នោះព្រះវរបិតានៃអ្នក ដែលទ្រង់ទតឃើញក្នុងទីសំងាត់ ទ្រង់នឹងប្រទានរង្វាន់ដល់អ្នកនៅទីប្រចក្សច្បាស់។ ម៉ាថាយ ៦:៤
រៀងរាល់ថ្ងៃ លោកគ្លែន(Glen) តែងតែទៅទិញកាហ្វេពេលព្រឹក នៅហាងលក់កាហ្វេនៅក្បែរតំបន់គាត់រស់នៅ ដែលនៅទីនោះ អ្នកទិញត្រូវបើកឡានបន្តកន្ទុយគ្នាជាជួរ ចូលតាមច្រកតែមួយ ដើម្បីរង់ចាំទិញកាហ្វេម្តងម្នាក់ៗ។ ហើយជារៀងរាល់ថ្ងៃ គាត់ក៏បានចេញថ្លៃកាហ្វេឲ្យអ្នកបើកឡាន ដែលកំពុងរង់ចាំខាងក្រោយគាត់ជានិច្ច ដោយគ្រាន់តែប្រាប់អ្នកគិតលុយ ឲ្យជូនពរអ្នកនោះឲ្យសុខសប្បាយ។ លោកគ្លែនមិនបានស្គាល់ពួកគេទេ។ គាត់ក៏មិនបានដឹង អំពីការឆ្លើយតបរបស់ពួកគេដែរ។ គាត់គ្រាន់តែជឿថា វាជាទង្វើតូចបំផុតដែលគាត់អាចធ្វើបាន។ ទោះជាយ៉ាងណាក៏ដោយ នៅថ្ងៃមួយ គាត់ក៏បានដឹង អំពីឥទ្ធិពលនៃទង្វើរបស់គាត់ ពេលគាត់អានសំបុត្រអនាមិកមួយ ដែលគេបានផ្ញើមកក្រុមហ៊ុនកាសែត ក្នុងតំបន់គាត់។ គាត់ក៏បានដឹងថា អំណោយដែលគាត់បានឲ្យគេ ដោយចិត្តសប្បុរស នៅថ្ងៃទី១៨ កក្កដា ឆ្នាំ២០១៧ បានបណ្តាលឲ្យអ្នកបើកឡាន នៅពីក្រោយឡានគាត់ បានផ្លាស់ប្តូរគំនិត លែងចង់សម្លាប់ខ្លួន នៅថ្ងៃនោះ។
លោកគ្លែនបានឲ្យអំណោយជាប្រចាំថ្ងៃ ដល់អ្នកបើកបរឡាន នៅពីក្រោយឡានគាត់ ដោយមិនចង់បានការអរគុណ ឬការសរសើរឡើយ។ ទើបតែលើកនេះទេ ដែលគាត់បានមើលឃើញឥទ្ធិពល នៃអំណោយដ៏តូចរបស់គាត់។ រឿងនេះបានធ្វើឲ្យខ្ញុំនឹកចាំ អំពីការបង្រៀនរបស់ព្រះយេស៊ូវ ឲ្យយើងធ្វើទាន ដោយមិនឲ្យដៃស្តាំ ដឹងអំពីការដែលដៃឆ្វេងធ្វើ(ម៉ាថាយ ៦:៣)។ ត្រង់ចំណុចនេះ ព្រះអង្គកំពុងជំរុញយើង ឲ្យធ្វើទាន ឬឲ្យអំណោយ ដោយមិនចង់បានការទទួលស្គាល់ ដូចលោកគ្លែនផងដែរ។
ពេលណាយើងឲ្យអ្វីមួយ ដល់នរណាម្នាក់ ដោយក្តីស្រឡាញ់ដល់ព្រះ ដោយមិនចង់បានការសរសើរពីអ្នកដទៃ នោះយើងអាចទុកចិត្តថា ព្រះអង្គនឹងប្រើអំណោយរបស់យើង ទោះតូចឬធំក្តី ដើម្បីជួយបំពេញតម្រូវការរបស់អ្នក ដែលទទួលជឿព្រះអង្គ។—Kirsten Holmberg
តើអ្នកធ្លាប់បានទទួលអំណោយពីជនអនាមិក យ៉ាងដូចម្តេចខ្លះ? តើអ្នកអាចឲ្យអំណោយដល់អ្នកដទៃ ដោយលាក់កំបាំង យ៉ាងដូចម្តេចខ្លះ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការប្រើទូលបង្គំ ដើម្បីបំពេញតម្រូវការអ្នកដទៃ និងបំពេញតម្រូវការទូលបង្គំ តាមរយៈពួកគេ។ សូមព្រះអង្គជួយទូលបង្គំ កុំឲ្យស្វែងរកការសរសើរ ពេលដែលទូលបង្គំឲ្យអំណោយ តាមរបៀបដែលថ្វាយសិរីល្អដល់ព្រះអង្គ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ១៥-១៦ និង យ៉ូហាន ១២:២៧-៥០
