ការប្រោសឲ្យជាសម្រាប់ពិភពលោកទាំងមូល
ដោយWinn Collier
May 30, 2022
ទ្រង់បានផ្សះផ្សាយើងនឹងព្រះអង្គទ្រង់ ដោយសារព្រះយេស៊ូវគ្រីស្ទ ហើយបានប្រទានការងារផ្សះផ្សានោះ មកយើងខ្ញុំដែរ។ ២កូរិនថូស ៥:១៨ នៅក្នុងជ្រលងភ្នំដាច់ស្រយាលមួយ នៅភាគខាងលិចនៃប្រទេសស្លូវេនា មានមន្ទីរពេទ្យសម្ងាត់មួយ(មន្ទីរពេទ្យកងទ័ពរំដោះហ្វ្រានចា) ដែលបានដំណើរការដោយបុគ្គលិកពេទ្យជាច្រើននាក់ និងបានជួយព្យាបាលទាហានដែលមានរបួសរាប់ពាន់នាក់ ក្នុងអំឡុងសម័យសង្គ្រាមលោកលើកទី២ ដោយលាក់កំបាំងមិនឲ្យពួកណាហ្ស៊ីរកឃើញ។ ការជៀសផុតពីការស្វែងរករបស់ពួកណាហ្ស៊ី គឺជាជោគជ័យដ៏គួរឲ្យកត់សំគាល់ តែដែលកាន់តែគួរឲ្យកត់សំគាល់ជាងនេះទៀតនោះគឺ មន្ទីរពេទ្យ(ដែលបានទទួលប្រាក់ឧបត្ថម្ភ និងគ្រប់គ្រងដោយចលនារំដោះជាតិរបស់ប្រទេសស្លូវេនា) បានព្យាបាលទាហានរបស់សម្ព័ន្ធមិត្ត ក៏ដូចជាទាហានរបស់សត្រូវ។ ពោលគឺ មន្ទីរពេទ្យនេះបានទទួលស្វាគមន៍មនុស្សទាំងអស់។ ព្រះគម្ពីរបានបង្រៀនយើងឲ្យនាំពិភពលោក ឲ្យទទួលការព្យាបាលខាងវិញ្ញាណ។ បានសេចក្តីថា យើងត្រូវមានសេចក្តីអាណិតដល់មនុស្សទាំងអស់ ទោះពួកគេមានទស្សនៈដូចម្តេចក៏ដោយ។ មនុស្សម្នាក់ៗសុទ្ធតែសក្ដិសមនឹងទទួលសេចក្តីស្រឡាញ់ និងសេចក្តីសប្បុរសរបស់ព្រះគ្រីស្ទ ទោះពួកគេមាននិន្នាការអ្វីក៏ដោយ។ សាវ័កប៉ុលបានមានប្រសាសន៍ថា សេចក្តីស្រឡាញ់របស់ព្រះយេស៊ូវបានជំរុញចិត្តយើង ព្រោះយើងជឿថា ព្រះអង្គបានសុគតជំនួសមនុស្សទាំងអស់(២កូរិនថូស ៥:១៤)។ យើងរាល់គ្នាសុទ្ធតែរងគ្រោះដោយសារជំងឺរបស់អំពើបាប។ យើងរាល់គ្នាស្រេកឃ្លានការប្រោសឲ្យជា នៃការអត់ទោសបាបរបស់ព្រះយេស៊ូវ។ ហើយព្រះអង្គបានយាងមករកយើង ដើម្បីប្រោសយើងឲ្យជា។ បន្ទាប់មក អ្វីដែលគួរឲ្យភ្ញាក់ផ្អើលនោះគឺ ព្រះទ្រង់បានប្រទានយើង នូវ “ព្រះបន្ទូល ពីការផ្សះផ្សារ”(ខ.១៩)។ ព្រះអង្គត្រាស់ហៅយើង ឲ្យទៅរកមនុស្សដែលមានរបួស និងភាពប្រេះបែកខាងវិញ្ញាណ(ដូចយើងដែរ)។ យើងចូលរួមក្នុងព្រះរាជកិច្ចនៃការប្រោសឲ្យជា ដោយអ្នកជំងឺប្រែក្លាយជាមានសុខភាពល្អ តាមរយៈការផ្សះផ្សាជាមួយព្រះអង្គ។ ហើយការប្រោសឲ្យជានេះ គឺមានសម្រាប់អស់អ្នកដែលស្ម័គ្រចិត្តទទួល។—Winn Collier តើមាននរណាខ្លះ ដែលអ្នកគិតថា ព្រះទ្រង់នឹងមិន(ឬមិនគួរ)ប្រោសឲ្យជា? តើព្រះទ្រង់សព្វព្រះទ័យឲ្យអ្នកធ្វើជាអ្នកផ្សះផ្សារ និងនាំមកនូវការប្រោសឲ្យជា នៅកន្លែងណា? ឱព្រះអម្ចាស់ ទូលបង្គំត្រូវការការប្រោសឲ្យជា។ ហើយទូលបង្គំដឹងថា អ្នកដទៃក៏ត្រូវការការប្រោសឲ្យជាផងដែរ។ សូមព្រះអង្គជួយទូលបង្គំ ឲ្យមានចំណែកជាមួយព្រះអង្គ នៅក្នុងការប្រោសឲ្យជាសម្រាប់អ្នកដទៃ។ គម្រោងអានព្រះគម្ពីររយៈពេល១ឆ្នាំ : ២របាក្សត្រ ១០-១២ និង យ៉ូហាន ១១:៣០-៥៧