សេចក្តីក្លាហានដែលមិនធម្មតា
ដោយJennifer Benson Schuldt
May 17, 2022
សូមនាំខ្ញុំចូលទៅគាល់ដល់ស្តេចចុះ នោះខ្ញុំនឹងកាត់ស្រាយសេចក្តីថ្វាយទ្រង់ជ្រាបវិញ។ ដានីយ៉ែល ២:២៤ កាលពីឆ្នាំ១៤៧៨ លោកឡូរេនហ្សូ ដឺ មេឌីស៊ី(Lorenzo de Medici) ដែលជាអ្នកដឹកនាំទីក្រុងផ្លូរិន ប្រទេសអ៊ីតាលី បានទទួលរងការវាយប្រហារប៉ុនប៉ងធ្វើឃាត។ ជនរួមជាតិរបស់គាត់ក៏បានបញ្ឆេះភ្លើងសង្រ្គាម ដើម្បីធ្វើការសងសឹកមកលើអ្នកដែលវាយប្រហារមកលើអ្នកដឹកនាំរបស់ខ្លួន។ ខណៈពេលដែលស្ថានភាពកាន់តែអាក្រក់ឡើង ស្តេចហ្វឺររ៉ង់តេ ទី១ នៃនគរនេភល(King Ferrante I of Naples) ដែលជាមនុស្សសាហាវព្រៃផ្សៃបានក្លាយជាសត្រូវរបស់លោកឡូរេនហ្សូ តែទង្វើប្រកបដោយភាពក្លាហានរបស់លោកឡូរេនហ្សូ បាននាំឲ្យអ្វីៗមានការផ្លាស់ប្តូរ។ គាត់បានទៅគាល់ស្តេចអង្គនោះ តែម្នាក់ឯង ដោយគ្មានអាវុធជាប់ខ្លួន។ ភាពក្លាហាន បូករួមជាមួយនឹងវោហាពូកែ និងភាពឆ្លាតវៃរបស់គាត់ បាននាំឲ្យស្តេចហ្វឺរ៉ង់តេកោតសរសើរគាត់ ហើយក៏បានបញ្ចប់សង្គ្រាម។ លោកដានីយ៉ែលក៏បានជួយឲ្យស្តេចមានការផ្លាស់ប្តូរព្រះទ័យផងដែរ។ ស្តេចនេប៊ូក្នេសាមានសុបិនចម្លែក ដែលបានរំខានព្រះទ័យទ្រង់យ៉ាងខ្លាំង ដោយគ្មាននរណាម្នាក់នៅទីក្រុងបាប៊ីឡូន អាចកាត់ស្រាយសុបិននោះបានទេ។ រឿងនេះបានធ្វើឲ្យទ្រង់ខ្ញាល់យ៉ាងខ្លាំង បានជាទ្រង់សម្រេចព្រះទ័យឲ្យគេប្រហារជីវិតទីប្រឹក្សារបស់ទ្រង់ ដែលរាប់បញ្ចូលទាំងលោកដានីយ៉ែល និងមិត្តភក្តិរបស់គាត់ផងដែរ។ តែលោកដានីយ៉ែលបានស្នើសុំចូលគាល់ស្តេច ដែលចង់ប្រហារជីវិតគាត់(ដានីយ៉ែល ២:២៤)។ នៅចំពោះមុខស្តេចនេប៊ូក្នេសា លោកដានីយ៉ែលក៏បានសរសើរព្រះ សម្រាប់ការបើកសម្តែងការអាថ៌កំបាំងនៃសុបិនរបស់ស្តេចអង្គនេះ(ខ.២៨)។ ពេលដែលលោកហោរាបានកាត់ស្រាយសុបិនរបស់ស្តេចនេប៊ូក្នេសា ទ្រង់ក៏បានថ្វាយព្រះកិត្តិនាមដល់ “ព្រះលើអស់ទាំងព្រះ ព្រះអម្ចាស់លើអស់ទាំងស្តេច”(ខ.៤៧)។ សេចក្តីក្លាហានរបស់ដានីយ៉ែល ដែលកើតចេញពីជំនឿលើព្រះអម្ចាស់ បានជួយឲ្យគាត់ មិត្តភក្តិគាត់ និងទីប្រឹក្សាដទៃទៀត ឲ្យរួចផុតពីសេចក្តីស្លាប់នៅថ្ងៃនោះ។ ក្នុងជីវិតយើង ជាញឹកញាប់ យើងត្រូវការភាពក្លាហាន ដើម្បីនាំសារដ៏សំខាន់ទៅប្រាប់អ្នកដទៃ។ សូមព្រះទ្រង់ដឹកនាំពាក្យសម្តីរបស់យើង ហើយប្រទានយើងនូវប្រាជ្ញា ដើម្បីឲ្យដឹងថា ត្រូវនិយាយអ្វី ហើយមានសមត្ថភាពនិយាយបានល្អ។—Jennifer Benson Schuldt តើភាពក្លាហានរបស់អ្នកដទៃ បាននាំមកនូវការផ្លាស់ប្តូរក្នុងជីវិតអ្នកដូចម្តេចខ្លះ? តើអ្នកអាចពឹងផ្អែកអំណាចចេស្តាព្រះដូចម្តេចខ្លះ ដើម្បីប្រព្រឹត្តដោយចិត្តក្លាហានថ្វាយព្រះអង្គ? ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការធ្វើជាគំរូនៃភាពក្លាហាន កាលព្រះអង្គនៅបំពេញព្រះរាជកិច្ចនៅលើផែនដី។ សូមព្រះអង្គបំពេញទូលបង្គំឲ្យមានប្រាជ្ញា និងអំណាចព្រះអង្គ ពេលណាទូលបង្គំប្រឈមមុខដាក់ស្ថានភាពដ៏តានតឹង។ គម្រោងអានព្រះគម្ពីររយៈពេល១ឆ្នាំ : ១របាក្សត្រ ១-៣ និង យ៉ូហាន ៥:២៥-៤៧