បើអ្នកបានប្រព្រឹត្តល្អ ហើយទ្រាំឲ្យគេធ្វើទុក្ខដោយអត់ទ្រាំវិញ នោះទើបជាការដែលគាប់ព្រះហឫទ័យនៅចំពោះព្រះមែន។ ១ពេត្រុស ២:២០
អ្នកគ្រប់គ្រងនៅកន្លែងធ្វើការរបស់អេវេលីន(Evelyn) បានសួរនាងថា “តើនាងនៅតែមិនសប្បាយចិត្ត ដោយសារខ្ញុំចង់ឲ្យក្រុមការងាររបស់នាង មានបន្ទប់ធ្វើការតូចជាងមុនមែនទេ?” នាងក៏បានឆ្លើយដោយទឹកមុខមាំថា “អត់ទេ”។ នាងកាន់តែមិនសប្បាយចិត្ត ពេលដែលគាត់ហាក់ដូចជាចង់យករឿងនេះមកនិយាយទៀត។ នាងបានព្យាយាមជួយក្រុមហ៊ុនរបស់នាង ដោយស្វែងរកវិធីនាំក្រុមផ្សេងទៀតឲ្យចូលរួម តែទីកន្លែងតូចជាងមុន ធ្វើឲ្យនាងស្ទើរតែមិនអាចធ្វើការនេះបាន។ អេវេលីនខំទប់ទឹកភ្នែក តែនាងបានសម្រេចចិត្តថា នឹងធ្វើអ្វីក៏ដោយ ដែលអ្នកគ្រប់គ្រងឲ្យនាងធ្វើ។ នាងប្រហែលមិនអាចនាំមកនូវការផ្លាស់ប្តូរ ដែលនាងសង្ឃឹមថា នឹងកើតមាននោះទេ តែនាងនៅតែអាចធ្វើការងាររបស់នាង អស់ពីសមត្ថភាព។
ក្នុងកណ្ឌគម្ពីរសំបុត្រទី១របស់សាវ័កពេត្រុស គាត់បានជំរុញអ្នកជឿព្រះយេស៊ូវ នៅសតវត្សរ៍ទី១ ឲ្យចុះចូលនឹង “គ្រប់ទាំងច្បាប់ របស់មនុស្សលោក”(១ពេត្រុស ២:១៣)។ ការប្រកាន់ខ្ជាប់នូវភាពត្រឹមត្រូវ ក្នុងស្ថានភាពដ៏ពិបាកនៃការងារ មិនមែនជាការងាយនោះទេ។ ប៉ុន្តែ លោកពេត្រុសបានប្រាប់យើង អំពីហេតុផល ដែលយើងត្រូវបន្តធ្វើការល្អ យ៉ាងដូចនេះថា ចូរ “ប្រព្រឹត្តដោយទៀងត្រង់ នៅក្នុងពួកសាសន៍ដទៃ ដើម្បីនៅកន្លែងណា ដែលគេនិយាយដើម ពីអ្នករាល់គ្នា ទុកដូចជាមនុស្សប្រព្រឹត្តអាក្រក់ នោះឲ្យគេបានសរសើរដល់ព្រះ នៅថ្ងៃដែលទ្រង់យាងមកប្រោស ដោយគេឃើញការល្អរបស់អ្នករាល់គ្នាវិញ”(ខ.១២)។ ម្យ៉ាងទៀត ការនេះជួយយើងឲ្យរស់នៅជាគំរូនៃការកោតខ្លាចព្រះ សម្រាប់អ្នកជឿដទៃទៀត ដែលកំពុងមើលឃើញការរស់នៅរបស់យើងផងដែរ។
បើយើងស្ថិតនៅក្នុងស្ថានភាពការងារដែលបំពានសិទ្ធិរបស់យើង យើងគួរដោះខ្លួនយើងចេញពីកន្លែងនោះ បើសិនជាអាច(១កូរិនថូស ៧:២១)។ ប៉ុន្តែ ក្នុងបរិយាកាសដែលមានសុវត្ថិភាព ដោយជំនួយមកពីព្រះវិញ្ញាណ យើងអាចបន្តធ្វើការល្អ នៅកន្លែងធ្វើការ ដោយចាំថា “នោះជាការដែលគាប់ព្រះទ័យព្រះ”(១ពេត្រុស ២:២០)។ ពេលណាយើងចុះចូលនឹងរដ្ឋអំណាច ឬចៅហ្វាយនាយ យើងអាចប្រើការនេះជាឱកាស នាំអ្នកដទៃឲ្យមានហេតុផល ដែលត្រូវដើរតាម និងថ្វាយសិរីល្អដល់ព្រះ។—Julie Schwab
តើតាមធម្មតា អ្នកធ្វើដូចម្តេច ពេលដែលអ្នកស្ថិតក្នុងស្ថានភាពដ៏ពិបាក នៅក្រោមការគ្រប់គ្រង ឬដឹកនាំរបស់អ្នកដទៃ? តើព្រះទ្រង់សព្វព្រះទ័យនឹងធ្វើការអ្វីខ្លះ ក្នុងជីវិតអ្នក តាមរយៈបញ្ហានេះ?
ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំឲ្យបន្តថ្វាយព្រះកិត្តិនាមដល់ព្រះអង្គ តាមរយៈការឆ្លើយតប របស់ទូលបង្គំ ចំពោះអ្នកគ្រប់គ្រង ឬដឹកនាំ ទោះទូលបង្គំស្ថិតក្នុងស្ថានភាពដែលទូលបង្គំកំពុងជួបប្រទះ។ សូមព្រះអង្គជួយទូលបង្គំ ឲ្យរស់នៅជារៀងរាល់ថ្ងៃ តាមរបៀបដែលថ្វាយសិរីល្អដល់ព្រះអង្គ។
គម្រោងអានព្រះគម្ពីររយៈពេល១ឆ្នាំ : ២សាំយ៉ូអែល ៣-៥ និង លូកា ១៤:២៥-៣៥
