ព្រះវរបិតានៃយើងខ្ញុំតែងតែស្តាប់ឮយើង
ដោយJohn Blase
May 5, 2022
ដូច្នេះ ចូរអធិស្ឋានបែបយ៉ាងនេះវិញថា ឱព្រះវរបិតានៃយើងខ្ញុំ ដែលគង់នៅស្ថានសួគ៌អើយ សូមឲ្យព្រះនាមទ្រង់បានបរិសុទ្ធ។ ម៉ាថាយ ៦:៩ រៀងរាល់ពេលព្រឹក ភាគច្រើន ខ្ញុំបានសូត្រសេចក្តីអធិស្ឋានព្រះអម្ចាស់។ ខ្ញុំមានអារម្មណ៍ថា ខ្ញុំមិនមានតម្លៃសក្ដិសម ក្នុងការរស់នៅក្នុងថ្ងៃថ្មី ទាល់តែខ្ញុំបានឈរមាំ ក្នុងសេចក្តីអធិស្ឋានរបស់ព្រះអម្ចាស់ជាមុនសិន។ កាលពីពេលថ្មីៗនេះ ពេលដែលខ្ញុំហៀបនឹងអធិស្ឋានថា “ឱព្រះវរបិតានៃយើងខ្ញុំ...” ទូរស័ព្ទខ្ញុំក៏បានរោទ៍ឡើង។ ខ្ញុំភ្ញាក់ខ្លួនព្រើត ពេលដែលខ្ញុំមើលទៅនាឡិកា ឃើញម៉ោង ៥ ៣៤នាទីព្រឹក។ តើនរណាទូរស័ព្ទមក? ខ្ញុំមើលទូរស័ព្ទ ឃើញឈ្មោះ “ឪពុក” របស់ខ្ញុំ។ មុនពេលខ្ញុំលើកទូរស័ព្ទនិយាយ ទូរស័ព្ទរបស់គាត់ក៏បានបិទវិញ។ ខ្ញុំគិតស្មានថា គាត់ប្រហែលជាច្រឡំដៃចុចទូរស័ព្ទមកខ្ញុំហើយ។ ក្រោយមក ខ្ញុំក៏បានដឹងថា គាត់ពិតជាច្រឡំមែន។ តើនេះជារឿងចៃដន្យមែនទេ? ទោះជាយ៉ាងណាក៏ដោយ ខ្ញុំជឿថា យើងកំពុងរស់នៅក្នុងពិភពលោក ដែលគ្របដណ្តប់ទៅដោយសេចក្តីមេត្តារបស់ព្រះ។ ថ្ងៃនោះ ខ្ញុំត្រូវនឹកចាំអំពីការធានាថា ព្រះវរបិតានៃយើង តែងតែគង់នៅជាមួយជានិច្ច។ សូមយើងចំណាយពេលមួយភ្លែត គិតអំពីរឿងនេះចុះ។ មានវិធីជាច្រើនដែលព្រះយេស៊ូវអាចបង្រៀនពួកសិស្សព្រះអង្គ ឲ្យចាប់ផ្តើមការអធិស្ឋាន តែព្រះអង្គបានសម្រេចព្រះទ័យឲ្យយើងចាប់ផ្តើម ដោយពាក្យថា “ឱព្រះវរបិតានៃយើងខ្ញុំ” (ម៉ាថាយ ៦:៩)។ តែជារឿងចៃដន្យទេ? ទេ ព្រះបន្ទូលព្រះយេស៊ូវ សុទ្ធតែបន្លឺចេញមក ដោយមានគោលបំណងច្បាស់លាស់។ យើងរាល់គ្នា មានទំនាក់ទំនងខុសៗគ្នា ជាមួយឪពុកបង្កើតរបស់យើង ដែលនៅផែនដី ដោយខ្លះមានទំនាក់ទំនងល្អ ហើយខ្លះមានទំនាក់ទំនងមិនសូវល្អ។ ទោះជាយ៉ាងណាក៏ដោយ ពេលយើងអធិស្ឋាន តាមលំនាំសេចក្តីអធិស្ឋានរបស់ព្រះអម្ចាស់ យើងមិនចាប់ផ្តើមដោយពាក្យថា ឱព្រះវរបិតា “របស់ខ្ញុំ” ឬ “របស់អ្នក” នោះទេ តែចាប់ផ្តើមដោយពាក្យ ឱព្រះវរបិតានៃយើងខ្ញុំ។ ទ្រង់ជាព្រះដែលទតឃើញ និងស្តាប់ឮយើង ហើយក៏ជ្រាបថា យើងត្រូវការអ្វី មុនពេលយើងទូលសូមព្រះអង្គទៅទៀត(ខ.៨)។ នេះជាការធានាដ៏អស្ចារ្យ ជាពិសេស នៅថ្ងៃដែលយើងមានអារម្មណ៍ថា គេបានភ្លេចយើង យើងនៅឯកោ គេបោះបង់យើង ឬយើងគ្មានតម្លៃជាដើម។ សូមចាំថា ទោះយើងស្ថិតក្នុងស្ថានភាពបែបណាក៏ដោយ ហើយយើងស្ថិតនៅថ្ងៃ ឬយប់ក៏ដោយ ព្រះវរបិតានៃយើងដែលគង់នៅស្ថានសួគ៌ តែងតែគង់នៅក្បែរយើងជានិច្ច។—John Blasé តើអ្នកអាចឲ្យសេចក្តីអធិស្ឋាននៃព្រះអម្ចាស់ ក្លាយជាផ្នែកមួយនៃការរស់នៅរបស់អ្នក ដោយរបៀបណា? តើពាក្យ “ព្រះវរបិតានៃយើងខ្ញុំ” បានប៉ះពាល់ចិត្តអ្នកយ៉ាងណាខ្លះ? ឱព្រះវរបិតា ទូលបង្គំសូមអរព្រះគុណ សម្រាប់ការសន្យាថា ព្រះអង្គនឹងស្តាប់ឮទូលបង្គំ ពេលទូលបង្គំអធិស្ឋាន ទោះទូលបង្គំនៅទីណាក៏ដោយ។ To learn more about prayer, visit ODBU.org/SF120. គម្រោងអានព្រះគម្ពីររយៈពេល១ឆ្នាំ : ១ពង្សាវតាក្សត្រ ១៩-២០ និង លូកា ២៣:១-២៥