកខ្វាក់វិញ” គឺមិនត្រូវអញ្ជើញអ្នកដែលអាចតបស្នងគាត់វិញនោះឡើយ (លូកា ១៤:១៣)។ ព្រះបន្ទូលព្រះយេស៊ូវបានបង្ហាញឲ្យគេដឹងថា ពួកផារិស៊ីរូបនោះបានអញ្ជើញព្រះយេស៊ូវ ដោយសារសេចក្តីអំនួតប៉ុណ្ណោះ(ខ.១២) តែអ្នកស្រីលូដមីឡាបានអញ្ជើញមនុស្សចូលផ្ទះគាត់ ដើម្បីឲ្យគាត់អាចបម្រើគេ ក្នុងនាមជា “ឧបករណ៍នៃសេចក្តីស្រឡាញ់ និងប្រាជ្ញារបស់ព្រះអង្គ”។
អ្នកស្រីលូដមីឡាបានមានប្រសាសន៍ថា ការបម្រើអ្នកដទៃ ដោយការបន្ទាបខ្លួន ជាវិធីមួយ ដែលយើងអាចធ្វើជា “តំណាង ឬទូតរបស់នគរស្ថានសួគ៌”។ ទោះយើងអាចផ្តល់កន្លែងស្នាក់នៅ សម្រាប់មនុស្សដែលយើងមិនដែលស្គាល់ក៏ដោយ ក៏យើងនៅតែអាចចាត់ទុកតម្រូវការរបស់អ្នកដទៃ ជាសំខាន់ជាងតម្រូវការរបស់យើង តាមរបៀបផ្សេងៗ ដោយភាពប៉ិនប្រសប់។ តើយើងអាចពង្រីកនគរព្រះ ក្នុងតំបន់ដែលយើងរស់នៅ សព្វថ្ងៃនេះ ដោយរបៀបណា?—Amy Boucher Pye
តើអ្នកយល់ឃើញថា ពួកផារិស៊ីម្នាក់នោះ មានប្រតិកម្មយ៉ាងណា ពេលដែលព្រះយេស៊ូវប្រាប់គាត់ ឲ្យប្រព្រឹត្តល្អចំពោះជនកំសត់ទុរគតវិញ? តើអ្នកចូលចិត្តធ្វើអ្វីខ្លះ ដើម្បីឲ្យអ្នកដទៃមានអារម្មណ៍ថា ពួកគេបានទទួលការស្វាគមន៍?
ឱព្រះយេស៊ូវ ទូលបង្គំសូមអរព្រះគុណ សម្រាប់ការស្វែងរកមនុស្សកំសត់ទុរគត។ សូមព្រះអង្គជួយទូលបង្គំ ឲ្យមានលក្ខណៈដូចព្រះអង្គ ដើម្បីឲ្យទូលបង្គំអាចមើលថែអ្នកដទៃ ដោយបង្ហាញឲ្យពួកគេស្គាល់សេចក្តីស្រឡាញ់របស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : ពួកចៅហ្វាយ ១១-១២ និង លូកា ៦:១-២៦
